جارتى جىلدا 12 مىڭعا جۋىق زاڭبۇزۋشىلىق تىركەلگەن.
ەسكى جيھازدار مەن قۇرىلىس قالدىقتارىن قوقىس الاڭدارىندا قالدىرۋعا تىيىم سالىنادى، دەپ حابارلايدى Almaty-akshamy.kz
الماتىدا بۇگىنگى تاڭدا كونتەينەرلىك الاڭداردىڭ ىرگەلەس اۋماقتارىندا ءىرى كولەمدى قوقىستاردى جيناۋ وزەكتى ماسەلە.
"تۇرعىندار ەسكى جيھازدى، ىستەن شىققان تۇرمىستىق تەحنيكانى، سانتەحنيكالىق بۇيىمداردى جانە تاعى باسقالاردى قالدىرادى. سونىمەن قاتار، جوندەۋ جۇمىستارىنان كەيىن قۇرىلىس قالدىقتارىن قوقىس جاشىكتەرىنىڭ جانىنان تابۋعا بولادى. مىسالى، پليتكالار، ەسكى ەسىك جاقتاۋلارى مەن كەنەپتەر، كىرپىشتەر جانە تاعى باسقالارى بۇل الاڭنىڭ بىتەلۋىنە جانە باسقا تۇرمىستىق قالدىقتاردىڭ جينالۋىنا اكەلەدى"، دەپ مالىمدەدى الماتى قالاسىنىڭ اكىمدىگى.
قوقىس جينايتىن ماشينالار ۇلكەن كولەمدەگى قوقىستار مەن قۇرىلىس قالدىقتارىن شىعارا المايدى. ويتكەنى بۇل تەحنيكانىڭ پرەستەۋ اپپاراتىن ىستەن شىعارۋى مۇمكىن، – دەپ تولىقتىردى ۆەدومستۆو.
«كوممۋنالدىق قالدىقتاردى باسقارۋ ەرەجەلەرىنە» سايكەس، جىلجىمايتىن وبەكتىلەردى سالۋدى جانە (نەمەسە) جوندەۋدى جۇزەگە اسىراتىن جەكە جانە زاڭدى تۇلعالار قۇرىلىس جانە ءىرى كولەمدى قالدىقتاردى (جيھاز، تۇرمىستىق تەحنيكا) ارنايى بولىنگەن ورىندارعا ءوز بەتىنشە اكەتۋى قاجەت.
الماتى قالاسىنىڭ اۋماعىن اباتتاندىرۋ ەرەجەلەرىنە» سايكەس، ءىرى كولەمدى قوقىستاردى (قالدىقتاردى) شىعارۋدى ءىرى كولەمدى قوقىستاردى اكەتۋ شارتى نەگىزىندە كاسىپورىنداردىڭ، مەكەمەلەردىڭ جانە جەكە تۇلعالاردىڭ وزدەرى نەمەسە قوقىس شىعاراتىن كاسىپورىندار جۇرگىزەدى. ۇيدە جوندەۋ جۇمىستارىن جۇرگىزەتىن تۇرعىندار، سونداي-اق ءىرى كولەمدى قوقىستار پايدا بولعان كەزدە مامانداندىرىلعان ۇيىمدارعا حابارلاسىپ، اقىلى تەحنيكانى شاقىرۋى نەمەسە قالدىقتاردى پوليگونعا ءوز بەتىنشە شىعارۋى قاجەت. پوليگوندار الماتى وبلىسىندا، ىلە اۋدانىندا جانە قاراساي اۋدانى ايتەي اۋىلىندا ورنالاسقان.
«اكىمشىلىك قۇقىق بۇزۋشىلىق تۋرالى» ق ر كودەكسىنىڭ 505-بابىنا سايكەس، اباتتاندىرۋ قاعيدالارىن بۇزۋ جەكە تۇلعالارعا – 20 اەك، شاعىن كاسىپكەرلىك سۋبەكتىلەرىنە نەمەسە كوممەرسيالىق ەمەس ۇيىمدارعا – 30 اەك، ورتا كاسىپكەرلىك سۋبەكتىلەرىنە – 40 اەك، ءىرى كاسىپكەرلىك سۋبەكتىلەرىنە – 20 اەك مولشەرىندە ەسكەرتۋ جاساۋعا نەمەسە ايىپپۇل سالۋعا اكەپ سوعاتىنىن ەسكەرۋ قاجەت.
الماتى پد اقپاراتى بويىنشا، وسى باپقا قاتىستى قالانى اباتتاندىرۋ ەرەجەلەرىن بۇزعانى، ينفراقۇرىلىم وبەكتىلەرىن جانە جاسىل جەلەكتەردى قيراتقانى ءارى بۇلدىرگەنى ءۇشىن 2024 جىلدىڭ 6 ايىندا 11 577 زاڭبۇزۋشىلىق تىركەلىپ، 32 749 200 تەڭگەگە ايىپپۇل سالىندى.