مەملەكەت باسشىسىنىڭ الماتىدا جاڭا رەكرەاسيالىق ايماقتاردى قۇرۋ جانە كوگالداندىرۋ جونىندەگى تاپسىرماسىن ىسكە اسىرۋ اياسىندا بيىل قاڭتار ايىندا جاسىل جەلەكتەردى كۇتىپ ۇستاۋ جانە قورعاۋ جونىندە جاڭا ەرەجەلەر قابىلداندى.
بۇل تۋرالى قالا اكىمى ەربولات دوسايەۆ ق ر پرەزيدەنتى قاسىم-جومارت توقايەۆتىڭ قاتىسۋىمەن وتكەن كەڭەس بارىسىندا مالىمدەدى، دەپ حابارلادى Almaty-akshamy.kz. ونىڭ ايتۋىنشا، جاڭا كوشەتتەرگە قويىلاتىن تالاپتار ەداۋىر كۇشەيتىلدى، جاسىل جەلەكتەردى كۇتۋ جانە قورعاۋ جونىندەگى نورماتيۆتەر ارتتى ءارى مىندەتتى تۇردە سۋارۋ جۇيەسىنىڭ بولۋى كوزدەلگەن.
«اۋماعى 97 گا بولاتىن 5 جاڭا رەكرەاسيالىق ايماق پەن وزەن جاعالاۋلارىنىڭ قۇرىلىسى جالعاسىپ وتىر، ولار 2024 جىلدىڭ 2 توقسانىنىڭ سوڭىنا دەيىن اياقتالادى دەپ جوسپارلانعان. قازىرگى تاڭدا اۋدانى 30 گا بولاتىن 2 جاڭا ءتالىمباقتىڭ قۇرىلىسىنا جسق ازىرلەنۋدە. سۋارۋ جۇيەسىن تارتۋ ءۇشىن 29 ۇڭعىما جانە 5 سۋ جيناعىش سالىندى، 500 مىڭنان استام جاڭادان وتىرعىزىلعان جاسىل جەلەكتەر تامشىلاتىپ سۋارۋ جۇيەسىمەن قامتىلدى»، – دەدى اكىم.
ءارى جاسىل قوردى ساقتاۋ ماقساتىندا الماتىدا ءتۇرلى زيانكەستەردەن 2،3 ملن جاسىل جەلەكتى بيووڭدەۋ جۇرگىزىلىپ وتىر. بيىل 320 مىڭ كوشەت جانە 2025 جىلدىڭ سوڭىنا دەيىن 1،2 ملن كوشەت وتىرعىزىلادى.