الماتىلىقتارعا سۋردولوگيالىق كومەك كورسەتۋ اياسى كەڭەيدى

سۋردولوگيالىق كومەككە 1 282 ادام مۇقتاج 

الماتىدا ەستۋ قابىلەتى بۇزىلعان تۇرعىندارعا سۋردولوگيالىق كومەك كورسەتۋ اياسى كەڭەيدى. بۇل تۋرالى جۇمىسپەن قامتۋ جانە الەۋمەتتىك باعدارلامالار باسقارماسى تەڭ مۇمكىندىكتەر ءبولىمىنىڭ باسشىسى امانات سۇلتانعازييەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

سپيكەردىڭ ايتۋىنشا، قازاقستانداعى العاشقى «Ten Qogam» ورتالىعى الماتىدا 2020 جىلدىڭ مامىر ايىندا اشىلدى. جىل باسىنان بەرى ورتالىقتا مۇگەدەكتىگى بار 1 768 ادامعا قىزمەت كورسەتىلدى.
ال، بيىل مەگاپوليستە تاعى ءبىر ورتالىق اشۋ تۋرالى شەشىم قابىلداندى.

«ورتالىق ەستۋ قابىلەتى بۇزىلعان ادامدارعا ارنالعان. ول سۋردوتەحنيكالىق قۇرالدارمەن قامتاماسىز ەتىلگەن. مۇندا ەرەسەكتەر دە، بالالار دا كومەك الا الادى. جىل باسىنان بەرى مۇگەدەكتىگى بار 23 مىڭ الماتىلىق تەحنيكالىق وڭالتۋ قۇرالدارىمەن جانە الەۋمەتتىك قىزمەتتەرمەن قامتاماسىز ەتىلدى. جەكە وڭالتۋ باعدارلاماسىن 85%-عا دەيىن ورىنداۋ جوسپارلانىپ وتىر»، - دەدى امانات سۇلتانعازييەۆ وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگىدە.

ايتۋىنشا، سۋردولوگيالىق كومەككە مۇقتاج 1 282 ادامنىڭ 970ء-ى قامتاماسىز ەتىلگەن. ىمداۋ ءتىلى مامانىنىڭ قىزمەتتەرىن ەستۋ قابىلەتى بۇزىلعان 760 ادام پايدالانادى.