رەپرودۋكتيۆتى دەنساۋلىق دەگەنىمىز - بۇل بالا جاساۋ جانە بالا تۋۋ قابىلەتى، ءقاۋىپسىز جۇكتىلىك كەپىلى، دۇنيەگە دەنى ساۋ بالانى اكەلۋگە دەگەن سەنىمدىلىك.
بۇل تۋرالى الماتىنىڭ وڭىرلىك كوممۋنيكاسيالار قىزمەتىنىڭ بريفينگىندە PhD، دەنساۋلىق ساقتاۋ ماگيسترى، الماتى قالاسى قوعامدىق دەنساۋلىق ساقتاۋ باسقارماسىنىڭ انا مەن بالا دەنساۋلىعىن قورعاۋ ءبولىمىنىڭ باسشىسى جادىرا احمەتوۆا مالىمدەدى، دەپ حابارلايدى Almaty-akshamy.kz
وكق سپيكەرى قازاقستاندا 20 ملن-نان استام حالىق تۇراتىنىن، ونىڭ 10 ملن-نان استامى ايەلدەر ەكەنىن، 4 ملن-نان استام ايەلدەر تۋۋعا قابىلەتتى جاستا ەكەنىن جانە بالالار سانىنىڭ 6 ملن-نان استام ەكەنىن اتاپ ءوتتى.
قازىرگى كەزەڭدە الماتىداعى حالىق سانى 2،2 ملن ادام. 10 مەن 29 جاس ارالىعىنداعى جاسوسپىرىمدەر مەن جاستاردىڭ سانى 715 881 ادامدى قۇرايدى. ونىڭ ىشىندە تەك جاسوسپىرىمدەر، ياعني 15 پەن 17 جاس ارالىعىنداعى بالالار سانى 171 811 قىز جانە 114 540 ۇل.
بۇگىنگى تاڭدا الماتىدا 14 جاستار دەنساۋلىق ورتالىعى جۇمىس ىستەيدى. بۇل ورتالىقتاردىڭ نەگىزگى ماقساتى - كامەلەتكە تولماعاندار مەن جاسوسپىرىمدەرگە رەپرودۋكتيۆتى جانە پسيحيكالىق دەنساۋلىق ماسەلەلەرى بويىنشا مەديسينالىق، ەمدىك-پروفيلاكتيكالىق كومەك كورسەتۋ.
"الماتىنىڭ جاستار دەنساۋلىق ورتالىقتارىندا 116 جوعارى بىلىكتى مەديسينا ماماندارى جۇمىس ىستەيدى. ولاردىڭ قاتارىنا تەراپيەۆتتەر، گينەكولوگتار، ۋرولوگتار، پسيحولوگتار، زاڭگەرلەر جانە الەۋمەتتىك قىزمەتكەرلەر كىرەدى، ولار كوپسالالى كوماندا رەتىندە جۇمىس جاساپ، جاستار مەن جاسوسپىرىمدەرگە كەڭەس بەرەدى. ءار ماماننىڭ ءوز ءرولى بار. 2024 جىلدىڭ العاشقى 5 ايىنداعى كورسەتكىشتەرگە سايكەس، بۇل ورتالىقتاردا 27 998 جاستار مەن جاسوسپىرىمدەر كەڭەس الدى، بۇل وتكەن جىلمەن سالىستىرعاندا 4،5% - عا كوپ كورسەتكىش. جاستار مەن جاسوسپىرىمدەردىڭ دەنساۋلىعىن، اسىرەسە رەپرودۋكتيۆتى دەنساۋلىقتى نىعايتا وتىرىپ، ءبىز ولاردىڭ رەپرودۋكتيۆتى دەنساۋلىق سالاسىنداعى ساۋاتتىلىعىن ارتتىرۋىمىز كەرەك"، - دەگەن وي ايتتى ج.احمەتوۆا.
وتباسىن قۇرىپ، بولاشاقتا اتا-انا بولعىسى كەلەتىن جاستار ءۇشىن ساراپشى بارلىق مەملەكەتتىك جانە جەكە مەديسينالىق ۇيىمداردا قۇرىلعان وتباسىن جوسپارلاۋ كابينەتتەرىنە حابارلاسۋدى ۇسىنادى.
"بولاشاق اتا-انالار وزدەرى تىركەلگەن ەمحانالارداعى وسى كابينەتتەرگە بارىپ، اكۋشەر-گينەكولوگتاردان كەڭەستەر پەن ۇسىنىستار الا الادى. ارينە، ءار وتباسىنداعى باستى ماقسات- العاشقى بالاسىن دۇنيەگە اكەلۋ ەكەندىگى ءسوزسىز. سوندىقتان جاس جۇبايلاردىڭ ءوز رەپرودۋكتيۆتى دەنساۋلىعىن، سونىڭ ىشىندە بەلگىلەنگەن كلينيكالىق حاتتامالارعا سايكەس زەرتتەۋلەر مەن دياگنوستيكالىق شارالاردى جۇرگىزۋدى مۇقيات تەكسەرۋى ماڭىزدى. ءارى قاراي جاستاردىڭ گينەكولوگتار مەن رەپرودۋكتولوگتاردان كەڭەس الۋ مۇمكىندىگى بار"، - دەدى ول.
ساراپشى، ەگەر بۇرىندارى جاس وتباسىلاردىڭ وتباسىن جوسپارلاۋ كابينەتتەرىنە كەلۋى سيرەك بولعان بولسا، بۇگىندە بۇل ءۇردىس وزگەرۋدە ەكەنىن اتاپ ءوتتى. قازىرگى ۋاقىتتا رەسمي دەرەكتەر بۇل قىزمەتكە جۇگىنۋ جىلدان جىلعا وسكىپ كەلە جاتقانىن كورسەتەدى.
"جاس وتباسىلار، سونىمەن قاتار ءالى نەكەگە تۇرماعاندار دا كونسۋلتاسيالارعا ءجيى كەلە باستادى. جاس جۇبايلار وزدەرىنىڭ اتا - انا بولۋعا دايىن ەكەندىگى تۋرالى بىلگىسى كەلەدى، ىقتيمال اۋرۋلاردىڭ الدىن الىپ، دەنى ساۋ بالالاردى دۇنيەگە اكەلۋ ماقساتىندا ءبىزدىڭ ماماندارعا جۇگىنەدى"، - دەپ قوسا كەتتى ج.احمەتوۆا.
وڭ ديناميكا جاستار اراسىندا رەپرودۋكتيۆتى دەنساۋلىقتىڭ ماڭىزدىلىعىن ءتۇسىنۋدىڭ ارتقانىن كورسەتەدى دەپ اتاپ ءوتتى ساراپشى. ول بولاشاق ۇرپاقتىڭ دەنساۋلىعى كوبىنەسە اتا-انالاردىڭ وزدەرىنىڭ رەپرودۋكتيۆتى دەنساۋلىعىنا جاۋاپكەرشىلىكپەن جانە ساۋاتتىلىقپەن قاراۋىنا بايلانىستى ەكەنىن ەسكە سالا كەتتى.