2021 جىلعى 1 قاڭتاردان باستاپ جالپىعا بىردەي دەكلاراسيالاۋعا كوشۋ باستالدى.
قازاقستاندىقتاردى جالپىعا بىردەي دەكلاراسيالاۋعا 2025 جىلعا دەيىن كەزەڭ-كەزەڭىمەن كوشۋ قاجەت. بۇل تۋرالى وڭىرلىك كوممۋنيكاسيالار قىزمەتىنىڭ ءونلاين-باسپاسوز كونفەرەنسياسى بارىسىندا الماتى قالاسى مەملەكەتتىك كىرىستەر دەپارتامەنتى باسشىسىنىڭ ورىنباسارى ورىنكۇل قازييەۆا ايتتى، دەپ حابارلايدى Almaty-akshamy.kz
جالپىعا بىردەي دەكلاراسيالاۋعا كوشۋ باستالدى – 2021 جىلعى 1 قاڭتاردان باستاپ دەكلاراسيالاردى مەملەكەتتىك قىزمەتشىلەر جانە ولارعا تەڭەستىرىلگەن ادامدار، سونداي-اق ولاردىڭ جۇبايلارى ۇسىنادى. 2023 جىلعى 1 قاڭتاردان باستاپ مەملەكەتتىك مەكەمەلەر مەن كۆازيمەملەكەتتىك سەكتور قىزمەتكەرلەرى مەن ولاردىڭ جۇبايلارى دەكلاراسيالاناتىن بولادى. 2024 جىلعى 1 قاڭتاردان باستاپ زاڭدى تۇلعالاردىڭ باسشىلارى مەن قۇرىلتايشىلارى، سونداي-اق جەكە كاسىپكەرلەر مەن ولاردىڭ جۇبايلارى ءۇشىن دەكلاراسيالاۋ ەنگىزىلەدى. 2025 جىلعى 1 قاڭتاردان باستاپ – ازاماتتاردىڭ قالعان ساناتتارى ءۇشىن.
دەكلاراسيالاۋ ءراسىمى بارىنشا جەڭىلدەتىلگەن. جىلجىمايتىن مۇلىك، اۋە جانە تەڭىز كەمەلەرى، سۋدا جۇزەتىن كەمەلەر تۋرالى، قازاقستان رەسپۋبليكاسىنىڭ اۋماعىندا تىركەلگەن كولىك قۇرالدارى، ارنايى تەحنيكا جانە تىركەمەلەر تۋرالى، قازاقستان رەسپۋبليكاسىنداعى بانك شوتتارىنداعى اقشا تۋرالى، سونداي-اق قازاقستان رەسپۋبليكاسىنىڭ ەكىنشى دەڭگەيدەگى بانكتەرىنە بەرەشەك تۋرالى مالىمەتتەردى كورسەتۋ مىندەتى الىپ تاستالىندى.
مۇنداي مۇلىك تۋرالى مالىمەتتەر مەملەكەتتىك كىرىستەر ورگاندارىندا بار، سوندىقتان جەكە تۇلعالارعا بۇل مالىمەتتەردى تولتىرۋ اۋىرتپالىق تۇسىرمەيدى.
دەكلاراسيادا ق ر شەگىنەن تىس مۇلىك بولعان جاعدايدا – تۇرعىن ءۇي قۇرىلىسىنا ۇلەستىك قاتىسۋ تۋرالى شارت بويىنشا تۇرعىن عيماراتتاعى ۇلەس كورسەتىلەدى. ق ر شەگىنەن تىس قۇرىلعان زاڭدى تۇلعانىڭ جارعىلىق كاپيتالىنا قاتىسۋ ۇلەسىن، باعالى قاعازدار، تۋىندى قارجى قۇرالدارى، ينۆەستيسيالىق التىن، اۆتورلىق قۇقىق، زياتكەرلىك مەنشىك وبەكتىلەرى – وسىنىڭ ءبارىن قازاقستاندا دا، ودان تىس جەرلەردە دە كورسەتۋ قاجەت. 10 مىڭ اەك مولشەرىندەگى شەكتەن اسپايتىن قولما-قول اقشا، دەبيتورلىق جانە كرەديتورلىق بەرەشەك كورسەتىلەدى، ونى نوتاريات كۋالاندىرۋعا ءتيىس.
دەكلاراسيالار بۇگىن قاعاز تاسىعىشتا 15 شىلدەدەن كەشىكتىرمەي، ال ەلەكتروندىق تۇردە 15 قىركۇيەكتەن كەشىكتىرمەي تاپسىرىلادى. قاعاز تاسىعىشتا دەكلاراسيالار مەملەكەتتىك كىرىستەر ورگاندارىنا نەمەسە حقكو-عا كەلۋ تارتىبىمەن ۇسىنىلادى. دەكلاراسيانى ەلەكتروندى تۇردە سالىق تولەۋشىنىڭ كابينەتى ارقىلى ۇسىنۋعا بولادى (cabinet.salyk.kz)، «ەلەكتروندىق ۇكىمەت» پورتالى (egov.kz)، سونداي-اق e-Salyq Azamat ءموبيلدى قوسىمشاسى ارقىلى.
بۇدان باسقا، دەكلاراسيانى ۇسىنا وتىرىپ، جەكە تۇلعانىڭ ەلەكتروندىق سيفرلىق قولتاڭباسى بولۋى مىندەتتى ەمەس، ويتكەنى ءبىر رەتتىك SMSء-قۇپياسوز ارقىلى ەسەپتىلىككە قول قويۋ مۇمكىندىگى ىسكە اسىرىلعان.
بۇگىندە دەكلاراسيالاردى بەرۋدىڭ ەڭ تانىمال ءتاسىلى e-Sally Azamat موبيلدىك قوسىمشاسى بولىپ تابىلادى، ونىڭ كومەگىمەن ق ر بويىنشا مالىمەتتەردىڭ 52% ۇسىنىلعان. «سالىق تولەۋشىنىڭ كابينەتى» ارقىلى – 42%، «ەلەكتروندىق ۇكىمەت» پورتالى ارقىلى – 6% ۇسىنىلدى.
جالپىعا بىردەي دەكلاراسيالاۋ ەرەجەلەرىن ءتۇسىندىرۋ ءۇشىن «1414» ءبىرىڭعاي رەسپۋبليكالىق ءنومىر پلاتفورماسىندا سالىق جانە كەدەن ماسەلەلەرى بويىنشا بايلانىس ورتالىعى ىسكە قوسىلدى. سونىمەن قاتار، تولىق اقپاراتتى kgd.gov.kz رەسمي سايتىنداعى «جالپىعا بىردەي دەكلاراسيالاۋ» بولىمىنەن الۋعا بولادى.