الماتى قالاسىنىڭ وڭىرلىك كوممۋنيكاسيالار قىزمەتىندە وتكەن بريفينگتە قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ۆيسە-مينيسترى نازگۇل ساعىندىقوۆا الەۋمەتتىك كودەكستىڭ نەگىزگى باعىتتارىن ءتۇسىندىردى، دەپ حابارلايدى almaty-akshamy.kz
پرەزيدەنت قاسىم-جومارت توقايەۆتىڭ 2020 جىلعى جولداۋىندا الەۋمەتتىك كودەكستى ازىرلەۋ تاپسىرماسى بەرىلگەن بولاتىن. اعىمداعى جىلدىڭ 16 ناۋرىزىندا نورماتيۆتىك قۇقىقتىق اكت سەناتتا قابىلدانىپ، مەملەكەت باسشىسىنىڭ قاراۋىنا جىبەرىلدى.
الەۋمەتتىك كودەكستە، سپيكەر اتاپ وتكەندەي، مەملەكەتتىك الەۋمەتتىك ساياساتتىڭ ورتاق قاعيداتتارى مەن باعىتتارى بەكىتىلەتىن بولادى.
«كودەكستىڭ قابىلدانۋىمەن بەلگىلى ءبىر ومىرلىك جاعدايعا تاپ بولعان ادام قانداي الەۋمەتتىك قولداۋ شارالارى بارىن جانە ونى شەشۋدىڭ ىقتيمال جولدارىن انىقتاي الادى. كودەكستە الەۋمەتتىك قولداۋ باعىتتارىنىڭ ورنالاسۋى ادامنىڭ ومىرلىك سيكلىنە سايكەس كەلەدى. نورمالار تۋعاننان كارىلىككە دەيىن قولداۋ شارالارىمەن بەلگىلەنەدى»، - دەدى ۆيسە-مينيستر.
سونداي-اق، ونىڭ ايتۋىنشا، قۇجاتتاعى نەگىزگى نوۆەللالار اتاۋلى الەۋمەتتىك قولداۋدى كۇشەيتۋ، الەۋمەتتىك ساقتاندىرۋ جانە زەينەتاقى جۇيەسىن دامىتۋ، مۇگەدەكتەر ءۇشىن ارناۋلى الەۋمەتتىك قىزمەتتەردىڭ قولجەتىمدىلىگىن ارتتىرۋ، سيفرلىق جۇمىسپەن قامتۋ ورتالىقتارىن قۇرۋ جانە ەڭبەك نارىعىن ىرىقتاندىرۋ بولىپ تابىلادى.
كودەكس جوباسى مەن تۇجىرىمداماسىن ازىرلەۋ ءۇشىن مينيسترلىكتىڭ بازاسىندا ارنايى جۇمىس توبى قۇرىلدى. 50-دەن استام زاڭ مەن 200-گە جۋىق زاڭعا تاۋەلدى اكتىلەر زەردەلەنىپ، الەۋمەتتىك ساياسات سالاسىنداعى حالىقارالىق تاجىريبە ەسكەرىلدى. كودەكس 5 بولىمنەن جانە 21 تاراۋدان تۇرادى.
جوبانىڭ نورمالارىن ناقتىلاۋ ءۇشىن دەپارتامەنت اقپاراتتىق ناۋقان جۇرگىزىپ جاتىر. ءموبيلدى توپتار جۇمىس بەرۋشىلەر، ەڭبەك ۇجىمدارى، جەرگىلىكتى اتقارۋشى ورگاندار مەن ۇكىمەتتىك ەمەس ۇيىمداردىڭ قاتىسۋىمەن كەزدەسۋلەر وتكىزۋدە.