بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا الماتى قالاسى بويىنشا ەڭبەك جانە الەۋمەتتىك قورعاۋ كوميتەتىنىڭ دەپارتامەنت باسشىسى اسقار ايماعامبەتوۆ مالىمدەدى.
2024 جىلعى 1 قاڭتاردان باستاپ مەملەكەتتىك جاردەماقىلاردىڭ بارلىق تۇرلەرى جانە بازالىق زەينەتاقى تولەمى ق ر ۇلتتىق بانكى ايقىندايتىن ينفلياسيانىڭ بولجامدى دەڭگەيىنە سايكەس 7% – عا، جاسىنا بايلانىستى جانە ەڭبەك سىڭىرگەن جىلدارى بويىنشا زەينەتاقى تولەمدەرى 9 پايىزعا وسەدى، ياعني ينفلياسيا دەڭگەيىنەن 2% - عا كوتەرىلدى، دەپ حابارلايدى Almaty-akshamy.kz.
سپيكەردىڭ مالىمەتىنشە، بازالىق الەۋمەتتىك تولەمدەردىڭ مولشەرىن ەسەپتەۋ ءۇشىن ەڭ تومەنگى كۇنكورىس دەڭگەيى 2024 جىلدىڭ 1 قاڭتارىنان باستاپ 43 407 تەڭگەنى قۇرادى.
زاڭ بويىنشا:
– ايلىق ەسەپتىك كورسەتكىش (اەك) 3 692 تەڭگە؛
– ەڭ تومەنگى زەينەتاقى – 57 853 تەڭگە؛
– بازالىق الەۋمەتتىك تولەمدەردىڭ مولشەرىن ەسەپتەۋ ءۇشىن ەڭ تومەنگى كۇنكورىس دەڭگەيى (تكد) – 43 407 تەڭگە؛
– ەڭ تومەنگى جالاقى مولشەرى – 85 000 تەڭگە؛
– ەڭ تومەنگى مەملەكەتتىك بازالىق زەينەتاقى تولەمىنىڭ مولشەرى – 28 215 تەڭگە بولىپ بەكىتىلدى.
وسىعان بايلانىستى 2024 جىلعى 1 قاڭتاردان باستاپ جوعارىدا اتالعان كورسەتكىشتەرگە بايلانىستى الەۋمەتتىك تولەمدەر مەن مەملەكەتتىك جاردەماقىلار وسۋدە.
جاسىنا بايلانىستى جانە ەڭبەك سىڭىرگەن جىلدارى بويىنشا زەينەتاقى تولەمدەرى 9 پايىزعا وسەدى. بۇل رەتتە، 2024 جىلى جاسىنا بايلانىستى جاڭادان تاعايىندالاتىن زەينەتاقى تولەمدەرىنىڭ مولشەرىن ەسەپتەۋ ءۇشىن ەسكەرىلەتىن ەڭ جوعارى تابىس 2024 جىلعى 1 قاڭتاردان باستاپ 55 ەسەلەنگەن اەك (203060 تەڭگە) قۇرايدى.
جاسىنا بايلانىستى زەينەتاقى تولەمدەرىنە قوسىمشا مەملەكەتتىك بازالىق زەينەتاقى تولەمى تولەنەدى، ونىڭ مولشەرى زەينەتاقى جۇيەسىنە قاتىسۋ وتىلىنە بايلانىستى بولادى.
زەينەتاقى جۇيەسىنە قاتىسۋ وتىلىنە 1998 جىلعى 1 قاڭتارعا دەيىن جاساعان جۇمىس ءوتىلى، سونداي-اق جيناقتاۋشى زەينەتاقى جۇيەسىنە قاتىسۋ ءوتىلى قوسىلادى، ول جيناقتاۋشى زەينەتاقى قورلارىنا نەمەسە ءبىرىڭعاي جيناقتاۋشى زەينەتاقى قورىنا مىندەتتى زەينەتاقى جارنالارىن اۋدارۋ كەزەڭدىلىگى بويىنشا ايقىندالادى.
«الماتى قالاسى بويىنشا زەينەتاقى تولەمدەرىن ارتتىرۋ 242 مىڭ الۋشىعا جۇرگىزىلەتىن بولادى، ولاردىڭ ورتاشا زەينەتاقى تولەمى 134 مىڭ تەڭگەنى قۇرايدى (ونىڭ ىشىندە جاسىنا بايلانىستى زەينەتاقى - 93385 تەڭگە جانە بازالىق زەينەتاقى - 40711 تەڭگە)»، - دەپ ناقتىلادى اسقار ايماعامبەتوۆ.
ساراپشى قازاقستاندا بالا تۋعاندا بەرىلەتىن ءبىرجولعى جاردەماقى وتباسىنىڭ تابىسىنا قاراماستان، وتباسىندا ءبىرىنشى، ەكىنشى جانە ءۇشىنشى بالا تۋىلعاندا 38 اەك مولشەرىندە تاعايىندالادى. سايكەسىنشە 2024 جىلعى قاڭتاردان باستاپ 140 296 تەڭگەنى (38*3692 تەڭگە) قۇرايدى.
انا مەن بالانى قولداۋ جونىندەگى مەملەكەتتىك ساياسات شەڭبەرىندە وتباسىندا ءتورتىنشى جانە ودان دا كوپ بالا تۋىلعاندا ءبىرجولعى جاردەماقى 63 اەك مولشەرىندە تاعايىندالادى جانە 2024 جىلعى 1 قاڭتاردان باستاپ جاردەماقى 232596 تەڭگەنى قۇرايدى.
مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا، ونىڭ ىشىندە ارناۋلى الەۋمەتتىك قىزمەتتەر كورسەتۋ ورتالىقتارىندا تۇراتىن جانە تۇزەتۋ مەكەمەلەرىندەگى ادامدار ءۇشىن مەملەكەتتىك الەۋمەتتىك جاردەماقىلاردىڭ مولشەرى الەۋمەتتىك كودەكستىڭ 177 جانە 236-باپتارىندا كوزدەلگەن مولشەردە بەلگىلەنەدى جانە 2024 جىلعى 1 قاڭتاردان باستاپ ەتكك مولشەرىنىڭ ۇلعايۋىنا بايلانىستى كوتەرىلەدى (43407 تەڭگە).
«الماتى قالاسى بويىنشا بۇل وزگەرىس بارلىق ساناتتاعى مۇگەدەكتىگى بويىنشا 39384 كاپ الۋشىسىنا، اسىراۋشىسىنان ايرىلۋ جاعدايى بويىنشا 13553 جاردەماقى الۋشىعا قاتىستى بولادى"، - دەپ اتاپ ءوتتى سپيكەر.
بۇدان باسقا، اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلار 2024 جىلعى 1 قاڭتاردان باستاپ ەتكد مولشەرىنىڭ ۇلعايۋىنا بايلانىستى (43407 تەڭگە) كوتەرىلەدى. اسىراۋشىسىنان ايرىلۋ بويىنشا كاپ مولشەرى قايتىس بولعان (قايتىس بولعان) اسىراۋشىنىڭ اسىراۋىنداعى ادامداردىڭ سانىنا، قايتىس بولۋ سەبەبىنە جانە ەڭ تومەنگى كۇنكورىس دەڭگەيىنە بايلانىستى بولادى.
ەگەر وتباسىندا:
- وتباسىنىڭ ەڭبەككە قابىلەتسىز ءبىر مۇشەسى بولعان كەزدە – 39935 تەڭگە (تكد 0،92)؛
- ەكى ەڭبەككە قابىلەتسىز مۇشەسى بولعان كەزدە – 73792 تەڭگە (تكد 1،70)؛
- ءۇش ەڭبەككە قابىلەتسىز مۇشەسى بولعان كەزدە – 97666 تەڭگە (تكد 1،85)؛
- ءتورت ەڭبەككە قابىلەتسىز مۇشەسى بولعان كەزدە – 112859 تەڭگە (تكد 1،96)؛
- بەس ەڭبەككە قابىلەتسىز مۇشەسى بولعان كەزدە – 119370 تەڭگە (تكد 2،03) تاعايىندالادى؛
- وتباسىنىڭ ەڭبەككە قابىلەتسىز التى جانە ودان دا كوپ مۇشەسى بولعان كەزدە جاردەماقىنىڭ مولشەرى ءارقايسىسىنا (130221 تەڭگە) 3،00 تكد-نەن تەڭ ۇلەسى رەتىندە ەسەپتەلەدى؛
- اتا-اناسىنىڭ ەكەۋىنەن دە ايىرىلعان جاعدايدا جەتىم بالالارعا اسىراۋشىسىنان ايىرىلۋ جاعدايى بويىنشا ايلىق جاردەماقى ءاربىر بالاعا 66847 تەڭگە (1،54 تكد) مولشەرىندە،
- وتباسىنىڭ ەڭبەككە قابىلەتسىز مۇشەلەرىنە – 26913 تەڭگە (0،62 تكد) مولشەرىندە، ءبىراق وتباسىنىڭ ەڭبەككە قابىلەتسىز بارلىق مۇشەلەرىنە 2،92 تكد (126749 تەڭگەدەن) اسپايتىن مولشەردە تاعايىندالادى.
«بۇگىنگى تاڭدا الماتى قالاسىنىڭ بارلىق 360 مىڭ زەينەتاقى جانە الەۋمەتتىك تولەم الۋشىلارىنا 2024 جىلدىڭ 1 قاڭتارىنا دەيىن اقپاراتتىق جۇيەلەردەگى دەرەكتەر نەگىزىندە زەينەتاقى مەن جاردەماقىلاردى ارتتىرۋ تولىعىمەن اياقتالادى، قانداي دا ءبىر قۇجاتتاردى ۇسىنۋ تالاپ ەتىلمەيدى»، - دەپ تولىقتىردى اسقار ايماعامبەتوۆ.