الماتىلىقتاردى ءۇي قۇجاتتارىن زاڭداستىرامىن دەپ الداعان ازامات ۇستالدى

ول ءوزىن قۇرىلىس كومپانيالارىنىڭ ءبىرىنىڭ ينجەنەرى رەتىندە كورسەتكەن.

ءۇيدى قايتا قۇرۋدى زاڭداستىرىپ بەرەمىن دەپ ۋادە بەرگەن ازامات الماتىلىقتاردى الداعان، دەپ حابارلايدى Almaty-akshamy.kz Polisia.kz-كە سىلتەمە جاساپ.

ماسەلە 25 جاستاعى يا.ەسىمدى ازامات جايىندا بولىپ وتىر.

«ءىس جۇزىندە وعان ەش قاتىسى بولماسا دا، ءوزىن قۇرىلىس كومپانيالارىنىڭ ءبىرىنىڭ ينجەنەرى رەتىندە كورسەتىپ، ازاماتتاردىڭ سەنىمىنە قيانات جاساپ، ولارعا تۇرعىن ۇيلەرىن قايتا قۇرۋدى زاڭداستىرۋعا ۋادە بەردى. بۇل قىزمەتى ءۇشىن ەر ادام «كليەنتتەردەن» 100 مىڭ تەڭگەدەن 300 مىڭ تەڭگەگە دەيىن العان. تەرگەۋدىڭ وسى كەزەڭىندە وسىعان ۇقساس ءۇش ەپيزود انىقتالدى. بۇل قىلمىستىق ارەكەتتىڭ سەريالىق بولۋى دا جوققا شىعارىلمايدى، وسىعان بايلانىستى يا.ەسىمدى ازاماتتىڭ زاڭسىز ارەكەتتەرىنەن زارداپ شەككەندەردىڭ مىنا تەلەفون نومىرلەرى ارقىلى حابارلاسۋلارىن سۇرايمىز: 8-707-447-07-50؛ 8-747-699-70-02 جانە 8-778-622-02-19»، – دەدى ناۋرىزباي اۋداندىق پوليسيا باسقارماسىنىڭ باستىعى ديدار احانوۆ.

پوليسيادا كۇدىكتىنىڭ ارەكەتتەرى ق ر قك-نىڭ 190-بابى 3-بولىگىنىڭ 4-تارماعى بويىنشا تەرگەۋمەن سارالانعانىن اتاپ ءوتتى.