الماتىدا قىزمەت ەتەتىن پاترۋلدىك پوليسيا قىزمەتكەرى مەرەي سارسەبەك ءوزىنىڭ كاسىبيلىگى، سىپايىلىعى جانە ادامگەرشىلىگىمەن قالا تۇرعىندارىنىڭ ريزاشىلىعىنا بولەنىپ ءجۇر. ونىڭ زەيىندى جۇمىسى مەن ادال قىزمەتى الەۋمەتتىك جەلىدە ەرەكشە تالقىلانىپ، العىستار ايتىلۋدا.
مەرەي سارسەبەك ىشكى ىستەر ورگاندارىندا 2020 جىلدان بەرى جۇمىس ىستەپ كەلەدى، قازىرگى ۋاقىتتا ۆزۆود كومانديرى بولىپ تابىلادى. ونىڭ جوعارى كاسىبيلىگى مەن ادالدىعى جاس ماماندارعا ۇلگى بولۋدا. قازىرگى تاڭدا ول ءوز تاجىريبەسىن جاس پوليسەيلەرگە ۇيرەتىپ، ازاماتتاردى قورعاۋ ىسىندە تالىمگەر رەتىندە قىزمەت ەتۋدە.
الماتى قالالىق پد جەرگىلىكتى پوليسيا قىزمەتى باسقارماسىنىڭ باسشىسى سەرىك شۋمايەۆ مەرەيدىڭ بۇل قاسيەتتەرىن ءىىم-نىڭ ارداگەرى بولعان اكەسىنەن ۇيرەنگەنىنە سەنىمدى ەكەنىن اتاپ ءوتتى.
جاڭا جىل ءتۇنى مەرەي سارسەبەك كوپتەگەن ارىپتەستەرى سياقتى قالاداعى ءتارتىپ پەن قاۋىپسىزدىكتى قامتاماسىز ەتۋ ءۇشىن جۇمىس ورنىندا بولادى. ونىڭ سوزىنشە، جۇمىستاعى جەتىستىگىنىڭ سىرى – سىپايىلىق، زەيىندىلىك، جاۋاپكەرشىلىك جانە ادامدارعا قۇرمەتپەن قاراۋ.
"ەڭ باستىسى – ازاماتتاردىڭ العىسىن ەستۋ. بۇل – ءبىزدىڭ جۇمىسىمىزدىڭ نەگىزگى ماقساتى جانە مەنىڭ جۇرەگىمدى جىلىتادى،" – دەدى مەرەي سارسەبەك.