جاز باستالىسىمەن تاۋ ەتەگىندەگى اۋدان تۇرعىندارى اۋىزسۋدان تارشىلىق كورەدى.
ولاردىڭ ايتۋىنشا، بۇل ماسەلە جىل سايىن قايتالانادى. جۇرت بۇعان قۇرىلىس جۇرگىزىپ جاتقان كومپانيالاردى كىنالاپ وتىر.«كامەنسكوە پلاتو» شاعىن اۋدانىنىڭ تۇرعىندارى جاز شىعىسىمەن سۋسىز قالادى، دەپ حابارلايدى Almaty-akshamy.kz.
24.kz ارناسىنىڭ اقپاراتىنا سۇيەنسەك، مۇنداعى جۇرتشىلىق كۇنىمىز سۋدى اڭدۋمەن وتەدى دەيدى. بۇل ايماققا سۋ كامەنسكوە ۇستىرتىندەگى 3 ەسكى ۇڭعىما ارقىلى كەلەدى. ماماندار سۋ قىسىمىنىڭ تومەندەۋىنىڭ باستى سەبەبىن حالىق سانىنىڭ كۇرت وسۋىمەن بايلانىستىرادى. ماسەلەن، ۇڭعىماداعى سۋ دەڭگەيى 2،5 ەسەگە ازايىپ كەتكەن.
«ءيا، ولار سولاي دەپ ايتتى بىلتىر قىستا. رەجيممەن بەرەمىز دەدى، ءبىراق ەشقانداي دا رەجيمدەرى جوق. ەشقانداي دا، وتىرىك. تاڭەرتەڭ بەرەمىز دەيدى. تاڭەرتەڭ جوق. كەشكە بەرەمىز دەيدى. كەشكە جوق. سوندا بىزدەر سۋىمىزعا دا تۇسە المايمىز، ىشەتىن دە سۋىمىز جوق. وتىرىك ايتادى، ەشقانداي دا بۇل جەردە گرافيك جوق»، - دەيدى قالا تۇرعىنى مايرا اسقاروۆا.
جەرگىلىكتى بيلىك وكىلدەرىنىڭ ايتۋىنشا، وسى اۋماقتى سۋمەن قامتاماسىز ەتۋ ءۇشىن 4 ۇڭعىما مەن سۋ رەزەرۆۋارىنىڭ جوباسى ازىرلەنىپ جاتىر. بۇل كامەنسكوە ءۇستىرتى، كولساي، مەرەيتوي جانە مۇزتاۋ شاعىن اۋداندارىن سۋمەن قامتاماسىز ەتەدى. وتكەن ايدا باستالعان جۇمىس وسى جىلدىڭ سوڭىنا دەيىن اياقتالادى دەپ جوسپارلانعان.
«جالپى كامەنسكوە پلاتو ىقشام اۋدانىندا بۇگىنگى تاڭدا رەسمي مالىمەتتەر بويىنشا 9 مىڭعا جۋىق ادام تۇرادى. ەندى باسقا دا مالىمەتتەر بويىنشا 12 مىڭنان 15 مىڭعا دەيىن جۋىق ازامات تۇرادى. ونىڭ بۇگىنگى تاڭدا جارتىسى عانا الماتى سۋ جەلىلەرىنە قوسىلعان. سوڭعى 5-6 جىلداردا سول قوسىلعان ابونەمەنتتەردىڭ جارتىسى جازدىڭ كەزىندە سۋ جەتىسپەۋشىلىگىن، ەندى سۋ جەتىسپەۋشىلىك پروبلەماسى كۇندەلىكتى جىل سايىن وزدەرىنىڭ الدارىنان شىعادى»، - دەيدى مەدەۋ اۋدانىنىڭ اكىمى ەركەبۇلان ورازالين.
بوستاندىق اۋدانىنىڭ تۇرعىندارىنىڭ دا سۋ ماسەلەسىن كوتەرگەلى ءبىراز بولدى. وسى ايدىڭ باسىندا اپتاپ ىستىقتا رەميزوۆكاداعى بىرنەشە تۇرعىن ءۇي مەن ساياجاي كەشەندەرى سۋدان ابدەن تاشپىلىق كوردى. باستى سەبەپ: سۋ سورعىلار ەسكىرىپ كەتكەن. قۋاتى جەتپەيدى. بۇل اۋماقتىڭ سۋىنا «ورحان» سەرىكتەستىگى جاۋاپتى. مۇنداعى جۇرتشىلىق جاعدايدىڭ جاقسى جاققا وزگەرەتىنىنە سەنبەيدى. سوندىقتان بيلىكتەن وزدەرىن ورتالىقتاندىرىلعىن سۋ قۇبىرىنا قوسۋدى سۇراپ وتىر.
«مۇنداي ماڭىزدى كاسىپورىنداردىڭ ءبارى مەملەكەت مەنشىگىندە بولۋى كەرەك دەپ ەسەپتەيمىز. ال مەملەكەت تىكەلەي حالىق الدىندا جاۋاپتى بولۋى كەرەك. جەكە كومپانيالاردىڭ ءجونى مۇلدەم بولەك. ولاردىڭ ينۆەستيسيا سالاتىنى بار، سالمايتىنى دا بار. كوبى بىرنەشە جىل بۇرىن جەكەشەلەندىرىپ العان كەزدە قانداي بولدى. سول كۇيدە ۇستاپ كەلەدى. بۇل جەردەگى «ورحان» ءدال سولاردىڭ قاتارىندا»، - دەيدى قالا تۇرعىنى ءاسيا ءداميتوۆا.
وزدەرىنىڭ مىندەتىنە سالعىرت قاراعان جەكە كومپانيالاردىڭ كەسىرىنەن ەرمەنساي، اسقارتاۋ، اقتوبە شاعىن اۋداندارى مەن رەميزوۆكا، كۋرورتنوە جانە دوستىق دەپ اتالاتىن باۋ-باقشا سەرىكتەستىكتەرى دە سۋعا ءزارۋ. ولاردىڭ مەنشىگىندە 50 شاقىرىمعا جۋىق سۋ قۇبىرى جانە 25 شاقىرىم كارىز جۇيەسى بار. تۇرعىندارمەن كەزدەسكەن اكىمدىك پەن مەكەمە وكىلدەرى كەلىسە وتىرىپ، ماسەلەنى كوپ ۇزاتپاي شەشەمىز دەپ تاراستى. ال جۇرتشىلىقتىڭ كۇتكەننەن باسقا امالى جوق.