23 جاستاعى جىگىت 10 كۇن ىشىندە ءتورت رەت بوتەننىڭ مۇلكىن ۇرلاعان.
قالتا ۇرىسى الماتىلىقتاردى مونشادا توناپ جۇرگەن، دەپ حابارلايدى Polisia.kz.
اتالعان دەرەكتەر بويىنشا قىلمىستىق ىستەر قوزعالدى.
«ق ر قپك-نىڭ 128-بابىنا سايكەس، ق ر قك-نىڭ 188-بابى 3-بولىگىنىڭ 2،3-تارماعى – زاڭسىز كىرۋ ارقىلى بوتەننىڭ مۇلكىن بىرنەشە رەت جىمقىرۋ بويىنشا قىلمىستىق قۇقىق بۇزۋشىلىق جاسادى دەگەن كۇدىكپەن 23 جاستاعى ك.ەسىمدى ازامات ۇستالدى. تەرگەۋ بارىسىندا كۇدىكتىنىڭ اۋەزوۆ اۋدانىنداعى مونشا كەشەندەرىندە عانا ۇرلىق جاساعاندىعى انىقتالدى. ول جاسىرىن تۇردە ءتۇرلى ماركالى ۇيالى تەلەفونداردى ۇرلاپ، كەيىن وقيعا ورنىنان بوي تاسالاعان»، – دەدى اۋەزوۆ اۋداندىق پوليسيا باسقارماسىنىڭ باستىعى ۇلان ءابىلقايىر.
كۇدىكتى ۋاقىتشا ۇستاۋ يزولياتورىنا قامالدى. پوليسيا قىزمەتكەرلەرى كۇدىكتىنىڭ وسىعان ۇقساس باسقا دا قىلمىستارعا قاتىسى بار-جوعىن انىقتاۋدا. ءىستىڭ تولىق جانە جان-جاقتى تەرگەۋىن قامتاماسىز ەتۋگە باعىتتالعان ءبىرقاتار تەرگەۋ ارەكەتتەرى جۇرگىزىلۋدە، ناتيجەسىندە اتالعان قىلمىستىق ءىس سوتقا جولداناتىن بولادى.