وڭىرلىك كوممۋنيكاسيالار قىزمەتىنىڭ الاڭىندا جەڭىلدەتىلگەن يپوتەكالىق نەسيەلەۋگە ارنالعان بريفينگ ءوتتى.
الماتى قالاسى "وتباسى بانكى" اق فيليالىنىڭ ديرەكتورى داناگۇل ءتۇسىپوۆا بيىل ەلىمىزدە 5 000-عا جۋىق وتباسىنا نەسيە بەرۋدىڭ جوسپارلانىپ وتىرعانىن ايتتى، دەپ حابارلايدى Almaty-akshamy.kz.
ول "باقىتتى وتباسى" باعدارلاماسى بويىنشا قاتىسۋشىلاردىڭ ءتىزىمى قالىپتاسقانىن ەسكە سالدى. ىرىكتەۋدىڭ نەگىزگى كريتەرييلەرى جەرگىلىكتى اكىمدىكتە كەزەككە قويۋ كۇنى جانە قويىلىم ساناتى بولدى. باعدارلامانىڭ بارلىق قاتىسۋشىلارى ءوز مارتەبەسىن otbasybank.kz. پورتالىنداعى جەكە كابينەتتەرىنەن بىلەدى.
"قازاقستاندىق وتباسىلاردى جەڭىلدەتىلگەن شارتتارمەن نەسيەلەندىرۋگە بيىل رەسپۋبليكالىق بيۋدجەتتەن 51 ملرد تەڭگە ءبولىندى. اتالمىش قاراجات "وتباسى بانكىنە" ءتۇستى. بۇل قاراجات اياسىندا 5000 جۋىق وتباسى نەسيەلەندىرىلەتىن بولادى”، - دەدى د.ءتۇسىپوۆا.
ق ر ۇكىمەتىنىڭ 2022 جىلعى 23 قىركۇيەكتەگى قاۋلىسىمەن بەكىتىلگەن تۇرعىن ۇي-كوممۋنالدىق ينفراقۇرىلىمدى دامىتۋدىڭ 2026 جىلعا دەيىنگى تۇجىرىمداماسىنا سايكەس باعدارلاما شارتتارىنا ءبىرقاتار وڭ وزگەرىستەر ەنگىزىلدى.
ەندى «باقىتتى وتباسى» باعدارلاماسىنا كوپ بالالى وتباسىلار مەن مۇمكىندىگى شەكتەۋلى بالالاردى تاربيەلەپ وتىرعان وتباسىلارمەن قاتار، «جەتىم بالالار مەن اتا-انا قامقورلىعىنسىز قالعان بالالار» سونداي-اق «I جانە II توپتاعى مۇگەدەكتەر» ساناتتارى بويىنشا تۇرعىن ءۇي كەزەگىندە تۇرعان قازاقستاندىقتار قاتىسا الادى. جاڭا قوسىلعان ساناتتار بويىنشا «باقىتتى وتباسى» باعدارلاماسىنا قاتىسۋشىلار ءوز وتىنىشتەرىن جاڭا بايقاۋ جاريالانعان ۋاقىتتا جولداي الادى.
“تاعى ءبىر جاعىمدى جاڭالىق – «باقىتتى وتباسى» باعدارلاماسىندا تابىسقا شەكتەۋ قويىلمايدى. بۇعان دەيىن وتباسى مۇشەلەرىنىڭ سوڭعى التى ايداعى تابىسى ەڭ تومەنگى كۇنكورىس دەڭگەيىنىڭ 3،1 ەسەلەنگەن مولشەرىنەن، ياعني 115 905 تەڭگەدەن اسپاۋى كەرەك دەگەن تالاپ بار بولاتىن. مىسالى، كوپ بالالى وتباسى وتاعاسىنىڭ جالاقىسى بەلگىلەنگەن نورمادان 200 تەڭگەگە اسىپ كەتسە، بۇل وتباسى قولجەتىمدى نەسيەگە قول جەتكىزە المايتىن”، - دەپ ءتۇسىندىردى د.ءتۇسىپوۆا.
سونداي-اق، «باقىتتى وتباسى» باعدارلاماسى قاتىسۋشىلاردى نەسيەنىڭ ماكسيمالدى سوماسىمەن شەكتەمەيتىن بولادى. وسىعان دەيىن ايماققا بايلانىستى ول 10 ميلليوننان 15 ميلليون تەڭگەگە دەيىن عانا بولاتىن. ەندى نەسيە سوماسى پاتەر قۇنىنا نەگىزدەلەتىن بولادى جانە تۇرعىن ءۇيدىڭ 1 شارشى مەترىنىڭ باعاسىنان قالىپتاسادى.
قابىلدانعان تۇجىرىمداماعا سايكەس، تازا ارلەۋدەگى تۇرعىن ءۇيدىڭ 1 ش.م. ءۇشىن كەلەسىدەي باعا پارامەترلەرى بەلگىلەنگەن:
استانا، الماتى قالالارىندا جانە ولاردىڭ ماڭايىنداعى اۋدانداردا 290 مىڭ تەڭگەگە دەيىن؛
اتىراۋ جانە ماڭعىستاۋ وبلىستارىندا 240 مىڭ تەڭگەگە دەيىن؛
شىمكەنت قالاسىندا، قوستاناي، تۇركىستان، قاراعاندى جانە ۇلىتاۋ وبلىستارىندا 220 مىڭ تەڭگەگە دەيىن؛
شىعىس قازاقستان، باتىس قازاقستان، قىزىلوردا جانە اباي وبلىستارىندا 200 مىڭ تەڭگەگە دەيىن؛
اقتوبە، اقمولا، الماتى، پاۆلودار، سولتۇستىك قازاقستان، جامبىل جانە جەتىسۋ وبلىستارىندا 180 مىڭ تەڭگەگە دەيىن.
الەۋمەتتىك تۇرعىن ءۇي 3-4 جايلىلىق كلاسىنا سايكەس كەلەتىن جانە پاتەردىڭ ەڭ ۇلكەن اۋدانى 80 شارشى مەتردەن اسپايتىن بولادى.
جىلجىمايتىن مۇلىك قارىز الۋشى تۇرعىن ءۇي كەزەگىندە تۇرعان ايماقتان ساتىپ الىنۋى ءتيىس.
“تاعى ءبىر ماڭىزدى اقپارات، ەندى «باقىتتى وتباسى» باعدارلاماسى بويىنشا جەرگىلىكتى اكىمدىكتەر ارقىلى سالىنعان الەۋمەتتىك نەسيەلىك تۇرعىن ۇيلەردى عانا ساتىپ الۋعا بولادى"، - دەپ ناقتىلادى سپيكەر.
ونى otbasybank.kz پورتالىنان تاڭداۋعا بولادى. تۇرعىن ءۇيدى تاڭداۋعا نەمەسە وڭىردە ءۇيدىڭ قولدانىسقا بەرىلۋىن كۇتۋگە (ەگەر ءوتىنىش بەرگەن ۋاقىتتا پورتالدا ساتىپ الۋعا شىعارىلعان باسپانا بولماسا) باعدارلاما قاتىسۋشىسىنا 2023 جىلدىڭ اقپان ايىنىڭ سوڭىنا دەيىن ۋاقىت بەرىلەدى. وسى ۋاقىتقا دەيىن قاتىسۋشىنىڭ ءوتىنىشى ساقتالادى.
“باقىتتى وتباسى” باعدارلاماسى بويىنشا پايىزدىق مولشەرلەمە وزگەرىسسىز، جىلدىق 2% مولشەرىندە قالادى، ەڭ تومەنگى باستاپقى جارنا – 10%. نەسيەنىڭ ماكسيمالدى مەرزىمى – 20 جىلعا دەيىن. نەسيە الۋ ءۇشىن باعدارلاماعا قاتىسۋشىلار تولەم قابىلەتتىلىگىن راستاۋلارى قاجەت.
ايتا كەتەيىك، “باقىتتى وتباسى” باعدارلاماسى جۇزەگە اسىرىلعان ءۇش جىل ىشىندە 14 700 قازاقستاندىق وتباسى قونىس تويىن تويلادى. تۇجىرىمداماعا سايكەس، ەلىمىزدە جەڭىلدەتىلگەن نەسيەلىك تۇرعىن ءۇي باعدارلامالارى “2-10-20” («باقىتتى وتباسى» باعدارلاماسى) جانە “5-10-20” («شاڭىراق» باعدارلاماسى) اياسىندا جۇزەگە اسىرىلاتىن بولادى.
“5-10-20” باعدارلاماسى بويىنشا جەرگىلىكتى اكىمدىكتەردە باسپانا كەزەگىندە تۇرعان ازاماتتاردىڭ بارلىق ساناتتارى پاتەر الا الادى. تابىس بويىنشا شەكتەۋلەر بولمايدى. باستىسى باعدارلاماعا قاتىسۋشىلار تولەم قابىلەتتىلىگىن راستاۋلارى قاجەت. باعدارلاما بويىنشا جەرگىلىكتى اكىمدىكتەر ارقىلى سالىنعان الەۋمەتتىك نەسيەلىك تۇرعىن ۇيلەردى عانا ساتىپ الۋعا بولادى.