2026 جىلى 1 قاڭتاردان باستاپ كەمىندە بەس جىل بويى ءمامس جۇيەسىنە تۇراقتى تۇردە جارنا تولەپ كەلگەن الماتى تۇرعىندارى تولەم ۋاقىتشا توقتاتىلعان جاعدايدا دا التى اي بويى ساقتاندىرىلعان مارتەبەسىن ساقتاي الادى.
وڭىرلىك كوممۋنيكاسيالار قىزمەتى الاڭىندا «الەۋمەتتىك مەديسينالىق ساقتاندىرۋ قورى» كەاق الماتى قالالىق بولىمشەسىنىڭ ديرەكتورى مۇحامەدجان ءىلياس وسىلاي دەدى. جاڭا نورما اسىرەسە، جۇمىس ورنىن اۋىستىرعان جالدامالى قىزمەتكەرلەرگە كەرەك، ءبىراق ول جارنا تولەۋشىلەردىڭ بارلىق ساناتىن بىردەي قامتيدى ەكەن.
«ياعني، جۇمىسىنان ايىرىلعان نەمەسە ۋاقىتشا قارجىلىق قيىندىققا تاپ بولعان ازاماتتار مەديسينالىق كومەكسىز قالمايدى، بۇرىنعىداي ءمامس اياسىندا قىزمەت الا بەرەدى. ءبىراق تابىسى قايتا قالپىنا كەلگەننەن كەيىن وتكەن ايلارداعى بەرەشەگىن وتەۋى كەرەك»، – دەدى ول.
ءقازىر «ساقتاندىرىلعان» مارتەبەسى تولەم توقتاتىلعاننان كەيىن ءۇش اي بويى ساقتالادى. بۇل نورما جارنانى تولەۋ ۇزاقتىعىنا قاراماستان ءارى قاراي دا قولدانىستا بولادى. ساقتاندىرىلعان مارتەبەنى العاش رەت العاندار بۇرىنعىداي 12 ايعا جارنا تولەيدى. سپيكەردىڭ ايتۋىنشا، بۇل وزگەرىستەر ازاماتتاردىڭ الەۋمەتتىك جاعىنان قورعالۋىن ارتتىرىپ، مەديسينالىق ساقتاندىرۋ جۇيەسىنەن ۋاقىتشا شىعىپ قالۋ ءقاۋپىن ازايتۋعا باعىتتالعان.
سونداي-اق، 2026 جىلدان باستاپ ءمامس جۇيەسىندە ساقتاندىرۋ مودەلىنىڭ قارجىلىق تۇراقتىلىعى مەن ادىلدىگىن ارتتىرۋعا باعىتتالعان ءبىراز وزگەرىس ەنگىزىلەدى. اتاپ ايتقاندا، جارنانى ەسەپتەۋ ءۇشىن تابىستىڭ جوعارعى شەگى ۇلعايتىلادى: • قىزمەتكەرلەر ءۇشىن – 20 ەڭ تومەنگى جالاقىعا دەيىن، • جۇمىس بەرۋشىلەر ءۇشىن – 40 ەڭ تومەنگى جالاقىعا دەيىن. قازىرگى تاڭدا بۇل شەك 10 ەڭ تومەنگى جالاقى بولىپ وتىر. سپيكەردىڭ ايتۋىنشا، شەكتى مولشەردىڭ وزگەرۋى وسى جۇيەدەگىلەرگە قارجىلىق جۇكتەمەنى تەڭەستىرۋگە مۇمكىندىك بەرەدى، سەبەبى ءقازىر جوعارى تابىسى بار ازاماتتار جارنانى سالىستىرمالى تۇردە از تولەيدى.
بۇل وزگەرىس جىل سايىن شامامەن 200 ملرد تەڭگەدەي قوسىمشا قارجى تارتۋعا جول اشپاق. سونىمەن قاتار، اتالعان وزگەرىستەر دەنساۋلىق ساقتاۋ قىزمەتىنە ءبارىنىڭ ءادىل تۇردە قولى جەتىپ، مەملەكەت، جۇمىس بەرۋشىلەر مەن ازاماتتاردىڭ ءمامس جۇيەسىنە تەڭدەي قاتىسۋىنا نەگىزدەلگەن ءبىرىڭعاي مەديسينالىق كومەك پاكەتىن قالىپتاستىرۋ ءۇشىن قولعا الىنىپ جاتقانى ايتىلدى.