الماتىلىقتار قىتايلىق ەكپەنى الۋىنا بولادى

نۇر-سۇلتان مەن الماتى ەمحانالارىنا قىتايدىڭ Sinopharm كومپانياسىنىڭ Vero Cell ۆاكسيناسى جەتكىزىلدى.

الماتى قالاسى قوعامدىق دەنساۋلىق باسقارماسىنىڭ مالىمەتىنشە، الماتىدا 10 مىڭ دوزا ۆاكسينا بار. وسى اپتادا تاعى 35 000 دوزا قالا تۇرعىندارىنا قولجەتىمدى بولادى، دەپ حابارلايدى Almaty-akshamy.kz

«ءقازىر Vero Cell ۆاكسيناسى قالالىق ەمحانالارعا جەتكىزىلدى. اپتا ىشىندە قالاداعى بارلىق ەمحانا Vero Cell ۆاكسيناسىمەن قامتاماسىز ەتىلەدى. ۆاكسينانىڭ قاي ورتالىقتا بار ەكەنىن تەلەمەديسينا ورتالىعىنىڭ  1312 نومىرىنە حابارلاسىپ بىلۋگە بولادى»، – دەلىنگەن باسقارما تاراتقان اقپاراتتا.

سونداي-اق، ۆاكسينا بۇگىن نۇر-سۇلتانعا دا جەتكىزىلدى. قالا اكىمدىگىنىڭ حابارلاۋىنشا، ۆاكسينا قالا ەمحانالارىنا، ولارعا بەكىتىلگەن ساۋدا ويىن-ساۋىق ورتالىقتارى مەن ساۋدا ۇيلەرىنە بولىنەدى.

«ەكپەلەر ۆاكسيناسيا پۋنكتتەرىنە جەتكىزىلگەننەن كەيىن قولدانىسقا ەنگىزىلەدى. ءبىرىنشى كەزەكتە ۆاكسينالار مەديسينالىق ۇيىمدارعا قاراستى ەگۋ پۋنكتتەرىنە جەتكىزىلەدى. ساۋدا ورتالىقتارىنىڭ ەگۋ پۋنكتتەرىنە ۆاكسينا ءبىر تاۋلىك ىشىندە بولادى»، – دەدى قالالىق دەنساۋلىق ساقتاۋ باسقارما باسشىسىنىڭ ورىنباسارى ءاليا رۇستەموۆا.

Vero Cell ۆاكسيناسىن 18 جاسقا تولعان ادامدارعا سالۋ ۇسىنىلعان. Vero Cell ۆاكسيناسىنىڭ ءبىر دوزاسى – 0،5 ميلليليتر. ۆاكسينانىڭ ەكى دوزاسىن سالدىرۋ ۇسىنىلادى. ەكەۋىنىڭ اراسى 3-4 اپتا نەمەسە 21-28 كۇن بولۋى قاجەت.