الماتىدا ەكولوگيالىق جاعدايدى جاقسارتۋ جانە قالانى كوگالداندىرۋ ماقساتىندا رەسپۋبليكالىق «تازا قازاقستان» باعدارلاماسى مەن «الماتى – ءبىزدىڭ ورتاق ءۇيىمىز» قالالىق ناۋقانى اياسىندا «جارقىن كۇز» اتتى كۇزگى اكسيا ءوتىپ جاتىر، دەپ حابارلايدى aqshamnews.kz
بۇل اكسيا ەكولوگيالىق جاعدايدى جاقسارتۋعا جانە قالانى كوگالداندىرۋعا باعىتتالعان. «جارقىن كۇز» اكسياسى قالا تۇرعىندارىنا كوشەلەردى تازالاپ، 10 مىڭنان استام اعاش پەن بۇتا كوشەتتەرىن وتىرعىزۋعا مۇمكىندىك بەردى.
تاڭەرتەڭنەن باستاپ الماتىلىقتار بەلسەندى تۇردە كوشەتتەر وتىرعىزىپ، ۇيلەرىنىڭ ماڭىندا، كوشە بويىندا جانە قالانىڭ ساياباقتارىندا جاڭا جاسىل ايماقتار قۇرۋعا اتسالىستى. بۇگىنگى ەكولوگيالىق اكسياعا 10 مىڭنان استام قالا تۇرعىنى قاتىسىپ، 300-دەن استام تەحنيكا مەن 1755 كوممۋنالدىق قىزمەتكەر جۇمىلدىرىلدى.
اۋقىمدى تازالىق جۇمىستارى بارىسىندا رەكرەاسيالىق ايماقتار، ساياباقتار، سكۆەرلەر جانە اۋلا اۋماقتارى تازارتىلىپ، شامامەن 4 مىڭ تەكشە مەتر قوقىس جينالدى. جينالعان قوقىس قالا اكىمدىگىنىڭ كۇشىمەن پوليگوندارعا شىعارىلدى.
ءىس-شارانىڭ نەگىزگى جەتىستىگى – 10 مىڭنان استام اعاش وتىرعىزۋ. وتىرعىزىلعان اعاشتار اراسىندا الما اعاشى، قاراعاش، اكاسيا، ۇيەڭكى، شەگىرشىن سەكىلدى تۇرلەر بار. بۇل اعاشتار ALA پاركىنە، گاگارين داڭعىلى بويىنداعى بۋلۆارعا، الاتاۋ اۋدانىنا، جەلتوقسان ساياباعىنا، كوكجيەك شاعىن اۋدانىنا جانە باسقا دا ورىندارعا وتىرعىزىلدى.
اكسيا وتكەن ۋچاسكەلەردە مادەني-ويىن-ساۋىق باعدارلامالارى دا ۇيىمداستىرىلدى.