زاڭسىز ساقتالعان قارۋ-جاراق، وق-دارىلەر مەن جارىلعىش زاتتاردى ءوز ەركىمەن تاپسىرۋ بويىنشا اۋقىمدى ناۋقان باستالدى.
بۇل تۋرالى الماتى پوليسياسى مالىمدەدى، دەپ حابارلايدى Almaty-akshamy.kz.
«ءوز ەركىمەن تاپسىرۋ اقشالاي سىياقى ءۇشىن جۇزەگە اسىرىلادى. ىشكى ىستەر ورگاندارىندا تىركەلمەگەن كەز كەلگەن قارۋ زاڭسىز جانە تاپسىرىلۋعا جاتادى. كەز كەلگەن مىلتىق، تەگىس ۇڭعىلى، تراۆماتيكالىق اتىس قارۋى اۋماقتىق پوليسيا باسقارماسىنا تاپسىرىلۋى ءتيىس. قارۋ قابىلدانعان كەزدە زەرتتەۋ، قىلمىسقا قاتىسى بار-جوعىن تەكسەرۋ جانە تاپسىرىلعان زاتتىڭ قۇنىن باعالاۋ ءۇشىن كريميناليستەرگە جىبەرىلەدى. سونىمەن قاتار جوعارىدا اتالعان زاتتار ادامدى قاماۋعا الۋ كەزىندە، سونداي-اق ولاردى انىقتاۋ جانە تاركىلەۋ بويىنشا تەرگەۋ ارەكەتتەرىن جۇرگىزۋ كەزىندە تاركىلەنگەن بولسا، ءوز ەركىمەن تاپسىراۋعا جاتپايتىنىن ايتا كەتەيىن»، – دەدى الماتى قالاسى پد اكىمشىلىك پوليسيا باسقارماسى ازاماتتىق جانە قىزمەتتىك قارۋ اينالىمىن باقىلاۋ ءبولىمىنىڭ باستىعى راحيم تولوكۋلوۆ.
بۇگىنگى تاڭدا الماتى قالاسىنىڭ ىشكى ىستەر ورگاندارىنا ازاماتتاردان 23 اتىس قارۋىن، اتاپ ايتقاندا، 18 تەگىس ۇڭعىلى قارۋدى، 1 تراۆماتيكالىق قارۋدى، 4 مىلتىق، مىلتىققا ارنالعان 60 پاتروندى تاپسىرۋ تۋرالى 14 ءوتىنىش كەلىپ ءتۇستى.
«بارلىق تاپسىرىلعان قارۋلار بىرىكتىرىلگەن دەرەكتەر بانكىنە سايكەس تەكسەرىلدى، مىلتىقتار كريميناليستيكالىق ساراپتاماعا جىبەرىلدى. ايتا كەتەيىن، ناۋقان بارىسىندا ازاماتتاردىڭ زاڭسىز ساقتالعان اتىس قارۋىن، وق-دارىلەرىن جانە جارىلعىش زاتتاردى ءوز ەركىمەن تاپسىرۋى تۋرالى تۇرعىندار اراسىندا ءاقپاراتتىق-تۇسىندىرۋ جۇمىستارى كۇشەيتىلدى. پد-نىڭ بارلىق بولىمشەلەرىندە، ازاماتتار كوپ جينالاتىن ورىنداردا ناۋقان تۋرالى اقپاراتتىق ستەندتەر ورناتىلدى»، – دەدى تولوكۋلوۆ.