2025 جىلدىڭ 5 ايىنىڭ قورىتىندىسى بويىنشا مەديسينالىق ساقتاندىرۋ قورى الماتى قالاسىنداعى مەديسينا ۇيىمدارىنا الماتىلىقتاردىڭ العان مەديسينالىق كومەگى ءۇشىن 76،3 ملرد تەڭگە تولەدى. بۇل وتكەن جىلدىڭ سايكەس كەزەڭىمەن سالىستىرعاندا 14%-عا ارتىق.
ءمامس پاكەتىنەن الىنعان قاراجاتقا ناقتى توقتالار بولساق، شىعىننىڭ باسىم بولىگى، ياعني 43،8 ملرد تەڭگەسى ستاسيونارلىق كومەككە، شامامەن 2،8 ملرد تەڭگەسى كۇندىزگى ستاسيونار قىزمەتىنە، 15،2 ملرد تەڭگە كونسۋلتاتيۆتىك-دياگنوستيكالىق قىزمەتتەرگە، جوعارى تەحنولوگيالاردىڭ كومەگىمەن جاسالاتىن وپەراسيالارعا 10،3 ملرد تەڭگە، مەديسينالىق رەابيليتاسياعا 3،7 ملرد تەڭگە جۇمسالعان.
«مىندەتتى الەۋمەتتىك مەديسينالىق ساقتاندىرۋدىڭ ارقاسىندا ازاماتتار جىل سايىن ءتۇرلى حيرۋرگيالىق وتالاردى جاساتۋعا مۇمكىندىك الىپ وتىر. ولاردىڭ اراسىندا باعاسىن كوپشىلىكتىڭ قالتاسى كوتەرە بەرمەيتىن قىمبات وپەراسيالار دا بار. قۇنى بىرنەشە ميلليون تۇراتىن قىمبات وتالاردى ساقتاندىرىلعان ازاماتتار تولەگەن جارناسىنىڭ مولشەرىنە قاراماي جاساتا بەرەدى. ءمامس جۇيەسىندەگى ورتاق جاۋاپكەرشىلىكتىڭ ءمانى وسىندا»، – دەدى الەۋمەتتىك مەديسينالىق ساقتاندىرۋ قورىنىڭ الماتى قالالىق فيليالىنىڭ ديرەكتورى ءىلياس مۇحامەدجان.
مىسالى، وسى جىلى الماتى قالاسىندا جالپى العاندا 8،8 ملرد تەڭگەگە 2995 وپەراسيا جاسالعان. ءبىر وتانىڭ قۇنى ورتا ەسەپپەن 3 ملن تەڭگەگە شىعادى. سونىمەن قاتار، 1871 نەيروحيرۋرگيالىق وپەراسيا جاسالعان. وعان قور 3،2 ملرد تەڭگە تولەدى. تىزە جانە جامباس بۋىندارىن الماستىرۋ وپەراسيالارىنا دەگەن سۇرانىس تا وتە جوعارى. الماتىدا 2009 بۋىن الماستىرۋ وتاسى جاسالىپتى. وپەراسيالاردىڭ جالپى قۇنى 3،2 ملرد تەڭگەگە جەتىپ جىعىلادى
تاعى دا نەيرو-قان تامىر جانە قان-تامىر جۇيەسىنە جاساعان 2083 وتاعا قور 2،9 ملرد. تەڭگە تولەدى. سونىمەن قاتار، وڭتۇستىك استانامىزدا جالپى قۇنى 244،7 ملن تەڭگەلىك 38 باۋىر، بۇيرەك جانە جۇرەك الماستىرىلدى. مۇنداي ءبىر وتانىڭ قۇنى 10 ملن تەڭگەگە دەيىن جەتىپ جىعىلادى جانە بۇگىندە بۇل شىعىندار ءمامس قاراجاتى ەسەبىنەن وتەلىپ جاتىر.
ەڭ قىمبات وتالار ۇشتىگى:
1.يمپلانتتالاتىن قوسالقى جۇرەك جۇيەسى (LVAD) – بۇل جۇرەككە قاندى ايداۋعا كومەكتەسەتىن مەحانيكالىق قوندىرعى. ول ترانسلانتاسيانى كۇتىپ جۇرگەن نەمەسە جۇرەگىن الماستىرۋعا بولمايتىن ناۋقاستارعا قولدانىلادى. بىرەۋىنىڭ قۇنى – 77،5 ملن تەڭگە. 2025 جىلى وسىنداي 1 وتا جاسالدى؛
2.جۇرەكتىڭ ميترالدى قاقپاقشاسىن الماستىرۋ، قۇنى – 17 ملن تەڭگە. 2025 جىلى وسىنداي 2 وتا جاسالدى
3.اللوگەندى گەموپوەتيكالىق ءدىڭ جاسۋشالارىن الماستىرۋ، قۇنى – 17 ملن تەڭگە.