الماتىلىقتار بوريس كەرىمبايەۆتى ەسكە الدى

كوماندير اۋعان سوعىسىندا ارنايى تاپسىرمالاردى ورىندايتىن باتالوندى باسقارعان

الماتىدا داڭقتى قولباسشى، قازاقتىڭ اڭىز ادامى بوريس كەرىمبايەۆتى ەسكە الۋعا ارنالعان رەسپۋبليكالىق عىلىمي كونفەرەنسيا ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.

 ءىس-شارادا جاۋىنگەردىڭ ەرلىگى مەن اۋعان سوعىسى جىلدارىنداعى ەستەلىكتەر ايتىلدى. سوۆەت ارمياسىنىڭ كومانديرى 1980-1983 جىلدارى اۋعان سوعىسىنا قاتىسىپ، ارنايى تاپسىرمالاردى ورىندايتىن باتالوندى باسقارعان. ساۋاتتى باسشىلىعىنىڭ ارقاسىندا ونىڭ ساربازدارى از شىعىنعا ۇشىراپ، شايقاستىڭ باسىم كوپشىلىگىندە جەڭىسكە جەتىپ وتىرعان. ونىڭ ەرلىگى اڭىزعا اينالىپ، «قارا مايور» دەگەن لاقاپ اتى تاريح بەتىندە ساقتالدى. ەسكە سالايىق، بوريس كەرىمبايەۆ 2019 جىلى 71 جاسقا قاراعان شاعىندا ومىردەن وتكەن ەدى.

– بوريس توكەن ۇلى كوماندير، باسشى بولىپ وتىرىپ، قيىن كەزدە ساربازداردىڭ ەلگە امان كەلۋىنە قولباسشى رەتىندە ءوزىنىڭ سىڭىرگەن ەڭبەگى بار. ەلىمىزدىڭ قارۋلى كۇشتەرىن ساربازدارمەن تولتىرمايتىن بولساق، قازىرگى جاساپ جاتقان جۇمىستىڭ ءبارى بەكەر بولۋى مۇمكىن. سول سەبەپتى قارۋلى كۇشتەرىنىڭ قاتارىنا جاستاردى كوپتەپ تارتۋىمىز كەرەك، – دەدى «اۋعان سوعىسى مۇگەدەكتەرى مەن ارداگەرلەرى وداعى» زتب رەسپۋبليكالىق ۇيىمى ورتالىق كەڭەسىنىڭ ءتوراعاسى مارات قويلىبايەۆ.