قالا كۇنىندە الماتىداعى جاسىل جەلەگى مول، ەڭ كورىكتى اۋلالار تاڭدالدى
بەلسەندىلەردىڭ كۇش-جىگەرىنىڭ ارقاسىندا جاسىل جەلەككە تولى جەرگىلىكتى اۋلالار جىلى دا جايلى كورىنەدى. الماتى قالاسىنىڭ جاسىل ەكونوميكا باسقارماسىنىڭ باسشىسى ءالي رايىمبايەۆ وڭىرلىك كوممۋنيكاسيالار قىزمەتىنىڭ بريفينگى بارىسىندا كوگالداندىرۋ بايقاۋىنىڭ قالاي وتكەنى تۋرالى ايتتى، دەپ حابارلايدى Almaty-akshamy.kz.
«اۋلا اۋماعىن كوگالداندىرۋ - 2021» بايقاۋى قالا كۇنىنە ورايلاستىرىلعان. قاتىسۋشىلار وتە كوپ بولدى - 324 ءوتىنىش كەلىپ ءتۇستى، ونىڭ 84-نە كوميسسيا مۇشەلەرى داۋىس بەردى. ءار اۋلانى قوعامدىق كەڭەس مۇشەلەرىنەن، لاندشافتىق ساۋلەتشىلەردەن، قوعامدىق ۇيىمدار باسشىلارىنان تۇراتىن قاتال دا ساۋاتتى قازىلار القاسى قارادى. 1-3 ورىن يەگەرلەرى ەلەكتروندى داۋىس بەرۋ ارقىلى انىقتالدى.
«ەكولوگيا – ءبىزدىڭ جۇمىسىمىزدىڭ نەگىزگى باعىتى. اۋلانىڭ كوگالداندىرىلۋى ەكولوگيالىق قانا ەمەس، الەۋمەتتىك سيپاتقا دا يە. قالا تۇرعىندارىنىڭ يدەيالارى سونشالىقتى ادەمى جانە ەرەكشە بولىپ شىقتى، جەڭىمپازداردى تاڭداۋ وڭاي بولعان جوق. تۇرعىندار ءوز اۋلاسىن قالاي كوركەيتۋگە بولاتىنىن جاقسى ۇلگى تۇرىندە كورسەتتى. بايقاۋعا ۇسىنىلعان ءار اۋلا شىن مانىندە ەرەكشە بولدى. بۇگىندە تۇرعىندار قىزىقتى كومپوزيسيالار جاسايدى، ەكولوگيالىق تازا ماتەريالداردى پايدالانادى، ولار اۋلاسىنا كىشكەنتاي شۆەيساريانى اكەلىپ ورناتىپ قويعان دەپ ايتۋعا بولادى»، - دەيدى ءا.رايىمبايەۆ.
بايقاۋ تامىز ايىنىڭ سوڭىندا جاريالاندى، وتىنىمدەردى قابىلداۋ 3 قىركۇيەكتە باستالدى. قوعامدىق داۋىس بەرۋ قورىتىندىسى بويىنشا، جۇلدە قورى 24 جەڭىمپازدىڭ اراسىندا ويناتىلدى: گران-پري جۇلدەسىنە - تاۋارلىق ماتەريالداردى، اۋلانى اباتتاندىرۋعا ارنالعان وسىمدىكتەردى ساتىپ الۋعا 5 ميلليون تەڭگەگە سەرتيفيكات؛ 8 اۋداندا 1 ورىن ءۇشىن - 1 ميلليون تەڭگە؛ 8 اۋداندا 2 ورىن ءۇشىن - ءارقايسىسى 500 مىڭ تەڭگە؛ 8 اۋداندا 3 ورىنعا باۋ-باقشا قۇرالدارى بەرىلەتىن بولدى.
كوميسسيا مۇشەلەرىنىڭ داۋىس بەرۋىنىڭ ناتيجەسىندە تۇركسىب اۋدانىنداعى مونتاجنايا كوشەسى، 15 مەكەنجايىنداعى اۋلانى ۇسىنۋشى يانا چيستيلينا جەڭىمپاز دەپ تانىلدى.
ءقۇرامىندا «TAL» ارحيتەكتۋرالىق بيۋروسىنىڭ جەتەكشىسى نازەركە مۋنداحانوۆا بار ساۋلەتشىلەردى اۋلاداعى ءتۇرلى گۇدەر مەن وسىمدىكتەر تاڭقالدىردى. وڭىرلىك كوممۋنيكاسيالار قىزمەتى الاڭىندا سويلەگەن سوزىندە ءار اۋلادا جاقسى كۇتىلگەن اعاشتار مەن بۇتالاردىڭ كوپ بولعانىن، تۇرعىنداردىڭ ولاردىڭ ديزاينىنا شىعارماشىلىقپەن قاراعانىن ايتتى.
«ءبىز جاسىل جەلەكتىڭ جالپى جاعدايىن عانا ەمەس، سونىمەن قاتار ولاردى تۇپتەۋ جانە سۋارۋ جۇمىستارىنا دا نازار اۋداردىق. مىسالى، اۋلالاردىڭ بىرىندە تۇرعىندار وزدەرىنىڭ ۇيىندە سۋارۋ جۇيەسىن ويلاپ تاپقان»، - دەيدى ن.مۋنداحانوۆا.