«بورىشكەر» جەدەل الدىن الۋ ءىس-شاراسى جۇرگىزىلىپ جاتىر.
الماتى پوليسەيلەرى ايىپپۇل تولەمەيتىندەرگە قاتىستى ءىس-شارا باستالعانىن ايتتى، دەپ حابارلايدى Almaty-akshamy.kz.
ىشكى ىستەر مينيسترلىگىنىڭ رەسمي سايتىنداعى مالىمەت بويىنشا، «قۇقىق بۇزۋشىلىققا نولدىك توزبەۋشىلىك» قاعيداسىن جۇزەگە اسىرۋ، بۇزۋشىلىق ءۇشىن جازانىڭ مىندەتتى تۇردە بولاتىنىن جانە اكىمشىلىك ايىپپۇلداردى ءوندىرۋ تيىمدىلىگىن ارتتىرۋ ماقساتىندا الماتى پوليسياسى «بورىشكەر» جەدەل الدىن الۋ ءىس-شاراسىن جۇرگىزۋدە. جول قوزعالىسى كوپ جەرلەردە ءىس-شارانى وتكىزۋگە جول-پاترۋلدىك پوليسياسىنىڭ اۆتوكولىك ەكيپاجى قاتىسادى. اكىمشىلىك ايىپپۇلدار بويىنشا بەرەشەگى بار بورىشكەرلەردى اۆتوماتتى تۇردە ەسەپتەيتىن «جقق» ااج جانە «سەرگەك» اوك دە قولدانىلادى.
«جوسپارلانعان كەزەڭدىك ءىس-شارا شەكتەۋلەرى بار ادامدار مەن كولىك قۇرالدارىن انىقتاۋعا، سونداي-اق، اكىمشىلىك قۇقىقبۇزۋشىلىق تۋرالى ءىس بويىنشا مىندەتتەمەلەردى ەرىكتى تۇردە، زاڭمەن بەلگىلەنگەن مەرزىمدە ورىنداماعان ادامداردى انىقتاۋعا باعىتتالعان. قوزعالىپ كەلە جاتقان كولىك اعىنىنىڭ اراسىندا جۇيە قۇقىق بۇزۋشىنىڭ كولىگىن انىقتايتىن بولسا، ينسپەكتور كولىكتى توقتاتادى جانە توقتاۋ سەبەبىن تۇسىندىرەدى. سودان كەيىن قۇقىق بۇزۋشىنىڭ كولىگى مامانداندىرىلعان ايىپپۇل تۇراعىنا قويىلادى. تۇرۋ ورنىندا قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنە سايكەس تاركىلەۋ حاتتاماسى جاسالادى. مۇنداي اكىمشىلىك شارالار قۇقىق بۇزۋشىلاردىڭ زاڭدى مىندەتتەمەلەردى ۋاقىتىندا ورىنداۋىنا ءتيىمدى اسەر ەتەدى دەپ ەسەپتەيمىن»، – دەدى الماتى قالالىق پد اكىمشىلىك پوليسيا باسقارماسىنىڭ باستىعى نۇرلان امانبەك.
سونداي-اق، ءىس-شاراعا وڭىرلىك جەكە سوت ورىنداۋشىلار پالاتاسىنىڭ سوت ورىنداۋشىلارى مەن الماتى قالاسى پروكۋراتۋراسىنىڭ قىزمەتكەرلەرى قاتىسادى.