الاياققا سەنگەن جابىرلەنۋشىلەر وعان 200 مىڭنان 6 ملن تەڭگەگە دەيىن قاراجات تولەگەن
الماتىدا جالعان تۋرفيرماعا قاتىستى قىلمىستىق ءىس تەرگەلۋدە، دەپ حابارلايدى Almaty-akshamy.kz.
المالى اۋدانىنىڭ پروكۋراتۋراسىنىڭ مالىمەتىنشە، «س» ەسىمدى ازامات جالعان تۋريستىك كومپانيانىڭ اتىنان ادامدارعا شەتەلگە بارۋ ءۇشىن وتە تومەن باعامەن جولدامالار ۇسىنعان.
الاياققا سەنگەن جابىرلەنۋشىلەر وعان 200 مىڭنان 6 ملن تەڭگەگە دەيىن قاراجات تولەگەن.
سونىمەن بىرگە جابىرلەنۋشىلەر ونى ءوز تانىستارى مەن دوستارىنا دا ۇسىنعان. ال تولىق تولەم العان سوڭ «س» ازامات جابىرلەنۋشىلەردىڭ نومىرلەرىن بۇعاتتاپ، ولارمەن بايلانىستى توقتاتقان. ناتيجەسىندە ادامدار قاراجات پەن ۋادە ەتىلگەن جولدامالاردان قۇرالاقان قالعان.
«قازىرگى تاڭدا قىلمىستىق ءىستىڭ 100-دەن استام قۇربانى بار جانە ونىڭ زالالى وتەلگەن جوق. «س« ازاماتشا كۇدىكتى دەپ تانىلدى. بۇل شەشىم المالى اۋدانىنىڭ پروكۋراتۋراسىمەن كەلىسىلدى. كۇدىكتى سوتتىڭ سانكسياسىمەن قاماۋعا الىندى»،- دەپ حابارلادى پروكۋراتۋرادا.