ورتالىق مەملەكەتتىك مۇراجاي جەڭىس كۇنىنە وراي «قازاقتىڭ باتىر قىزدارى» اتتى كوشپەلى كورمە وتكىزدى.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرى مەن ۇستازدارىنا كەڭەس وداعىنىڭ باتىرى ءاليا مولداعۇلوۆا، مانشۇك مامەتوۆا جانە حيۋاز دوسپانوۆانىڭ فوتوسۋرەتتەرى، حاتتارى، جەكە قۇجاتتارى مەن جەكە دۇنيەلەرى سەكىلدى مۋزەي قورىنداعى قۇندى جادىگەرلەر ۇسىنىلدى، دەپ حابارلايدى اlmaty-akshamy.kz.
كورمە قوناقتارى سيرەك كەزدەسەتىن زاتتاردى — مانشۇك مامەتوۆانىڭ كويلەگىن، ستۋدەنت كەزىندە كيگەن مەديسينالىق حالاتىن جانە باسقا زاتتاردى تاماشالاي الدى.
ق.ساتبايەۆ اتىنداعى الماتى گيمنازياسىندا وتكەن «جەڭىس رۋحىنا تاعزىم» كورمەسىندە ءىى دۇنيەجۇزىلىك سوعىس باتىرلارى — حالىق قاھارمانى راحىمجان قوشقاربايەۆ، ساعادات نۇرماعامبەتوۆ جانە كەڭەس وداعىنىڭ باتىرى ءاليا مولداعۇلوۆانىڭ فوتوسۋرەتتەرى، باعالى قۇجاتتارى جانە باسقا دا جەكە زاتتارى ۇسىنىلدى.
شارا بارىسىندا قوناقتارعا باتىرلاردىڭ ءومىرى مەن ەرلىگى تۋرالى باياندالدى.
اتاپ ايتقاندا، وقۋشىلار حالىق قاھارمانى ساعادات نۇرماعامبەتوۆتىڭ اسكەري كيىمىمەن، راحىمجان قوشقاربايەۆتىڭ ناگرادالارىمەن جانە مۇراعات قۇجاتتارىمەن تانىستى.
