ءبىر جىل بويى وكپەسىندەگى قاتەرلى ىسىكتى ەمدەي الماي جۇرگەن 3 بالانىڭ اناسىنا شەتەلدە ەمدەلۋدەن باسقا امال جوق.
دارىگەرلەر كونسيليۋمى وعان CAR-T تەراپيا الۋ كەرەك دەگەن شەشىمگە كەلىپتى، ال بۇل ەم-دوم قازاقستاندا جاسالمايدى، دەپ حابارلايدى Almaty-akshamy.kz
38 جاستاعى زارينا الييەۆا يىعى اۋىرىپ، 2 اي بويى جوتەلى قويماعان سوڭ رەنگتگەنگە تۇسكەن. دارىگەر ناتيجەسىن كورىپ، كومپيۋتەرلىك توموگرافيادان وتۋگە كەڭەس بەرگەن. ونىڭ وكپەسىنەن 11 سانتيمەترلىك ىسىك انىقتالعان. جاعىمسىز جاڭالىقتى ەستىپ، ءبىر جىل بويى ەم ىزدەگەن. ال استاناداعى ۇلتتىق ونكولوگيالىق عىلىمي ورتالىعىنان 2 رەت حيميا تەراپيا قابىلداعان. الايدا ودان پايدا بولماي، قاتەرلى ىسىگى 2 ەسە ءوسىپ كەتىپتى.
«اۋرۋ اسقىنىپ كەلەدى. وسى ورتالىقتىڭ دارىگەرلەرى قولدان كەلگەنىن جاسادى. ەمدەدى. حيمياتەراپيا الدىم. الايدا، مەندەگى ىسىك اسقىنىپ بارادى. ونكولوگيالىق ورتالىقتىڭ دارىگەرلەرى باسقاداي ەم الۋ كەرەگىن ايتتى. ونىڭ باعاسى وتە قىمبات بولىپ تۇر»، – دەدى الماتى قالاسىنىڭ تۇرعىنى زارينا الييەۆا.
ۇلتتىق ونكولوگيالىق ورتالىقتىڭ دارىگەرلەرى ناۋقاستى ەمدەۋ جولدارىن انىقتاۋ ءۇشىن كونسيليۋم وتكىزگەن. ناتيجەسىندە CAR-T تەراپيا الۋ كەرەك دەگەن شەشىمگە كەلىپتى. ال ونداي ەم-دوم قازاقستاندا جاسالمايدى.
«ءوزىمىز سالعان ءۇيىمىزدى ساتۋعا قويدىق. بىزگە تەز ارادا قاراجات جيناۋ كەرەك. سوندىقتان بارشا قازاقستاندىقتاردان ءوتىنىپ سۇرايمىن، مۇمكىندىگىنشە قول ۇشىن سوزساڭىزدار. ءبىز ءقازىر الەۋمەتتىك جەلىدە دە پاراقشا اشىپ قويدىق. سونىمەن قاتار، ەلدە بىزگە كومەكتەسە الاتىن قانداي قور بار، بارلىعىنا ءوتىنىم بەرەمىز»، – دەدى زارينانىڭ جولداسى ازيز مولدىبەكوۆ.
ازيز مولدىبەكوۆ «قازاقستان حالقىنا» قورىنا دا جۇگىنبەكشى. اتالعان قور وكىلدەرىنىڭ ايتۋىنشا، بالالار مەن 35 جاسقا دەيىنگى ونكولوگيالىق جانە ونكوگەموتولوگيالىق دياگنوزى بار پاسيەنتتەرگە كومەك كورسەتەدى. ال زارينا الييەۆانىڭ جاعدايىندا ناۋقاس مىندەتتى الەۋمەتتىك مەديسينالىق ساقتاندىرۋ قورىنا ءوتىنىش بەرۋى كەرەك. وسى ارقىلى ونىڭ شەتەلدە ەم الۋىنا مۇمكىندىك بار ەكەن.
«بىزدە مەديسينالىق ساقتاندىرۋ قورىنىڭ جانىنان جۇمىس ورگانى بار. ەلىمىزدەگى قازاقستاندىق پاسيەنتتەردى شەتەلگە ەمدەۋگە جىبەرەتىن جۇمىس ورگانى بولىپ تابىلادى. سوندىقتان ازاماتشا ءوزىنىڭ دياگنوزى بويىنشا وسى ورگانعا جۇگىنسە بولادى. بۇل ءوز كەزەگىندە سول سياقتى پاسيەنتتەردى مەملەكەت اياسىندا تەگىن تۇردە شەتەلدىك ەمدەۋگە جىبەرۋگە مۇمكىندىك بار»، – دەدى «قازاقستان حالقىنا» قورىنىڭ رەسمي وكىلى دياس بەيسەنبەك.
زارينا الييەۆانىڭ اۋرۋدان ايىعىپ كەتۋىنە شامامەن 500 مىڭ دوللار قاراجات قاجەت. سەبەبى يزرايلدەگى ءبىر عانا CAR-T تەراپيا 300 مىڭ دوللارعا دەيىن بارۋى مۇمكىن. ەگەر ناۋقاس جانساقتاۋ بولىمىنە تۇسسە، وعان قوسىمشا تولەيتىن قاراجات دايىن بولۋى كەرەك ەكەن. قاجەت سومانى جيناۋعا شامامەن 1 اي ۋاقىت بار.