نۇرىم نۇرعالييەۆ 120-عا جۋىق مۇمكىندىگى شەكتەۋلى باستاۋىش سىنىپ وقۋشىلارىن ءبىلىم نارىمەن سۋسىنداتپاق.
الماتىلىق ۇستاز باسپاناسىنان ەرەكشە بالالارعا ارنالعان مەكتەپ اشتى. قولدانىسقا جاڭادان بەرىلگەن ينكليۋزيۆتى ءبىلىم وشاعى ناۋرىزباي اۋدانىندا ورنالاسقان، دەپ حابارلايدى Almaty-akshamy.kz Almaty.tv-گە سىلتەمە جاساپ.
ءوز باسپاناسىن يگى باستاماعا بەرگەن 15 جىلدىق تاجىريبەسى بار ۇستاز نۇرىم نۇرعالييەۆ 120-عا جۋىق مۇمكىندىگى شەكتەۋلى باستاۋىش سىنىپ وقۋشىلارىن ءبىلىم نارىمەن سۋسىنداتپاق. 500 شارشى مەترلىك جاڭا مەكتەپتە لفك جانە ارت-تەراپيا كابينەتتەرى، دىبىس جازۋ ستۋدياسى جانە بىرنەشە ساباق وقيتىن سىنىپ، اسحانا بار.
«مەن – مۇگەدەكتىگى بار بالانىڭ اكەسىمىن. 14 جىل بويى ۇلكەن ۇلىمىزدى تاربيەلەپ كەلەمىز. ەرەكشە بالانىڭ اتا-اناسىن تۇسىنەمىن. 15 جىلدان استام پەداگوگيكالىق ىس-تاجىريبەمە سۇيەنە وتىرىپ، مەكتەپ اشتىم. ۇلىما كەزىندە كومەكتەسۋگە مۇمكىندىك بولمادى»، – دەدى ينكليۋزيۆتى مەكتەپتىڭ ديرەكتورى نۇرىم نۇرعالييەۆ
باستاپقى ۋاقىتتا ينكليۋزيۆتى مەكتەپتە 15 پەداگوگ جۇمىس ىستەيدى. ەلىمىزدە ۇزدىك ۇستاز اتانعان ەڭبەك ءوتىلى مول، تاجىريبەلى 5 مامان بار. مۇعالىمدەر قاۋىمى دا مۇمكىندىگى شەكتەۋلى جاندارعا قول ۇشىن سوزۋ ءۇشىن كەلگەن. مەكتەپ ديرەكتورىنىڭ ايتۋىنشا، بولاشاقتا بالا سانى وسكەن سايىن پەداگوگيكالىق ۇجىمدى قاجەتتىلىككە قاراي ارتتىرۋ دا ويدا بار.
«مەن ءوزىمنىڭ ۇلىممەن اۋلادا ەركىن جۇرە المايتىندىقتان، وسى ءۇي 100 مۇگەدەك بالانىڭ ءۇيى بولسىن دەپ شەشتىم. قولداۋشىلار بار، ءبىراق قاراجات جاعىنان ەشقانداي دەمەۋشى جوق. ءار بالاعا مينيسترلىك تاراپىنان بولىنەتىن قاراجات ۇستازداردىڭ جالاقاسىنا جەتەدى دەپ ۇمىتتەنىپ وتىرمىز»، – دەدى ينكليۋزيۆتى مەكتەپتىڭ ديرەكتورى نۇرىم نۇرعالييەۆ.
ەرەكشە قاجەتتىلىگى بار بالالار مەكتەپتە تەگىن وقيدى. ازىرگە ەشقانداي دياگنوزعا شەكتەۋ جوق. مۇندا ارنايى سىنىپتا وقيتىن وقۋشىلارمەن بىرگە، ۇيدە ءبىلىم الاتىن مۇمكىندىگى شەكتەۋلى بالالاردىڭ دا كەلۋىنە بولادى. ەگەر اتا-انا ۇيگە كەلىپ وقىتۋدى سۇراسا، وعان دا مۇمكىندىك بار. دەگەنمەن، مەكتەپكە كەلىپ، كۇنىنە 4 مۇعالىمنەن 4 ساعات ءبىلىم العان ءتيىمدى. ال ۇيدە ءبىر مۇعالىمنەن بالا جالىعادى.
«بالام وزگە بالالارعا ىلەسە الماي جاتقاندىقتان، «وسىندا اپارىپ كورىڭىزدەر» دەگەن ۇسىنىس بولدى. كەلگەننەن كەيىن ۇنادى. بالالارمەن جەكە جۇمىس جاسايدى، جىلى، ءتيىمدى»، – دەدى اتا-انا نۇرشات بەكەن.
ال مەكتەپ ديرەكتورىنىڭ قالا اكىمدىگى تاراپىنان «مۇمكىندىگى شەكتەۋلى بالالاردى تاسيتىن اۆتوبۋس بولىنسە ەكەن» دەگەن يگى تىلەگى بار. سونداي-اق ول تەگىن وقۋلىق جەتپەيتىنىن، ىستىق تاعاممەن قامتۋ ماسەلەسى دە مازالايتىنىن جەتكىزدى. شاعىن كاسىبى بار ۇستاز بولاشاقتا قالانىڭ باسقا اۋدانىنان فيليال اشۋدى كوزدەيدى.