الماتىلىق توراكالدى حيرۋرگتار كەۋدە قۋىسىنىڭ ءپىشىنى بۇزىلعان ناۋقاستارعا ءمامس شەڭبەرىندە وتا جاسايدى

16 جاستاعى ءجاسوسپىرىمنىڭ كەۋدە قۋىسى ۇلكەيىپ، قابىرعالارى سىرتقا ءدۇمپيىپ شىعىپ كەتكەن.

سالدارىنان ونىڭ تىنىس الۋى، قوزعالىسى قيىنداعان، دەپ حابارلايدى Almaty-akshamy.kz الماتىداعى №1 قالالىق كلينيكالىق اۋرۋحانانىڭ باسپا ءسوز قىزمەتىنە سىلتەمە جاساپ.

اناسىنىڭ ايتۋىنشا، بالانىڭ كەۋدەسىندەگى پاتولوگيا 6 جاسىندا پايدا بولعان. ۋاقىت وتە كەلە، تومپايىپ شىعىپ، ۇلكەيە باستاپتى. جان-جاقتى تەكسەرگەننەن كەيىن توراكالدى حيرۋرگتار وتا جاساۋ تۋرالى شەشىم قابىلدادى. پاسيەنت «ءتۋابىتتى جۇرەك اقاۋى. كەۋدە قۋىسىنىڭ دەفورماسيالانۋى. 3ء-شى دەڭگەيلى اسسيمەتريا» دەگەن دياگنوزبەن اۋرۋحانانىڭ توراكالدى حيرۋرگيا ورتالىعىنا جاتقىزىلدى.

نۇرلان جارىلقاپوۆ پەن مۇقتار نىسانباي، انەستيزيولوگ تايۆا راكوۆا مەن وپەراسيالىق مەدبيكە دينارا ورتالىقتان قۇرالعان بريگادا كۇردەلى وتانى ءساتتى جاساپ شىقتى.

«وپەراسيا مىندەتتى الەۋمەتتىك مەديسينالىق ساقتاندىرۋ شەڭبەرىندە جاسالدى. پاسيەنتكە كاندراشين ءادىسى بويىنشا توراكاپلاستيكا جاسالىپ، كەۋدە قۋىسىنا تيتان پلاستينا ورناتىلدى. ناۋقاس وتادان سوڭ 7 كۇن وتكەننەن كەيىن اۋرۋحانادان شىقتى»، - دەيدى توراكالدى حيرۋرگ مۇقتار نىسانباي.

كەۋدە قۋىسىنىڭ دەفورماسياسى ادەتتە ءتۋابىتتى نەمەسە جۇرە پايدا بولادى. بۇل اقاۋ كوبىنە ۇل بالالاردا كەزدەسەدى. ۋاقتىلى تۇزەتپەسە اسقىنىپ، پاسيەنتتىڭ تىنىس الۋى قيىنداپ، كەۋدە تۇسى اۋرا باستايدى. ءبىر جاقسىسى، ءقازىر ونى حيرۋرگيالىق جولمەن تۇزەتۋگە بولادى.

ەستەرىڭىزگە سالساق، 18 جاسقا دەيىنگى بالالار مەملەكەت تاراپىنان ساقتاندىرىلادى جانە مەديسينالىق قىزمەتتى اقىسىز پايدالانا الادى.