«جۇمىسشى ماماندىقتارى جىلى»
مەملەكەت باسشىسى 2025 جىلدى جۇمىسشى ماماندىقتارى جىلى دەپ جاريالادى. الماتى ەلەكترومەحانيكالىق كوللەدجى جالپى ورتا ءبىلىم بەرۋ، تەحنيكالىق جانە كاسىپتىك ءبىلىم بەرۋ باعدارلامالارىن جۇزەگە اسىرىپ كەلە جاتقان بىردەن-بىر وقۋ ورىندارىنىڭ ءبىرى. ستۋدەنتتەر كوللەدج قابىرعاسىندا ءدارىس الا وتىرىپ، كاسىپتىك-تەحنيكالىق ءبىلىم بەرۋ اياسىندا ءتيىستى ماماندىقتار بويىنشا تاجىريبەلىك داعدىلاردى يگەرۋگە كەڭىنەن مۇمكىندىك الادى.
الماتى ەلەكترومەحانيكا كوللەدجىنىڭ 4-كۋرس ستۋدەنتتەرى بيىل «ەلەكترومەحانيكالىق جابدىقتارعا تەحنيكالىق قىزمەت كورسەتۋ، جوندەۋ جانە پايدالانۋ»، «ەلەكتر جابدىقتارىن مونتاجداۋشى»، «اۆتوموبيل كولىگىنە تەحنيكالىق قىزمەت كورسەتۋ، جوندەۋ جانە پايدالانۋ»، «اۆتوموبيل ەلەكتر جابدىقتارىن جوندەۋ جونىندەگى ەلەكتريك (اۆتوەلەكتريك)» ماماندىقتارى بويىنشا گەرمانيانىڭ جەتەكشى كومپانيالارىندا بولىپ، وندىرىستىك تاجىريبەدەن ءوتۋ مۇمكىندىگىنە يە بولىپ وتىر.
وتكەن وقۋ جىلىندا كوللەدج ۇجىمى بىرنەشە ءىرى كومپانيالارمەن ىنتىماقتاستىقتا وتە بەلسەندى جۇمىس جاسادى. اتاپ ايتساق، «Actemium miprotek GmbH»، «AMP Leuna GmbH»، «SITEX Textile Dienstleistungen Simeonsbetriebe GmbH»، «Hans Kupfer & Sohn GmbH» سەكىلدى تانىمال نەمىس كومپانيالارىمەن مەموراندۋمعا قول قويىلىپ، حالىقارالىق ىنتىماقتاستىقتى دامىتۋ جولعا قويىلدى. ءبىزدىڭ مۇنداي قادامعا بارۋىمىزدىڭ باستى سەبەبى – قازىرگى زاماناۋي تەحنولوگيالاردىڭ دامىپ، باسەكەلەستىكتىڭ بەلەڭ الىپ وتىرعانى. سەرىكتەستىكتىڭ ناتيجەسىندە شەتەلدىك كومپانيالارمەن تىعىز بايلانىس ورناپ، ستۋدەنتتەر زاماناۋي تەحنولوگيالاردى مەڭگەرەدى. سونداي-اق، كاسىبي شەبەرلىكتەرىن شىڭداپ، حالىقارالىق ستاندارتتارعا سايكەس ءبىلىم الۋىنا زور مۇمكىندىك تۋادى. وسىنداي ورتاق كەلىسىمنىڭ ارقاسىندا 20 ستۋدەنتىمىز گەرمانياعا تاجىريبەدەن وتۋگە اتتاندى. ولار گەرمانيانىڭ «Actemium miprotek GmbH»، «Actemium Cegelec Mitte GmbH، «AMP Leuna GmbH»، «SITEX Textile Dienstleistungen Simeonsbetriebe GmbH»، «Hans Kupfer & Sohn GmbH» كومپانيالارىندا تاجىريبەدەن ءوتىپ، بىلىكتىلىكتەرىن ارتتىراتىن بولادى.
اتالمىش جوبا توو «Janser HR academy» ديرەكتورى، Executive MBA، PhD دوكتورى، پروفەسسور، قازاقستان رەسپۋبليكاسىنىڭ ەڭبەك سىڭىرگەن ەنەرگەتيگى، ق ر قۇرمەتتى ماشينا جاساۋشىسى حايرۋللا قوجابايەۆتىڭ باستاماسىمەن جۇزەگە اسىپ جاتقانىن زور ماقتانىشپەن ايتامىز. تانىمال تۇلعا ەلىمىزدەگى ينجەنەرلىك-تەحنيكالىق مامانداردى الەمدىك دەڭگەيدە دايارلاۋعا ەرەكشە ۇلەس قوسىپ كەلەدى. سونىمەن قاتار، ارنايى ءپان وقىتۋشىلارى بۇلبۇل مۇنبايەۆا، ايناش توقتىمانوۆا، ايدانا جۇمامۇراتوۆانىڭ دا ەڭبەكتەرىن ايرىقشا اتاپ وتكىم كەلەدى. بۇل رەتتە كوللەدج اتا-انالارى دا بىزگە ۇنەمى قولداۋ كورسەتىپ، بىرلەسە ەڭبەك ەتىپ كەلەدى.
ەل پرەزيدەنتى قاسىم-جومارت توقايەۆتىڭ جۇمىسشى ماماندىقتارعا قولداۋ كورسەتىپ، تۇتاس ءبىر جىلدى ارناۋى ءبىز ءۇشىن ۇلكەن كومەك. باستاما اياسىندا اتالمىش تاجىريبە بولاشاق مامانداردىڭ ءبىلىمىن جەتىلدىرىپ قانا قويماي، ەلىمىزدىڭ وندىرىستىك الەۋەتىن ارتتىرۋعا دا زور ۇلەس قوساتىن بولادى. ياعني گەرمانيانىڭ ءىرى كومپانيالارىندا بولىپ، تاجىريبە جيناۋ – ستۋدەنتتەرىمىزدىڭ كاسىبي تۇرعىدا دامۋىنا عانا ەمەس، قازاقستاننىڭ يندۋستريا سالاسىنىڭ جاڭا دەڭگەيگە كوتەرىلۋىنە مۇمكىندىك بەرەتىنىنە سەنەمىن.
الماتى ەلەكترومەحانيكا كوللەدجى وسىنداي باستامالار ارقىلى جۇمىسشى ماماندىقتارى جىلى شەڭبەرىندە ساپالى كادرلاردى دايارلاۋ ىسىنە قوماقتى ۇلەس قوسادى. بۇل تەك ءبىزدىڭ كوللەدج ستۋدەنتتەرىنىڭ عانا ەمەس، بۇكىل ەلىمىزدەگى تەحنيكالىق مامانداردىڭ الەۋەتىن نىعايتاتىن ماڭىزدى قادام!