ستۋدەنتتەر ينفەكسيادان قورعانۋ جولى - ۆاكسينا سالۋ دەگەن ويدا.
بيىل ءداستۇرلى وقۋ فورماتىنا كوشەتىن الماتىلىق ستۋدەنتتەر بەلسەندى تۇردە ۆاكسينا سالدىرىپ جاتىر. ال، قالادا ەگدە جاستاعى ەكپە العان ادام سانى 110 مىڭعا جۋىقتاعان، دەپ حابارلايدى Almaty-akshamy.kz Almaty.tv-گە سىلتەمە جاساپ.
ستۋدەنت الۋا ورىنبەكوۆا بۇگىن ەكپە سالدىرۋعا ۇلى وتان سوعىسى ارداگەرلەرى ەمحاناسىندا ورنالاسقان پۋنكتكە كەلگەن. دارىگەرلەر ونىڭ جالپى جاي-كۇيىن، دەنە قىزۋىن، ساتۋراسيا دەڭگەيى مەن قان قىسىمىن تەكسەرىپ شىقتى. دەنساۋلىعىندا كىنارات بولماعاندىقتان، وعان بۇگىن سپۋتنيك-V ەكپەسىنىڭ 1-كومپونەنتى سالىندى.
«ءداستۇرلى وقۋ جۇيەسىنە كوشىپ جاتقاندىقتان، ءاربىر ستۋدەنت ەكپە العانى ءجون. ەمىن-ەركىن جۇرۋگە، پاندەمياعا دەيىنگى ومىرگە ورالۋعا ىقپال ەتەدى دەپ ويلايمىن»، – دەدى المالى اۋدانىنىڭ تۇرعىنى الۋا ورىنبەكوۆا.
سوڭعى مالىمەتتەرگە سايكەس، ءبىر تاۋلىكتە ەكپەنىڭ العاشقى كومپونەنتىن 4700-دەن اسا، ال 2-كومپونەنتىن 6 مىڭعا جۋىق ادام سالدىرعان. ال، اقپاننان بۇگىنگە دەيىن 833 مىڭنان استام تۇرعىن ۆاكسينا الدى. ونىڭ 110 مىڭعا جۋىعى 60 جاستان اسقان كىسى.
«اينالاڭدا جۇقپالى ينفەكسيا جۇرگەنىن ەلەستەتۋ وتە قورقىنىشتى. سوندىقتان ەكپە سالدىرۋعا بەل بۋدىم. دەنىمىز ساۋ، بالالارىمىز امان بولۋى ءۇشىن وسى ەڭ دۇرىس شەشىم»، – دەدى المالى اۋدانىنىڭ تۇرعىنى تامارا زاگريسەنكو.
«باستىسى، دەنساۋلىقتى كۇتۋ كەرەك. وزىمە جانە جاقىندارىما ىندەتتى جۇقتىرماۋ ءۇشىن ەكپە الىپ جاتىرمىن»، – دەدى المالى اۋدانىنىڭ تۇرعىنى ۆالەريي لۋكومسكيي.
بۇل ەمحاناعا 30 مىڭ تۇرعىن تىركەلسە، سونىڭ باسىم بولىگى، ياعني 24 مىڭنان كوبى، ەكپە سالدىرىپتى.
«30 مىڭ تۇرعىننىڭ 7 مىڭنان استامى - ديسپانسەرلىك ەسەپتە تۇرعان پاسيەنتتەر. ولارعا تۇگەلىمەن ۆاكسينا جاساۋ جۇرگىزىلدى. 230-ىنا مەدوتۆود بەرىلدى»، – دەدى قالالىق ۇوسا ەمحاناسى باس دارىگەرىنىڭ ورىنباسارى سالتانات ءابدىرازاقوۆا.
قالاداعى مەديسينالىق ۇيىمداردا، مادەنيەت، سپورت وبەكتىلەرىندە، بازارلار مەن ساۋدا ورتالىقتارىندا 160 ۆاكسينا ەگۋ پۋنكتى جۇمىس ىستەيدى. يممۋنداۋ جۇمىستارىنا 237 بريگادا جۇمىلدىرىلعان.