الماتىلىق ستۋدەنت قازاقشا سويلەيتىن روبوت جاسادى

ستۋدەنت جانعالي ماقسۇتوۆ تەمىرگە ءتىل ءبىتىردى.

تەمىرگە ءتىل ءبىتىرىپ، قوزعالىسقا كەلتىرۋ ءۇشىن 130 مىڭ تەڭگە جۇمسالىپتى.

ىزدەنىمپاز ستۋدەنت بۇل روبوتتى جاساپ ءبىتىرۋ ءۇشىن ءتورت جىل تالماي ەڭبەكتەنگەن. بۇعان دەيىن 4 روبوت قۇراستىرىپتى، دەپ حابارلايدى Almaty-akshamy.kz

24.kz سايتىنىڭ مالىمەتىنشە، جانعاليدىڭ روبوت جاساۋعا دەگەن قىزىعۋشىلىعى 7-سىنىپتا ويانا باستايدى. ال «تايرانت-5»ء-تىڭ ەرەكشەلىگى - قازاق تىلىندە سويلەپ، سۇراقتارعا جاۋاپ بەرە الادى. جاس ينجەنەر روبوتوتەحنيكا جاساۋدىڭ الىپپەسىن ينتەرنەتتەن وقىپ ۇيرەنگەن.

«وسى روبوتتى سويلەتۋ ءۇشىن 5-10 تاجىريبە جاسالىندى. سول تاجىريبەلەردىڭ العاشقىسىندا دۇرىس سويلەي المادى. ەكىنشىسىندە كولونكاسىنىڭ داۋىسى دۇرىس شىقپادى. ۇشىنشىسىندە سىمدار دۇرىس بايلانىسپاي قالدى. ءسويتىپ، كوپتەگەن تاجىريبەلەردىڭ ارقاسىندا وسى دۇنيەم ساپالى بوپ شىقتى. روبوتتىڭ العاشقى سىزباسى مەن نوبايى ءتورت جىل بۇرىن سىزىلدى. بيىل كورپۋسى جاسالىپ، باعدارلاماسى ورناتىلدى. الداعى ۋاقىتتا وسىنداي روبوتتاردىڭ باسقا تۇرلەرىن جاساپ، اۋىل شارۋاشىلىعىندا، مەديسينادا، وندىرىستە قىزمەت ەتەتىن تەمىر روبوتتاردى قولدانىسقا شىعارعىم كەلەدى، - دەيدى جانعالي ماقسۇتوۆ.