ايالدامالار «سويلەپ» تۇر

اقىلدى ايالداما

الماتى ايالدامالارى قىزىققا تولى. ءارقايسىسى كىسىنى باعىتتايدى، حابارلاندىرادى، ءجون سىلتەيدى. ءبىر سوزبەن ايتقاندا، وزىڭىزبەن "تىلدەسەدى".

قازاق حالقىنىڭ ۇلتتىق ونەرىن، ناقىشىن، ەتنوفولكلورىنان حاباردار ەتەتىن، بيلبورد، مۇسىندەر، ويۋ-ورنەكپەن، قابىرعا سالىنعان تاريحي سۋرەتتەردى كورىپ كوزايىم بولاتىنبىز. سوڭعى ۋاقىتتارى بۇل ءۇردىس اۆتوبۋس كۇتۋ بەكەتتەرىنە ويىستى. اسىرەسە، اباي جانە نازاربايەۆ داڭعىلدارىندا قۇندى دۇنيەلەرىمىزدى بىردەن بايقايمىز. قۋانامىز!

ءسىز مارشرۋتتىق بەكەتتەردە وزىڭىزگە قاجەتتىنى تەز تابا الاسىز. مۇندا ءسىزدى پاتەر، جۇمىسقا ورنالاسۋ، مەيرام كەزدەرىندە كونسەرتتىك شاقىرتۋلار ت.ب جونىندە قۇلاعدار ەتەدى. تەز ءارى جىلدام اقپاراتتى دا كورۋىڭىز مۇمكىن. سونىمەن قاتار جولاۋشىلارعا ارنالعان مارشرۋتتىق كەستەلەر باعىتتى ايقىنداۋعا سەپتەسەدى.

سوڭعى ۋاقىتتارى جاپونيا، وڭتۇستىك كورەيا، اقش سياقتى تەحنوكراتيالىق ەلدەردەن «سمارت ايالداما» ۇعىمى جەتتى. دالىرەك ايتقاندا، «اقىلدى بەكەت»! ەندى قالا جۇرتشىلىعى تيىمدىلىككە جاقىنداي ءتۇستى. ۋاقىت ۇنەمدەلەدى. بۇندا Wi-fi، قالتا تەلەفوندارىن قۋاتتاۋعا نەگىزدەلگەن توق كوزدەرى، تولەم تەرمينالدارى ورناتىلعان. ايتا كەتەيىك، الماتىدا «سمارت ايالدامالاردىڭ» العاشقىسى ماناس پەن جاندوسوۆ كوشەلەرىنىڭ قيىلىسىندا قويىلعان. بۇرىن «اقىلدى قالا»، «اقىلدى ءۇي» دەگەندەردى ەستۋشى ەدىك. ونىڭ قاتارىنا اتالعان جاڭاشىلدىق قوسىلىپ، شاھار مەن تۇرعىندار شارۋاسىن جەڭىلدەتۋدە. شاھارىمىزدا ىلكىمدى ىستەر ىلگەرىلەي بەرگەي!