نزم فيزيكا-ماتەماتيكا باعىتى بويىنشا وقيتىن وقۋشىلار حيۋستوندا وتەتىن الەم بىرىنشىلىگىنە دايىندالىپ جاتىر.
روبوتوتەحنيكانىڭ قىر-سىرىن جەتىك مەڭگەرگەن الماتىلىق جەتكىنشەكتەر اقش-تا وتەتىن حالىقارالىق تۋرنيرگە جولداما الدى، دەپ حابارلايدى اlmaty-akshamy.kz 24.kz سىلتەمە جاساپ.
نازاربايەۆ زياتكەرلىك مەكتەبىندە فيزيكا-ماتەماتيكا باعىتى بويىنشا وقيتىن وقۋشىلار حيۋستوندا وتەتىن الەم بىرىنشىلىگىندە دە توپ جارساق دەپ وتىر. ولار جاقىندا استانادا وتكەن رەسپۋبليكالىق سايىستا جەڭىمپاز اتاندى. ءقازىر دۇنيەجۇزىلىك جارىسقا دايىندىقتارىن باستاپ كەتتى.
الماتىلىق «قىران» كومانداسى اۋىزبىرشىلىك پەن تاپقىرلىقتىڭ ارقاسىندا ۇلتتىق بىرىنشىلىكتە الدىنا جان سالمادى. ولاردىڭ باپكەرلەرىمەن بىرلەسىپ جاساعان روبوتى ءارتۇرلى تاپسىرمالاردى ورىنداي الادى جانە جىلدام قوزعالادى.
نزم تەحنوتوريا زەرتحاناسىنىڭ جەتەكشىسى بەكزات ىڭكاروۆتىڭ ايتۋىنشا، الدىڭعى جارىستاردان شاكىرتتەر ۇلكەن ساباق الىپتى.
-«ءبىزدىڭ روبوت تىم اۋىرلاۋ ەكەنىن بايقادىق. ءقازىر سالماعىن ءبىراز جەڭىلدەتتىك. ويتكەنى روبوت نەعۇرلىم جەڭىلدەۋ بولعان سايىن، جىلدامدىعى دا ارتا تۇسەدى. سوندىقتان ءبىز 3 ميلليمەترلىك مەتاللمەن قۇراستىرىپ شىقتىق. روبوتتىڭ ماقساتى – كونۋستى ارنايى قۇرىلعىلارمەن مۇناراعا شىعارۋى ءتيىس. بۇل جەردە قازىلار سان مەن ساپاعا قارايدى. ەڭ جىلدام روبوت جەڭىمپاز اتانادى».
راسىندا روبوت جاساۋ وتە جاۋاپتى جۇمىس. ويتكەنى ول روبوتتىڭ ءاربىر قيمىلىن ءجىتى قاداعالاپ وتىرۋ كەرەك. ءبىر عانا قاتەلىك بارلىق ەڭبەكتى ەش كەتىرەدى. سوندىقتان وقۋشىلار حيۋستونداعى جارىسقا دايىندىقتى ءالى پىسىقتاۋى ءتيىس.
«باسقا روبوتتارمەن سالىستىرعاندا ءبىزدىڭ روبوت امبەباپ دەپ ايتسام بولادى. ويتكەنى ول از عانا ۋاقىتتىڭ ىشىندە مۇنارانىڭ باسىنا بىرنەشە كونۋستاردى شىعارا الادى، - دەيدى روبوت قۇراستىرۋشى ءيمانالى كوكسال».
ايتا كەتەلىك، نازاربايەۆ زياتكەرلىك مەكتەبىنىڭ «قىران» كومانداسىندا 9 ادام بار. روبوتتى جەتىلدىرۋ پروسەسى اياقتالعاننان كەيىن وقۋشىلار پراكتيكالىق جاتتىعۋلارعا كوشەدى. ەگەر وقۋشىلار اۋىزبىرشىلىكتەن اجىراماسا اقش-تان ولجالى قايتۋى ابدەن مۇمكىن.