الماتى قالاسى قۇتقارۋ قىزمەتىنە كەشە كەشكى ساعات 21:37-دە جوعالعان ازامات تۋرالى حابارلاما تۇسكەن.
وندا گرەكيالىق گ.ەسىمدى ازاماتتىڭ «ۆولچيا گوراعا» جولعا شىعىپ، سول كۇيى ورالماعانى ايتىلعان، دەپ حابارلايدى Almaty-akshamy.kz.
قۇتقارۋ قىزمەتىنىڭ مالىمدەۋىنشە، ءتۋريستتىڭ جوعالعانى تۋرالى ول تۇراقتاعان حوستەلدىڭ يەسى حابارلادى. ونىڭ ايتۋىنشا، تۋريست ونىڭ تەلەفونىنا ورنالاسقان جەرى مەن "قايتار جولدان اداسقانى" جايلى حابارلاما كەلگەن.
ول حاتتا تىم قاراڭعى بولعاندىقتان جانە ارنايى جارىق قۇرالدارىنىڭ بولماۋى سەبەپتى جولدى جالعاستىرا المايتىندىعىن دا جازعان.
قۇتقارۋ قىزمەتىنىڭ قۇتقارۋشىلارى سوڭعى گەومالىمەت بويىنشا ىزدەستىرۋ جۇمىستارىن باستادى.
«01:11-دە جوعالعان ازاماتتى تاۋىپ، تاۋدان ءتۇسىرۋ جۇمىستارى باستالدى. تۋريست ءدىن امان، مەديسينالىق كومەك قاجەت بولمادى»، - دەلىنگەن الماتى قالاسى قۇتقارۋ قىزمەتىنىڭ حابارلاماسىندا.