بۇگىن – حالىقارالىق قارتتار كۇنى. حالىقارالىق قارتتار كۇنىنە وراي مەگاپوليستەگى 28 پانفيلوۆشى-گۆاردياشى اتىنداعى ساياباققا جينالعان زەينەتكەرلەر مەن ارداگەرلەردىڭ قۇرمەتىنە كونسەرت ۇيىمداستىرىلدى. جاس ونەرپازدارمەن بىرگە قاريالاردىڭ وزدەرى دە ءان سالىپ، بي بيلەدى.
سالاۋاتتى ءومىر سالتىن ۇستاناتىن سەرگەك قارتتار سكانديناۆيالىق ءجۇرىس سپورتىنا قۋانا قاتىستى.
مەرەكەگە بولەنگەن پارك ىشىندە ساۋدا نۇكتەلەرى دە جۇمىس ىستەپ تۇردى. وعان قالاداعى «بەلسەندى ۇزاق ءومىر ءسۇرۋ» ورتالىقتارىندا تىركەلگەن زەينەتكەرلەردىڭ ءوز قولىنان شىققان ءتۇرلى قولونەر، توقىما بۇيىمدارى جانە كارتينالار قويىلدى.
"ۇزاق جىل ۇستازدىق ەتتىم، بالالارعا اعىلشىن تىلىنەن ساباق بەردىم. ءبىلىمدى ۇرپاق تاربيەلەۋگە ۇلەس قوستىم. ءقازىر زەينەتكەرمىن. بالالار جۇمىستا، نەمەرەلەر ساباقتا، بالاباقشادا. ۇيدە قاراپ وتىرمايمىن دەپ، مەدەۋ اۋداندىق بەلسەندى ۇزاق ءومىر ءسۇرۋ ورتالىعىنا تىركەلگەن ەدىم. مۇندا ءوزىمدى جاڭا قىرىنان اشتىم دەسەم دە بولادى. سۋرەتكە بالا كۇنىمنەن جاقىن ەدىم. ءبىراق ۋاقىت اعىمىمەن باسقا باعىتقا كەتتىم. ال ءقازىر شىعارماشىلىق الەۋەتىم ارتىپ، قىلقالامدى سەرىك ەتىپ، سۋرەتتەر سالا باستادىم. مەنىڭ وسىلاي ەكىنشى تىنىسىمنىڭ اشىلۋىنا دانەكەر بولعان، بىزگە سۋرەت ۇيىرمەسىنەن ساباق بەرەتىن قازاقستان سۋرەتشىلەر وداعىنىڭ مۇشەسى، بەلگىلى وتاندىق سۋرەتشى گۇلجامال تاگەنوۆاعا العىسىم شەكسىز. سان بوياۋدى قالاي ويناتۋدى ۇيرەتتى. جۇرەگىمنەن شىققان كىشكەنتاي عانا كارتينالارىم ماعان قۋانىش، شابىت سىيلايدى. تۋعان-تۋىس، دوس-جارانعا دا تۋعان كۇندەرىندە سىيلاپ قۋانتۋ ءبىر مارتەبە. كۇنى كەشە ءۇش جاسار نەمەرەمە بالاباقشاسىنا بىرەۋىن بەرىپ جىبەردىم. «كۇزگى بالل» كونسەرتتىك باعدارلامالارىنىڭ ءبىر قاجەتىنە جاراعانىنىڭ ءوزى ماعان تاعى دا شابىت قوسادى"، – دەيدى زەينەتكەر-ۇستاز ماۆجۋدا شومەكەيەۆا.
قارتتار مەرەكەسىنە «الماتى جاس دارىگەرلەرىنىڭ اسسوسياسياسى» قوعامدىق بىرلەستىگى قولداۋ ءبىلدىردى. ءسويتىپ جاس بۋىن وزدەرىنە ۇلگى تۇتار اعا بۋىندى ءارقاشان سىيلايتىنىن، قۇرمەتتەيتىنىن كورسەتتى.
ال مەدەۋ اۋداندىق «بەلسەندى ءومىر ءسۇرۋ ورتالىعىنىڭ» ۇيلەستىرۋشىسى باقتيار كامالوۆ مۇنداي ءىس-شارالاردىڭ جىلدا ءبىر اي بويىنا ۇيىمداستىرىلاتىنىن اتاپ ءوتتى.
"بۇگىندە الماتىدا بەلسەندى ۇزاق ءومىر ورتالىقتارى ءساتتى جۇمىس ىستەۋدە. بۇل جوبانىڭ ماقساتى – ۇزاق جىلدار جۇمىس ىستەپ، ەڭبەگىنىڭ زەينەتىن كورەتىن جاسقا جەتىپ، زەينەت دەمالىسىنا شىققان اعا بۋىنعا قولداۋ كورسەتۋ، ولاردىڭ ءوزىن قوعامعا ءالى دە كەرەك ەكەنىن سەزىنۋىنە جاعداي جاساۋ، ءومىر ءسۇرۋ ساپاسىن ارتتىراتىن زياتكەرلىك، مادەني-رۋحاني شىعارماشىلىق، قوعامدىق ءىس-شارالارعا كەڭىنەن تارتۋ جانە ۇرپاقتار ساباقتاستىعىن جالعاپ وتىرۋ ءۇشىن جاس بۋىنمەن كەزدەسۋلەر ۇيىمداستىرۋ. مىنە، بۇگىن دە سونداي ءبىر تاعىلىمدى كەشتىڭ كۋاسى بولدىڭىزدار. كۇننىڭ جاڭبىرلى بولعانىنا قاراماي كوپتەپ جينالعان، ءوز ءومىرىن ءوزى جارىق ساتتەرگە تولتىرىپ جۇرگەن زەينەتكەر-ارداگەرلەرگە العىس ايتامىز"، – دەيدى باقتيار كامالوۆ.
تاقىرىپقا وراي ايتا كەتسەك، الماتى – ەلىمىزدەگى «بەلسەندى ۇزاق ءومىر ءسۇرۋ» ورتالىعى ءبىرىنشى بولىپ اشىلعان تۇڭعىش قالا. بۇگىندە قاناتىن كەڭگە جايىپ، شاھاردىڭ بارلىق اۋدانىندا جۇمىس ىستەپ تۇر. اتالعان ورتالىقتارعا كەلەتىن زەينەتكەرلەردىڭ كوبى ەشتەڭە دە كەش ەمەس دەپ ءتىل ۇيرەنىپ، كومپيۋتەرلىك ساۋاتتىلىقتى مەڭگەرۋدى. نەگىزى، ەگدە جاستاعى الماتىلىقتار اراسىندا «ايكۋنە» ۇلتتىق جاتتىعۋلارى، كەسكىندەمە كۋرستارى، حور، قولونەر جانە اگروتەراپيا ەرەكشە تانىمال دەيدى ۇيلەستىرۋشى-ماماندار.