الماتى قالاسى بويىنشا قىلمىستىق-اتقارۋ جۇيەسى دەپارتامەنتىنىڭ قىزمەتكەرلەرى قىزمەت بابىندا قازا تاپقان ارىپتەستەرى ا.سابىربەكوۆتىڭ رۋحىنا تاعزىم ەتىپ، ەسكە الدى، دەپ حابارلايدى Almaty-akshamy.kz.
قىلمىستىق-اتقارۋ جۇيەسىندە قىزمەت اتقارۋ – ءقاۋىپتىڭ وتىندە، قاتەردىڭ قاسىندا ءجۇرۋ دەگەن ءسوز. نەبىر قانقۇيلى قىلمىسكەرلەر شوعىرلانعان جەردە جايباراقات جۇرەمىن دەگەن ءجاي ءسوز. وعان دالەل – بىرەن-ساران بولسا دا سوتتالعانداردىڭ قولىنان قازا تاپقان قىلمىستىق-اتقارۋ جۇيەسىنىڭ قىزمەتكەرلەرى بار. سولاردىڭ ءبىرى – ايداربەك سابىربەكوۆ. دارىگەر ماماندىعىن العان سوڭ، ايداربەك جۇرەك قالاۋىمەن ىشكى ىستەر ورگاندارىنا كەلگەن ەدى. قىلمىستىق-اتقارۋ جۇيەسىنە قاراستى تۇزەۋ مەكەمەلەرىندە دارىگەر ماماندىعى قاشان دا سۇرانىسقا يە. سوندىقتان دا ايداربەك قازىرگى №11 مەكەمەسىنىڭ فەلدشەرى لاۋازىمىنا تاعايىندالادى. بۇل ەلىمىزدە قىلمىستىق احۋالدىڭ ءبىر كۇردەلى كەزەڭى بولاتىن. اسىرەسە اۋىر قىلمىس جاساعانى ءۇشىن كولونيالاردا جاستار جاعى باسىم ەدى. تىپتەن كامەلەتتىك جاسقا تولماعان جاسوسپىرىمدەردىڭ اۋىر قىلمىسقا بارۋلارى جيىلەگەن كەز وسى ەكى مىڭىنشى جىلداردىڭ باسى بولاتىن دەسەك، ارتىق ايتپايمىز. ال الماتىداعى بالالار كولونياسى - وسىنداي جاسوسپىرىمدەر جازاسىن وتەيتىن مەكەمە.
ايداربەك سابىربەكوۆ ءوزى قالاپ كەلگەن قىزمەتىنە قۇلشىنا كىرىستى. قىلمىستىڭ قۇرىعىنا ءىلىنىپ، ەندى سونىڭ جازاسىن وتەپ جۇرگەن جاسوسپىرىمدەردىڭ دەنساۋلىعىن باقىلاۋدى، اۋىرىپ قالعاندارىن ەمدەۋدى بار ىنتاسىمەن اتقارىپ، جاسوسپىرىمدەرگە جاناشىرلىق تانىتۋدان جالىقپادى. وسى ءبىر قاعىلەز، قانداي تاپسىرما بولسا دا تاپ-تۇيناقتاي ەتىپ ورىندايتىن جىگىتتى ۇجىمداعىلار “ءبىزدىڭ دارىگەر اعاي” دەپ اتاپ كەتىپ ەدى. وكىنىشكە وراي، ىشكى قىزمەت كىشى لەيتەنانتى ايداربەكتىڭ ءومىرى نەبارى 26 جاسىندا ءۇزىلدى. 2000 جىلدىڭ 30 قاراشاسىندا ول قىزمەتتىك مىندەتىن اتقارۋ كەزىندە ساعات 22.30 شاماسىندا قاشىپ بارا جاتقان جاسوسپىرىمدەردى توقتاتۋ كەزىندە سوتتالعان بالالاردىڭ قولىنان قازا تاپتى. ا. سابىربەكوۆكە قازا تاپقاننان كەيىن “ىشكى قىزمەت لەيتەنانتى” ارنايى اتاعى بەرىلدى جانە قازاقستان رەسپۋبليكاسى پرەزيدەنتىنىڭ جارلىعىمەن “ەرلىگى ءۇشىن” مەدالىمەن ماراپاتتالدى. ءوزى قىزمەت اتقارعان الماتى قالاسىنداعى بالالار كولونياسىندا ەرجۇرەك دارىگەرگە ارنالعان بۇرىش اشىلىپ، قاجد عيماراتىنىڭ اۋماعىندا ەسكەرتكىش قويىلدى. ارىپتەستەرى ايداربەكتىڭ ەسىمىن ءار مەرەكە سايىن ەسكە ءتۇسىرىپ، رۋحىنا تاعزىم ەتىپ تۇرادى.