ول ءداستۇرلى “ەرلىك ساباعى” اياسىندا ءوتتى.
شاراعا رۇستەم قايداروۆتىڭ جۇبايى، الماتى قالالىق پوليسيا دەپارتامەنتىنىڭ باسشىلىعى مەن جەكە قۇرامى قاتىستى، دەپ حابارلايدى Almaty-akshamy.kz
«رۇستەم ەسىمحان ۇلى قازاق پوليسياسىنىڭ قالىپتاسۋىنا ولشەۋسىز ۇلەس قوسىپ، جانقيارلىق ەڭبەگى مەن تاڭداعان ماماندىعىنا دەگەن ادالدىعى بۇگىنگى كۇنگە دەيىن وسكەلەڭ ۇرپاققا ۇلگى-ونەگە بولىپ كەلە جاتقان لايىقتى وفيسەرلەردىڭ ءبىر ەمەس بىرنەشە ۇرپاعىن تاربيەلەپ شىعاردى. ول ءوز ىسىنە دەگەن ادال قىزمەتىمەن حالىقتىڭ قۇرمەتىنە بولەندى. ول جوعارى وفيسەرلىك قۇرمەتتى ادام بولدى. رۇستەم ەسىمحان ۇلى قازاقستان گەنەرالدار كەڭەسىنىڭ ءتوراعاسى بولا تۇرا، بارلىق جاعدايدا قاراپايىم پوليسەيدىڭ مۇددەسىن قورعاپ كەلدى. ءىىو-نىڭ ارداگەرلەرىنە دە كوپ ەڭبەك ءسىڭىردى. بۇگىنگى كەزدەسۋ – ونىڭ رۋحىنا تاعزىم ەتۋ. جاس ءتارتىپ ساقشىلارى گەنەرال قايداروۆتىڭ ءومىرى مەن قىزمەتىنىڭ تاريحىن جان-جاقتى ءبىلدى. بۇل وسكەلەڭ ۇرپاق پوليسەيلەرگە ۇلگى بولاتىنىنا سەنىمدىمىن»، – دەدى الماتى قالالىق پد باستىعىنىڭ ورىنباسارى ولجاس مىرزابەكوۆ.
ادىلەت گەنەرال-مايورى رۇستەم ەسىمحان ۇلى قايداروۆ – كسرو ءىىم قىزمەتكەرى، ق ر ءىىم قۇرمەتتى ارداگەرى، رەسەي جاراتىلىستانۋ عىلىمدارى اكادەمياسىنىڭ كوررەسپوندەنت-مۇشەسى، حالىقارالىق اقپاراتتاندىرۋ اكادەمياسىنىڭ اكادەميگى، پروفەسسور، “گەنەرالدار كەڭەسى” پرەزيديۋمىنىڭ ءتوراعاسى، حالىقارالىق ەكولوگيالىق پالاتانىڭ قۇرمەتتى پروفەسسورى. 20-دان استام عىلىمي ماقالالار مەن وقۋ قۇرالدارىنىڭ اۆتورى. قازاق كسر قىلمىستىق ءىس جۇرگىزۋ كودەكسى اۆتورلارىنىڭ ءبىرى. بۇۇ-نىڭ ەسىرتكى بيزنەسىنە قارسى كۇرەس جونىندەگى كوميسسياسىنىڭ 39-شى سەسسياسىندا ق ر پارلامەنتىنىڭ جۇمىس توبىنىڭ مۇشەسى بولدى. مينسك كونۆەنسياسىن ازىرلەۋ جونىندەگى قازاقستان رەسپۋبليكاسى دەلەگاسياسىنىڭ جەتەكشىسى. “ءبىرىڭعاي اقپاراتتىق كەڭىستىك تۋرالى” زرك اۆتورلارىنىڭ ءبىرى. “پاراسات”، “دوستاستىق جۇلدىزى”، “ەرەن ەڭبەگى ءۇشىن”، “ويى مەن ءىسى ءۇشىن” وردەندەرىمەن، كسرو-نىڭ، قازاقستان رەسپۋبليكاسىنىڭ، رەسەي فەدەراسياسىنىڭ، ۋكراينا مەن بەلارۋسيانىڭ 30-دان استام مەدالدارىمەن ماراپاتتالعان.
2019 جىلدىڭ 27 جەلتوقسانىندا الماتىدا ۇشاق اپاتى ورىن الىپ، 14 ادام قازا تاپتى. قازا تاپقانداردىڭ اراسىندا ادىلەت گەنەرال-مايورى رۇستەم ەسىمحان ۇلى قايداروۆ تا بولدى.