الماتىلىق پوليسەيلەر ادام ۇرلاۋدىڭ الدىن العان

ولارعا بۇگىنگى مەرەكەدە مەملەكەتتىك ناگرادالار تابىستالدى.

مەملەكەت باسشىسى قاسىم-جومارت توقايەۆتىڭ جارلىعىمەن الماتى قالالىق پوليسيا دەپارتامەنتى جەرگىلىكتى پوليسيا قىزمەتى باسقارماسى پاترۋلدىك پوليسيا پولكىنىڭ اعا ينسپەكتورلارى پوليسيا كاپيتانى قۋانىش ابدىكەرىم جانە پوليسيا اعا لەيتەنانتى الماسبەك تۇرسىن رەسپۋبليكا كۇنى قارساڭىندا “جاۋىنگەرلىك ەرلىگى ءۇشىن” مەدالىمەن ماراپاتتالدى، – دەپ حابارلايدى Almaty-akshamy.kz Polisia.kz-كە سىلتەمە جاساپ.

پاترۋلدىك پوليسەيلەرگە مەملەكەتتىك ناگرادانى قازاقستان رەسپۋبليكاسىنىڭ ىشكى ىستەر ءمينيسترى ەرجان سادەنوۆ تابىستادى. ەستەرىڭىزگە سالا كەتەيىك، قىلمىس بيىل 28 اقپان كۇنى الماتىنىڭ المالى اۋدانىندا جاسالعان بولاتىن.

پاترۋلدىك پوليسيا قىزمەتكەرلەرىنە جەدەل باسقارۋ ورتالىعىنىڭ كەزەكشىسىنەن Chevrolet كولىگىنە ادامنىڭ كۇشتەپ وتىرعىزىلعانى تۋرالى حابارلاما كەلىپ ءتۇستى. بۇكىل قالا بويىنشا “پەرەحۆات” ارنايى جوسپارى ەنگىزىلدى. اتالعان كولىك گوگول مەن پۋشكين كوشەلەرىنىڭ قيىلىسىندا بايقالدى. ىزىنەن ەرۋ ناتيجەسىندە پوليسەيلەر كولىكتى ماقاتايەۆ پەن جەتىسۋ كوشەلەرىنىڭ قيىلىسىندا توقتاتتى.

كولىكتە ءۇش ادام بولدى، ولار ۇستالدى. جۇكسالعىشتان تاعى ءبىر ەر ادام تابىلدى، ول كولىكتىڭ يەسى ەكەنى بەلگىلى بولدى. ۇستالعانداردىڭ ايتۋىنشا، Chevrolet كولىگىنىڭ يەسى ولاردى الداپ، ءىرى كولەمدە اقشا العان. وسىلايشا ولار قارىزدى قايتارىپ الۋعا تىرىسقان. ال جابىرلەنۋشىنىڭ ايتۋىنشا، ءبارى كەرىسىنشە. قۇتقارىلعان ەر ادام ءتارتىپ ساقشىلارىنا العىس ءبىلدىردى.