الماتىنىڭ قۇراما كومانداسى جاراتىلىستانۋ-ماتەماتيكالىق باعىتتاعى پاندەر بويىنشا رەسپۋبليكالىق وليمپيادادا 43 جۇلدەلى ورىنعا يە بولدى، اتاپ ايتقاندا، 9 التىن، 14 كۇمىس جانە 20 قولا مەدال. وسىلايشا، وقۋشىلار جالپى ەسەپتە ءبىرىنشى بولىپ «ءۇزدىك وليمپيادالىق كوماندا – 2023» سىيلىعىن جەڭىپ الدى، دەپ حابارلايدى almaty-akshamy.kz
رەسپۋبليكالىق وليمپيادانىڭ قورىتىندى كەزەڭىندە 53 وقۋشى الماتى قالاسىنىڭ نامىسىن قورعادى. وليمپياداعا ەلىمىزدىڭ ءار ايماعىنان بارلىعى 900-دەن اسا 9-11 سىنىپ وقۋشىلارى قاتىستى.
قاتىسۋشىلار 2 تۋردان تۇراتىن تاپسىرمالار ورىندادى. ولار ماتەماتيكا، فيزيكا، حيميا، بيولوگيا، گەوگرافيا جانە ينفورماتيكا پاندەرى بويىنشا زياتكەرلىك سايىستاردى قامتىدى. وليمپيادا 20-25 ناۋرىز ارالىعىندا شىمكەنت قالاسىندا ءوتتى.
«بارلىق قاتىسۋشىلاردى كەزەكتى جەڭىستەرىمەن قۇتتىقتايمىز. مەكتەپ باسشىلارىنا، مۇعالىمدەرگە كاسىبي شەبەرلىكتەرى مەن بىلىكتىلىكتەرى ءۇشىن العىسىمىزدى بىلدىرەمىز. اتا-انالارعا تاربيەسى مەن كۇندەلىكتى ەڭبەگى ءۇشىن العىسىمىز بولەك. اتاپ ايتسام، وليمپيادا جەڭىمپازدارى حالىقارالىق وليمپيادالارعا قاتىسۋعا دايىندالۋ ءۇشىن رەزەرۆكە الىنادى. سوندىقتان وقۋشىلارعا الداعى ۋاقىتتا دا بىلىمدەرىن بارىنشا جەتىلدىرىپ، تولايىم تابىستار مەن جاڭا جەتىستىكتەرگە جەتۋلەرىنە تىلەيمىز!، – دەدى «الماتى دارىنى» ورتالىعىنىڭ ديرەكتورى گۇلنار كارىمقاجى.
ەسكە سالساق، وسىدان بىرنەشە كۇن بۇرىن ششۋچە قالاسىندا 2-7 سىنىپ وقۋشىلارى XVIII رەسپۋبليكالىق «زەردە» بايقاۋىندا عىلىمي-زەرتتەۋ جۇمىستارى ۇسىنىلعان بولاتىن. الماتى قالاسىنىڭ قۇراما كومانداسى I دارەجەلى – 6، II دارەجەلى – 6، III دارەجەلى – 11 ديپلوم يەگەرلەرى اتانىپ، ەرەكشە جەتىستىكتەرى ءۇشىن بەس وقۋشى گراموتامەن ماراپاتتالدى.
مەكتەپ وقۋشىلارىنىڭ بايقاۋلارعا قاتىسۋى ولاردىڭ شىعارماشىلىق قابىلەتتەرىن، پراكتيكالىق بىلىمدەرىن دامىتۋعا، سونىمەن قاتار دارىندى بالالاردى انىقتاۋعا مۇمكىندىك بەرەدى. ايتا كەتەرلىگى، بيىل رەسپۋبليكالىق جارىستارعا قالامىزدان 93 بالا قاتىسىپ، ونىڭ ىشىندە 66 وقۋشى جۇلدەلى ورىندارعا يە بولدى.
