جاراتىلىستانۋ-ماتەماتيكالىق باعىتتاعى پاندەر بويىنشا رەسپۋبليكالىق وليمپيادانىڭ قورىتىندىسى جاريالاندى
جاراتىلىستانۋ-ماتەماتيكالىق باعىتتاعى پاندەر بويىنشا رەسپۋبليكالىق وليمپيادانىڭ قورىتىندىلارى بەلگىلى بولدى. بيىل زياتكەرلىك سايىستىڭ فينالدىق كەزەڭىنە ەلىمىزدىڭ تۇكپىر-تۇكپىرىنەن 955 ۇزدىك مەكتەپ وقۋشىسى ءوتتى. كوماندالىق ەسەپ بويىنشا الماتى قالاسىنىڭ قۇراما كومانداسى ءبىرىنشى ورىندى يەلەنىپ، «ۇزدىك وليمپيادالىق كوماندا» اتاعىنا يە بولدى، دەپ حابارلايدى aqshamnews.kz
وليمپيادانىڭ قورىتىندىسى بويىنشا گران-پري NIS وقۋشىلارىنا بۇيىردى. ءبىرىنشى ورىن الماتى قالاسى مەن ەلوردا جانە رەسپۋبليكالىق فيزيكا-ماتەماتيكا مەكتەبىنىڭ وقۋشىلارىنا بەرىلدى. ەكىنشى ورىندى پاۆلودار وبلىسىنىڭ كومانداسى يەلەنسە، ءۇشىنشى ورىنعا اقتوبە جانە شىعىس قازاقستان وبلىستارىنىڭ وقۋشىلارى يە بولدى.
وليمپيادا جەڭىمپازدارىنىڭ ءبىرى، الماتى قالاسىنداعى №126 مامانداندىرىلعان ليسەيدىڭ 11-سىنىپ وقۋشىسى جان شارحانوۆ ءوز اسەرىمەن ءبولىستى.
«مەن ءۇشىن وليمپياداعا قاتىسۋ – تەك ءبىلىمىمدى سىناۋ مۇمكىندىگى عانا ەمەس، سونىمەن قاتار ەلىمىزدىڭ ءار وڭىرىنەن كەلگەن بىلىمگە قۇشتار دوستارمەن تانىسۋعا ۇلكەن جول اشتى. الماتى كومانداسىنىڭ ءبىر مۇشەسى بولعانىما ماقتانامىن. ءبىز كوپ ەڭبەكتەندىك. بولاشاقتا عىلىممەن اينالىسۋدى ارماندايمىن. وسىنداي وليمپيادالار – سول ارمانعا اپارار العاشقى باسپالداق دەپ بىلەمىن»، – دەدى جان شارحانوۆ.
ايتا كەتەرلىگى، الماتى قالاسى ماتەماتيكا جانە گەوگرافيا پاندەرى بويىنشا رەسپۋبليكالىق وليمپيادانىڭ 325 قاتىسۋشىسىن قابىلدادى. وليمپيادا ەكى كەزەڭنەن تۇردى: تەوريالىق جانە دالالىق تۋر. ءبىرىنشى كەزەڭدە وقۋشىلار تەوريالىق ءبىلىمدى تەكسەرەتىن تاپسىرمالاردى ورىنداسا، ەكىنشى كەزەڭدە كۇردەلى ەسەپتەر مەن گەوگرافيا ءپانى بويىنشا دالالىق زەرتتەۋ جۇمىستارىن جۇرگىزدى.
«الماتى تاعى دا جوعارى دايىندىق دەڭگەيىن كورسەتىپ، كوماندالىق ەسەپتە ءبىرىنشى ورىندى يەلەندى. بۇل جەڭىس – وقۋشىلار مەن ولاردىڭ ۇستازدارىنىڭ تىنىمسىز ەڭبەگىنىڭ ناتيجەسى. ايتا كەتۋ كەرەك، الماتى قۇراماسى وسى اتاقتى قاتارىنان 23 جىل بويى ساقتاپ كەلەدى. بۇل – تۇراقتىلىقتىڭ، جۇيەلى جۇمىستىڭ جانە جوعارى ناتيجەلەردىڭ جارقىن كورىنىسى. بارشاڭىزدى جەڭىسپەن شىن جۇرەكتەن قۇتتىقتايمىن، الداعى ۋاقىتتا دا ساتتىلىك تىلەيمىن!» – دەدى جەڭىمپازداردى ماراپاتتاۋ راسىمىندە الماتى قالاسى ءبىلىم باسقارماسىنىڭ باسشىسى سايران سايفەدەنوۆ.
الماتى قالاسىنىڭ نامىسىن قورعاعان وقۋشىلار ق ر وقۋ-اعارتۋ مينيسترلىگىنىڭ I، II جانە III دارەجەلى ديپلومدارىمەن، التىن، كۇمىس جانە قولا مەدالدارمەن، سونداي-اق باعالى سىيلىقتارمەن ماراپاتتالدى. سونىمەن قاتار، ەرەكشە جەتىستىكتەرى ءۇشىن ەكى وقۋشى ق ر وقۋ-اعارتۋ مينيسترلىگىنىڭ «دارىن» رەسپۋبليكالىق عىلىمي-پراكتيكالىق ورتالىعىنىڭ قۇرمەت گراموتالارىن يەلەندى.