«جاقىنىڭا جاردەمدەس» اكسياسى جالعاسۋدا
الماتىدا «جاقىنىڭا جاردەمدەس» اكسياسى جالعاسىپ كەلەدى. بۇل باستاما «الماتى – ءبىزدىڭ ورتاق ءۇيىمىز» قالالىق ناۋقاننىڭ ءبىر بولىگى بولىپ تابىلادى جانە رەسپۋبليكالىق «تازا قازاقستان» باعدارلاماسى اياسىندا ءوتىپ جاتىر.
جاس ەرىكتىلەر قالانىڭ تۇكپىر-تۇكپىرىندە اۋلالاردى ارالاپ، ەرەكشە قامقورلىقتى قاجەت ەتەتىن جاندارعا – قارتتارعا، ارداگەرلەرگە، مۇمكىندىگى شەكتەۋلى ازاماتتارعا كومەك كورسەتىپ ءجۇر. اۋلانى تازالاۋ، ءۇي شارۋاسىنا جاردەمدەسۋ، ەمەن-جارقىن اڭگىمە – مۇنىڭ بارلىعىنا بالالار شىن جۇرەكتەن كىرىسكەن.
مىسالى، №200 مەكتەپ-گيمنازياسىنىڭ وقۋشىلارى اقجار شاعىن اۋدانىنىڭ تۇرعىنى زۋرە بەكبەرگەنوۆاعا كومەكتەستى: قوقىس شىعارىپ، اۋلا سىپىرىپ، اۋماقتى رەتكە كەلتىردى.
— ءبىز جاي عانا كەلىپ، كومەكتەستىك. بۇل قيىن ەمەس، ءبىراق اجە ءۇشىن ۇلكەن كومەك. بىزگە دە قۋانىش، – دەيدى قاتىسۋشىلاردىڭ ءبىرى.
ناۋرىزباي اۋدانىندا وقۋشىلار زەينەتكەر ايزەرە جۇمادىلگە قول ۇشىن سوزسا، قاراعايلىدا اتەرحان قاسىمبەكوۆاعا كومەك كورسەتتى.
— قارتتارعا مۇنداي كومەكتى كورسەتۋ – باسقالارعا ۇلگى بولۋ دەپ ەسەپتەيمىز. قالانى تازا ۇستاساق، ءومىر ءسۇرۋ دە جايلى بولا تۇسەدى، – دەيدى №192 مەكتەپتىڭ وقۋشىسى.
ەرىكتىلەر قولداۋ كورسەتكەندەر قاتارىندا تىل ەڭبەككەرى ۆەرا مامونتوۆا، 94 جاستاعى احمەتوۆ ءالىمحان، زويا قىدىروۆا جانە ت.ب. قالا تۇرعىندارى بار. ولار ءۇشىن بۇل اكسيا – جاي عانا اۋلا تازالىعى ەمەس، بۇل – قامقورلىق، نازار اۋدارۋ جانە جانىڭدا سەنىڭ جاعدايىڭا بەي-جاي قارامايتىن جانداردىڭ بار ەكەنىن سەزىنۋ.
اكسياعا الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنىڭ قىزمەتكەرلەرى دە اتسالىستى. سوڭعى اپتادا ولار 142 جالعىز تۇراتىن زەينەتكەر مەن مۇمكىندىگى شەكتەۋلى ادامعا كومەك كورسەتتى. ونىڭ ىشىندە 74 جاعدايدا اۋلالار تازالانىپ، ۇساق جوندەۋ جۇمىستارى مەن تۇرمىستىق شارۋالار اتقارىلدى.
