شەكتى بالدى 67%-عا جۋىق تالاپكەر جينادى.
ناۋرىز ايىنداعى ۇبت-نىڭ ەكى اپتاسىندا 54 مىڭنان استام ادام تەست تاپسىردى، دەپ حابارلايدى aqshamnews.kz عىلىم جانە جوعارى ءبىلىم مينيسترلىگىنە سىلتەمە جاساپ.
تەستىلەۋ ناتيجەسى بويىنشا ورتاشا بالل بەس ءپان بويىنشا 62 بالدى قۇراعان. ەڭ جوعارى بالل – 139، ونى الماتىلىق تالاپكەر جينادى.
تالاپكەرلەر ءۇش تىلدە تەست تاپسىردى:
قازاق تىلىندە - 67،4%؛
ورىس تىلىندە - 32،5%؛
اعىلشىن تىلىندە - 84 ادام.
تالاپكەرلەر تاڭداعان پاندەر:
"ماتەماتيكا-فيزيكا" پاندەر كومبيناسياسىن - 18،6%؛
"شىعارماشىلىق ەمتيحان" - 14،7%؛
"بيولوگيا-حيميا" كومبيناسياسىن - 13،3%؛
"حيميا-فيزيكا" پاندەر كومبيناسياسىن 65 ادام تاپسىرعان.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ناۋرىز ۇبت-سىنا 169 تالاپكەر قاتىستى.
تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى، بۇل جاعدايدا سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
"قازىرگى تاڭدا 57 ادامنىڭ ناتيجەسى جويىلدى. ونىڭ ىشىندە 26 تالاپكەر سمارتفون جانە شپارگالكا سياقتى تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى، ال تەستىلەۋ كەزىندە ەرەجەلەردى بۇزعانى ءۇشىن اۋديتوريادان 31 ادام شىعارىلدى. تەستكە باسقا ادامدى كىرگىزۋ فاكتىلەرى انىقتالعان جوق"، - دەلىنگەن حابارلامادا.
ايتا كەتسەك، 2025 جىلعى ۇبت اياقتالعاننان كەيىن 31 قازانعا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا تالاپكەردىڭ ۇبت ناتيجەلەرى جويىلادى.
ەستەرىڭىزگە سالا كەتسەك، ناۋرىز ۇبت-سى 1 ناۋرىز بەن 6 ءساۋىر ارالىعىندا وتەدى. تەستىلەۋگە قاتىسۋعا 163 مىڭعا جۋىق تالاپكەر نيەت بىلدىرگەن.