ەل اۋماعىندا 24 اقپان مەن 24 ناۋرىز ارالىعىندا دۇنيەجۇزىلىك تۋبەركۋلەزگە قارسى كۇرەس كۇنىنە ورايلاستىرىلعان تۋبەركۋلەز اۋرۋىنىڭ الدىن الۋعا ارنالعان ايلىق وتكىزىلىپ جاتىر.
وسى ءىس-شارا اياسىندا الماتى قالاسى بويىنشا قاجد №11 مەكەمەسىندەگى سوتتالعان بالالار اراسىندا الماتى قالاسى №24 ەمحاناسىنىڭ دارىگەرى ءلاززات دۇيسەنباي مەن فتيزياتر دارىگەر ءاليا بيمبەتوۆا ءاقپاراتتىق-تۇسىندىرۋ جۇمىستارىن وتكىزدى، دەپ حابارلايدى aqshamnews.kz Polisia.kz-كە سىلتەمە جاساپ.
دارىگەرلەر بالالارعا تۋبەركۋلەزدىڭ العاشقى بەلگىلەرى، مەديسينالىق كومەككە ۋاقىتىلى جۇگىنۋدىڭ ماڭىزدىلىعى جانە ەمدەۋدىڭ تيىمدىلىگى تۋرالى ءتۇسىندىردى. "ءبىز تۋبەركۋلەزدى جەڭەمىز!" دەگەن ۇرانمەن وتكىزىلىپ جاتقان ايلىق تۋبەركۋلەزگە قارسى بىرلەسكەن ءىس-شارالار وتكىزۋ، ءقاۋىپتى اۋرۋدىڭ جاھاندىق تارالۋىنا توسقاۋىل قويۋ جۇمىستارىن جانداندىرۋ قاجەتتىگىن اتاپ كورسەتەدى. سونداي-اق ماماندار جاستار اراسىندا سالاۋاتتى ءومىر سالتىن ۇستانۋ تۋرالى اڭگىمەلەسىپ، ولاردىڭ سۇراقتارىنا جان-جاقتى جاۋاپ بەردى. سوتتالعان بالالار جازاسىن وتەيتىن №11 مەكەمەدە دەنساۋلىق ساقتاۋ مينيسترلىگىنىڭ بۇيرىقتارىمەن بەكىتىلگەن بارلىق نورما قاتاڭ ساقتالادى.
بالالار مەكەمەگە كەلگەننەن كەيىن ءۇش تاۋلىك ىشىندە فليۋوروگرافيالىق تەكسەرۋدەن وتەدى جانە قازاقستان رەسپۋبليكاسىنىڭ باس مەملەكەتتىك سانيتارلىق دارىگەرىنىڭ قاۋلىسىمەن بەلگىلەنگەن سانيتارلىق-دەزينفەكسيالىق رەجيمدى ساقتاۋ جۇمىستارى قاتاڭ قاداعالانادى.
اقپارات كوزى Polisia.kz سايتىندا: https://polisia.kz/almatydaghy-balalar-koloniyasynda-tuberkulezge-qarsy-tusindiru-zhumysy-zhurgizildi/