قوسىمشانى Google Play جانە App Store ارقىلى جۇكتەپ الۋعا بولادى.
الماتى قالاسىنىڭ №15 گيمنازياسىنىڭ وقۋشىسى تيمۋر قىرباسوۆ ولكەنىڭ تاريحىن زەرتتەۋگە ارنالعان ەرەكشە قوسىمشا ويلاپ تاپتى، دەپ حابارلايدى Almaty-akshamy.kz
مينيسترلىكتىڭ مالىمەتىنشە، باعدارلاما كوشە نەمەسە ايالداماعا جاقىنداعان كەزدە اۆتوماتتى تۇردە نىسان تۋرالى پايدالى، تانىمدىق تاريحي اقپارات بەرەدى.
"جوبا "مەنىڭ قالامنىڭ، ەلىمنىڭ تاريحىن زەرتتەۋدە ICT-تەحنولوگيالاردى قولدانۋ" دەپ اتالادى. بۇل بۇعان دەيىن ءوزىم دايىنداعان ەكى شاعىن قوسىمشانىڭ بىرىكتىرىلگەن نۇسقاسى. ءبىرىنشىسى - قوعامدىق كولىكتەگى ەسكەرتۋ جۇيەسىن جاڭارتۋ ارقىلى قالا تاريحىن تانىستىرۋ. بۇل يدەيا – قالاداعى قوعامدىق كولىكتەردەگى دىبىستى حابارلامالار ارقىلى تاريحي اقپاراتتى قوسۋ"، – دەيدى تيمۋر قىرباسوۆ.
ەكىنشىسى "AIALDAMA" ءموبيلدى قوسىمشاسى ەكەن.
"مەن ازىرلەگەن ءموبيلدى قوسىمشانى پايدالانۋشى كوشەنى كەسىپ وتكەن ساتتە كوشەگە قاتىستى نەمەسە سول جەردەگى نىساندار تۋرالى اقپارات بەرەدى. جوبانىڭ ماقساتى – وقۋشىلارعا ەل تاريحىن كۇندەلىكتى ومىردە زەرتتەۋگە كومەكتەسۋ"، – دەيدى جاس تالاپكەر.
تيمۋر تاريحتى ءبىلۋ وتە ماڭىزدى دەپ سانايدى. بۇعان قوسا ول ءۇش جوباسىنىڭ اۆتورلىق قۇقىعىن قورعاعان. سوڭعى ءۇش جىلدا حالىقارالىق جانە رەسپۋبليكالىق عىلىمي جوبالاردىڭ جۇلدەلەرىن يەلەندى. ال 2022 جىلعى 1 ماۋسىمدا تيمۋر "الماتى بالاFest" قالالىق فەستيۆالىندە مەملەكەت باسشىسىنىڭ نۇسقاۋشىسى بولعان.