بۇگىنگى باسەكەگە قابىلەتتى جاس ۇرپاق ومىرىمىزگە ەركىن ەنگەن اقپاراتتىق تەحنولوگيالاردى دا ابدەن مەڭگەرىپ الدى. سودان بولار، وركەنيەتتىڭ ءتول تۋىندىسى، IT سالاسىنا قىزىعۋشىلىق تانىتپايتىن جاس كەمدە-كەم. سونداي تالانتتى جاستىڭ ءبىرى – الماتىداعى №17 مەكتەپ-ينتەرناتىنىڭ 7-سىنىپ وقۋشىسى اينۇر ەلمۇرات قىزى استانا قالاسىندا وتكەن Web Xakaton فورماتىنداعى IT وليمپياداسىنا قاتىسىپ، 1-ورىندى جەڭىپ الدى.
جاس تالانتتاردىڭ قيالى ۇشقىر
Web Xakaton وليمپياداسى ەكى كەزەڭدى قامتىدى. الدىمەن قاتىسۋشىلار ونلاين، سوسىن وفلاين فورماتتا سايىسقا ءتۇستى. بايقاۋعا قاتىسۋشىلار استانا قالاسىندا باس قوسىپ، 450-دەن استام ۆەب-سايت ازىرلەۋشىلەر مەن ۆەب-ديزاينەرلەر IT سالاسى بويىنشا ب ا ق سىنادى. جاس ىزدەنۋشىلەردىڭ جىبەرگەن جۇمىستارى 4 نوميناسيا بويىنشا ىرىكتەلىپ، ەڭ ۇزدىك 40 بالا فينالعا جولداما الادى. ولار جاس ەرەكشەلىكتەرىنە قاراي «سالاۋاتتى ءومىر سالتى»، «قالدىقسىز ءومىر» تاقىرىبىندا سايت جاساپ جارىستى. بايقاۋعا ءتورەلىك جاساعان ءادىلقازىلاردىڭ ايتۋىنشا، جاس ونەرتاپقىشتاردىڭ جۇمىستارى كاسىبي ماماننىڭ جۇمىسىنا پارا-پار. «جاس تالانتتاردىڭ قيالى ۇشقىر، عىلىمي جوبالارى كۇردەلى»، – دەپ جوعارى باعا بەردى. ولاردىڭ جوبالارىنىڭ ءبىرازىنا ءقازىردىڭ وزىندە سۇرانىس ءتۇسىپ جاتقان كورىنەدى.
سونىمەن، وسىناۋ دوداعا قاتىسىپ، الماتى قالاسىنىڭ نامىسىن قورعاعان اينۇر ەلمۇرات قىزىنىڭ بولاشاعىنان زور ءۇمىت كۇتۋگە بولادى. ول ءقازىردىڭ وزىندە IT سالاسىن تەرەڭ زەرتتەپ، ءوزىنىڭ عىلىمي جوباسىن ءازىرلەۋ ۇستىندە.
– استانا قالاسىنا عىلىمي جەتەكشىم گۇلزات بالعىمبايەۆا اپايىم ەكەۋمىز باردىق. جالپى، Web Xakaton بايقاۋىنا ءبىزدىڭ سىنىپتان مەن عانا قاتىستىم. الدىمەن ونلاين قاتىسىپ كورىپ ەدىم. جوبالارىم جوعارى باعا الدى. استانادان شاقىرتۋ كەلگەندە قاتتى قۋاندىم ءارى قاتتى تولقىدىم. بىزگە جاس ەرەكشەلىكتەرىمىزگە قاراي تاپسىرمالار بەرىلدى. ماعان «قارجىلىق ساۋاتتىلىق» تاقىرىبىنا ۆەب سايت جاساپ شىعۋ تاپسىرىلدى. ءوز جۇمىسىما ءموبيلدى قوسىمشالار جاساۋعا ارنالعان باعدارلامالاردى قولداندىم. ءادىلقازىلار الدىنا شىعىپ، ءوز جوبامدى قورعاپ شىقتىم. بولاشاقتا وسى IT سالاسىنىڭ مامانى بولسام دەيمىن. دالىرەگى، باعدارلاماشى بولام دەپ شەشتىم. بۇل سالادا كوبى اعىلشىن تىلىندە بولعاندىقتان، ارنايى كۋرسقا بارىپ ءجۇرمىن. وتباسىمىزدا بەس بالامىز. اتا-انام مەنىڭ جەڭىسىمە قۋانىپ، قولداۋ ءبىلدىرىپ جاتىر. مەكتەپتە سالتاناتتى جيىن بولىپ، مەنى ديرەكتورىمىز اينۇر ەرۇلان قىزى بارلىق ۇجىم اتىنان قۇتتىقتادى.
دارىندى بالا دارا شىقتى
وسى مەكتەپتىڭ تاعى ءبىر ماقتانىشى – شىڭعىس اسحات ۇلى جاس دارىنداردى قولداۋ ماقساتىندا وتكىزىلگەن رەسپۋبليكالىق «جاس IT دارىن» بايقاۋىنا قاتىسىپ، جەڭىمپاز اتاندى.
ق ر ىشكى ىستەر مينيسترلىگىنىڭ قولداۋىمەن ماقان ەسبولاتوۆ اتىنداعى الماتى اكادەمياسىندا وتكەن بۇل بايقاۋدا شىڭعىستىڭ «كيبەر قاۋىپسىزدىك» دەپ اتالاتىن عىلىمي زەرتتەۋ جۇمىسى ەڭ ۇزدىك دەپ تانىلدى. جالپى، اتالمىش بايقاۋعا 300 جاس ونەرتاپقىش قاتىسسا، ولاردىڭ تەك 30-ى عانا فينالعا ءوتتى.
– مەن بولاشاقتا IT سالاسىنىڭ كيبەر قاۋىپسىزدىگىن تەرەڭ زەرتتەسەم دەيمىن. ءويتكەنى، بۇل قازىرگى تاڭداعى ەڭ وزەكتى ماسەلە. وسى بايقاۋعا قاتىسۋىما عىلىمي جەتەكشىم نازىم ساتبايەۆانىڭ ەڭبەگى وتە زور بولدى، – دەيدى دارىندى جاس.