الماتى اكىمى ەربولات دوسايەۆ وليمپيادا ويىندارىنىڭ جۇلدەگەرلەرىن اقشالاي جانە تۇرعىن ءۇي سەرتيفيكاتىمەن ماراپاتتاپ، اۆتوكولىكتەردىڭ كىلتىن تابىس ەتتى، دەپ حابارلايدى aqshamnews.kz
الماتى اكىمى ەربولات دوسايەۆ پاريجدە وتكەن وليمپيادا ويىندارىنا قاتىسقان الماتىلىق سپورتشىلارمەن كەزدەستى.
شاھار باسشىسى سپورتشىلار مەن جاتتىقتىرۋشىلاردى وليمپيادانىڭ كۇمىس جۇلدەگەرى – گيمناست ناريمان قۇربانوۆتى، قولا جۇلدەگەرلەر - دزيۋدوشى عۇسمان قىرعىزبايەۆتى، بوكسشى نازىم قىزايبايدى جانە وق اتۋدان سايىسقا تۇسكەن مەرگەندەر الەكساندرا لە مەن يسلام ساتبايەۆتى جەتىستىكتەرىمەن قۇتتىقتادى.
«ۇلتتىق قۇراما ساپىندا ونەر كورسەتكەن الماتىلىق سپورتشىلاردىڭ قازاقستان قورجىنىنا كوپ مەدال سالعانى قۋانتادى. تالانتتارىڭىزدىڭ، تاباندىلىعىڭىزدىڭ جانە ەڭبەكقورلىعىڭىزدىڭ ارقاسىندا سىزدەر ماڭىزدى دا تاريحي جەڭىسكە قول جەتكىزىپ، حالىقتىڭ ىستىق ىقىلاسىنا يە بولدىڭىزدار، الەمدىك سپورتتىڭ دامۋىنا ۇلەس قوستىڭىزدار. سىزدەر سۇيىكتى ءىسىڭىز بەن تۋىپ-وسكەن ەلىڭىزگە دەگەن سۇيىسپەنشىلىگىڭىزدىڭ جارقىن ۇلگىسىسىزدەر»، - دەدى الماتى اكىمى.
ەربولات دوسايەۆ ناريمان قۇربانوۆقا ەكى بولمەلى پاتەردىڭ، ال عۇسمان قىرعىزبايەۆقا، نازىم قىزايبايعا، الەكساندرا لە مەن يسلام ساتبايەۆقا ءبىر بولمەلى پاتەردىڭ سەرتيفيكاتىن تابىس ەتتى. سونىمەن قاتار، سپورتشىلارعا 5 جانە 4 ميلليون تەڭگەدەن اقشالاي سەرتيفيكاتتار جانە جاڭا اۆتوكولىكتەردىڭ كىلتى تابىستالدى. اكىمدىك بەرگەن تۇرعىن ءۇي سەرتيفيكاتىمەن بىرگە ناريمان قۇربانوۆقا دەمەۋشىلەر ەسەبىنەن تاعى ءبىر پاتەر سىيعا بەرىلدى.
وليمپيادادا ەلدىڭ نامىسىن قورعاعان بارلىق الماتىلىق سپورتشى مەن باپكەرلەر قۇرامى اقشالاي سەرتيفيكاتتارمەن ماراپاتتالدى.
كەزدەسۋدە وليمپياداشىلار الماتىلىقتار مەن بۇكىل قازاقستان حالقىنىڭ قولداۋىن سەزىنگەنىن، جارىس كەزىندە جىگەرىن جانىپ، جەڭىسكە جەتەلەگەنىن ايتتى. سونداي-اق، ولار قالا باسشىسى ەربولات دوسايەۆقا نازاردان تىس قالدىرماي، اكىمدىك تاراپىنان كوڭىل بولگەنى ءۇشىن العىس ءبىلدىردى.
ەستەرىڭىزگە سالا كەتەيىك، 2024 جىلدىڭ 26 شىلدەسىنەن 11 تامىزىنا دەيىن پاريجدە وتكەن XXXIII جازعى وليمپيادا ويىندارىندا الماتىلىق سپورتشىلار 1 كۇمىس جانە 3 قولا جۇلدە، جالپى جيىنى 4 مەدال جەڭىپ الدى.
انىقتاما ءۇشىن: «Astana Motors» جانە «Orbis Auto» كومپانيالارىنىڭ دەمەۋشىلىگىمەن ناريمان قۇربانوۆ Hyundai Santa Fe اۆتوكولىگىن، عۇسمان قىرعىزبايەۆ پەن يسلام ساتبايەۆ Hyundai Tucson كروسسوۆەرىن، نازىم قىزايباي مەن الەكساندرا لە Zeekr X جول تالعامايتىن كولىگىن الدى.
