الماتىلىق نەيروحيرۋرگتەر ىشتەي كوپتەگەن كەمىستىكتەرمەن تۋعان نارەستەگە وتا جاسادى
ىشتەي وكپەسى قابىنىپ، ومىرتقا، جۇلىن اقاۋلارىمەن تۋعان قىز بالا تالدىقورعانداعى وبلىستىق بالالار اۋرۋحاناسىنان سانيتارلىق اۆياسيا ارقىلى جەتكىزىلگەن. الماتىداعى №2 بالالار قالالىق كلينيكالىق اۋرۋحاناسىنىڭ كەزەكشى دارىگەرلەرى نارەستەنى قاراپ شىققاننان كەيىن بىردەن جان ساقتاۋ بولىمىنە اۋىستىردى. كومپيۋتەرلىك توموگرافيا ناتيجەسىندە ونىڭ ىشتەي ومىرتقا كەمىستىگىمەن تۋىلىپ، جۇلىنىندا ۇلكەن جارىق بارى انىقتالدى.
اۋرۋحانا باسپا ءسوز قىزمەتى تاراتقان حابارلاماعا سۇيەنسەك، ايى-كۇنى جەتىپ تۋعان بالانىڭ دۇنيەگە كەلگەنىنە 4-اق كۇن بولعان. اناسىنىڭ ايتۋىنشا، نارەستە بەل ومىرتقاسى مەن سەگىزكوز تۇسىنداعى ىسىك تارىزدەس وسكىن سالدارىنان قاتتى مازاسىزدانادى ەكەن.
«نارەستە اسا اۋىر حالدە بولدى. سەبەبى ىشتەن بەل ومىرتقا مەن سەگىزكوز تۇسىندا مي-جۇلىن جارىعىمەن تۋعان. ونىڭ ۇستىنە، اياقتارىنىڭ قوزعالىسى شەكتەلگەن (تومەنگى پاراپارەز)؛ اياق-قولىندا قان اينالىمى بۇزىلىپ، بۇلشىق ەتتەرى سەمە باستاعان؛ جامباس قۋىسىنداعى بۇزىلىس سالدارىنان دارەتى تۇرمايدى؛ باسىنىڭ كولەمى كىشكەنتاي بولىپ تۋىلاتىن نەمەسە تۋعاننان كەيىن وسپەي قالاتىن ميكروسەفاليا اۋرۋى؛ ەكى جاقتى پوليسەگمەنتارلى پنيەۆمونيا دياگنوزى جاعدايدى قيىنداتا ءتۇستى. سەگىزكوز تۇسىنداعى جارىق ومىرتقا جولىن جاۋىپ تاستاعان»، - دەيدى №2 بقكا ديرەكتورى مارات راباندياروۆ.
جەتەكشى بالالار نەيروحيرۋرگتەرى م.راباندياروۆ، ا.جاراسوۆ، ا.جايلعانوۆ، د.سابدەنالييەۆ، ر.تانساروۆا، ك.جانايداروۆ، گ.سۇلەيمانوۆا مەن انەستەزيولوگ ج.شولاحوۆتىڭ قاتىسۋىمەن كونسيليۋم ءوتتى.
نەيروحيرۋرگيا بولىمشەسى مەڭگەرۋشىسى دانيار سابدەنالييەۆتىڭ ايتۋىنشا، بالانىڭ جاعدايىن، جۇلىنداعى جارىقتىڭ جارىلىپ، اعزاعا ينفەكسيا تارالۋ ءقاۋپىن ەسكەرە وتىرىپ وتا جاساۋ تۋرالى شەشىم قابىلداندى. وپەراسيالىق ميكروسكوپتىڭ كومەگىمەن جۇلىنداعى جارىق الىپ تاستالدى، توڭىرەگىندەگى تىندەرمەن پلاستيكا جاسالدى.
وپەراسيا مىندەتتى الەۋمەتتىك مەديسينالىق ساقتاندىرۋ شەڭبەرىندە تەگىن جاسالدى. ەستەرىڭىزگە سالا كەتسەك، قازاقستاندا 18 جاسقا دەيىنگى بالالار مەملەكەت تاراپىنان ساقتاندىرىلاتىن 15 ساناتقا جاتادى.
«جاقسى ناتيجەگە قول جەتكىزدىك. جۇلىنداعى سۇيىقتىقتىڭ جارادان سىرتقا اعىپ كەتۋ ءقاۋپى سەيىلدى، ءقازىر جارا ورنى جازىلىپ كەلەدى. اياقتاردىڭ قوزعالىسى ساقتالىپ قالدى، ياعني تەرىس ديناميكا جوق. پنيەۆمونيا اۋرۋىنان دا جازىلىپ كەلەدى. تاعى ءبىر قۋانتاتىنى، ميىنا كومپيۋتەرلىك توموگرافيا جاسالدى، گيدروسەفاليا بەلگىلەرى بايقالمايدى. ادەتتە، مۇنداي وتا جاسالعان بالالاردىڭ ميىنا سۇيىقتىق جينالادى. جالپى، الداعى ۋاقىتتا باقىلاۋدا ۇستاۋ كەرەك. ءقازىر جاساندى تىنىستاۋ اپپاراتىنان الىندى، بالا وزىنشە تىنىس الادى. الداعى ۋاقىتتا تۇرعىلىقتى جەرىندەگى وبلىستىق بالالار اۋرۋحاناسىنا اۋىستىرۋ جوسپارلانىپ وتىر»، - دەدى نەيروحيرۋرگ.
ءسابيدىڭ اناسى كىشكەنتاي پاسيەنتكە كۇردەلى وتا جاساپ، ءومىرىن ساقتاپ قالعان №2 بقكا دارىگەرلەرىنە العىسىن جاۋدىردى.