تالاپكەرلەر «وقۋ ساۋاتتىلىعى» ءپانىن ەڭ جاقسى تاپسىرعان. بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ ونلاين بريفينگى بارىسىندا ق ر عىلىم جانە جوعارى ءبىلىم مينيسترلىگىنىڭ ۇلتتىق تەستىلەۋ ورتالىعى ديرەكتورىنىڭ ورىنباسارى ناۋجان ديداربەكوۆا مالىمدەدى.
الماتىدا 21 مىڭنان استام ادام قاڭتار ايىنداعى ۇبت-نى تاپسىردى. ونىڭ ىشىندە تالاپكەرلەردىڭ 67،2% – ى قازاق تىلىندە، 32،7% - ى ورىس تىلىندە، 11 ادام اعىلشىن تىلىندە تەستىلەۋدەن ءوتتى.
ۇبت-دا شەكتى بالدى 81% جۋىق تالاپكەر جينادى. ورتاشا بالعا كەلەتىن بولساق، ول 71 بالدى قۇرادى، بۇل رەسپۋبليكا بويىنشا ناتيجەدەن 2 بالعا جوعارى. ەڭ جوعارى بالل – 134.
«2024 جىلعى قاڭتار ۇبت-سىنىڭ قورىتىندىسى بويىنشا تالاپكەرلەر «وقۋ ساۋاتتىلىعى» ءپانىن ەڭ جاقسى تاپسىردى. ورتاشا ەسەپپەن، سۇراقتاردىڭ 78%-ىنا دۇرىس جاۋاپ بەرىلگەن. ال «فيزيكانى» تاپسىرعان تالاپكەرلەر تەك 36% تاپسىرمانى دۇرىس ورىنداعان، ولار ءۇشىن «سالىستىرمالىلىق تەورياسىنىڭ ەلەمەنتتەرى» تاقىرىبى قيىن بولدى. وسىلايشا، ۇبت ناتيجەلەرى بويىنشا ءبىز تەك ساندار ەمەس، سونىمەن قاتار تاقىرىپتار بويىنشا ەگجەي-تەگجەي تالداۋدى دا قولجەتىمدى»، - دەپ حابارلادى ن.ديداربەكوۆا.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا قاڭتار ۇبت-سىنا 41 تالاپكەر قاتىسقانىن ايتا كەتكەن ءجون.
ۇبت وتكىزۋ بارىسىندا 27 ەرەجە بۇزۋشىلىق انىقتالعان. ونىڭ ىشىندە 19 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 8 ادام شىعارىلىپ، ولاردىڭ ناتيجەلەرى جويىلدى. بوگدە تۇلعالار انىقتالعان جوق.
تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الدى. سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
سپيكەر 2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەتىنىن ناقتىلاپ ايتتى.
«تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى»، - دەپ ەسكەرتتى ن. ديداربەكوۆا.
قاڭتارداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان، جازعى ۇبت ناتيجەلەرى بويىنشا شەكتى بالل جيناماعاندار، شىعارماشىلىق ببت-دان باسقا دايىندىق باعىتتارىنا، پەداگوگيكالىق باعىتقا اقىلى نەگىزدە اۋىسقىسى كەلەتىندەر، سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىستى.