الماتىلىق نەيروحيرۋرگتەر ناۋقاستىڭ ومىرتقاسىنا اۋىرۋدى باساتىن ەلەكترود ورناتتى
وڭتۇستىك استاناداعى ورتالىق قالالىق كلينيكالىق اۋرۋحانادا تۇڭعىش رەت ومىرتقاعا جۇلىن ستيمۋلياتورىن ورناتتى. جوعارى تەحنولوگيالى وتا مىندەتتى الەۋمەتتىك مەديسينالىق ساقتاندىرۋ ەسەبىنەن جاسالدى، دەپ حابارلايدى Almaty-akshamy.kz
وقكا باسپا ءسوز قىزمەتىنىڭ دەرەگىنشە، بىرەگەي وپەراسيا ومىرتقانى ەمدەگەننەن كەيىن مازالايتىن اۋىرسىنۋ سەزىمىن جويۋعا كومەكتەسەدى.
جىلدار بويى بەل اۋرۋىنىڭ زاردابىن تارتقان ايەل اياعىن باسا الماي قالاتىن. بۇعان دەيىن ماماندار ونىڭ بەل اۋرۋىنا سەبەپ بولعان ومىرتقاداعى جارىقتى الىپ تاستاسا دا اۋىرسىنۋ سەزىمى باسىلا قويماپتى. ءتىپتى دارى-دارمەكتەر دە كومەكتەسپەگەن كورىنەدى.
وپەراسيانى وقكا دارىگەرى مارات الماتوۆ رەسەيلىك نەيروحيرۋرگ، نوۆوسيبيرسك قالاسىنداعى فەدەرالدى نەيروحيرۋرگيا ورتالىعىنىڭ بولىمشە مەڭگەرۋشىسى الەكساندر دميترييەۆپەن بىرلەسىپ جاسادى.
وتا بارىسىندا ناۋقاستىڭ ومىرتقاسىنا اۋىرۋدى باساتىن تۇراقتى ەلەكترودتار ورناتتى. ەلەكترودتار جۇيكە تالشىقتارىنا يمپۋلس بەرىپ، اۋىرسىنۋ سەزىمىن باسىپ وتىرادى. سونىمەن قاتار، بۇل ءادىس باس، ارقا مەن اياقتىڭ اۋىرعانىن باسادى دەيدى ماماندار.
«باسىندا ءبىز ەلەكترمەن ستيمۋلياسيالاۋ قانشالىقتى ناتيجە بەرەتىنىن كورۋ ماقساتىندا ەلەكترودتى ومىرتقا كانالىنا ورناتتىق. ارنايى پۋلت پاسيەنتكە قۇرىلعىنى ىسكە قوسىپ، ءيمپۋلستىڭ امپليتۋداسىن رەتتەۋگە مۇمكىندىك بەرەدى. ناۋقاسقا كومەگى تيگەنىنە كوز جەتكىزگەن سوڭ تەرىنىڭ استىنا تۇراقتى گەنەراتور ورناتتىق. ەندى پاسيەنت اپپاراتتى قاجەت كەزدە قوسىپ، اۋىرۋى باسىلعان سوڭ ءوشىرىپ تاستاسا بولادى»،- دەيدى مارات الماتوۆ.
ءقازىر جاعدايى جاقسارىپ، اۋىرسىنۋ سەزىمىنەن ارىلعان ايەلدىڭ دارىگەرلەرگە ايتار العىسى شەكسىز.
«ارقامنىڭ اۋىرعانىنا كوپ جىلدار بولدى. توقتاماستان اۋىرعان كەزدە جانىم كوزىمە كورىنەتىن. كۇن سايىن ىشەتىن كۇشتى پرەپاراتتاردان دا ناتيجە بولمادى. ۇيقىم تىنىش، جانىم جاي تاپتى. دارىگەرلەرگە العىستان باسقا ايتارىم جوق. التىن قولدى ماماندار الداعى ۋاقىتتا وسى ادىسپەن قانشاما ادامنىڭ جانىنا اراشا ءتۇسىپ، اۋرۋىن جەڭىلدەتەتىنىن ويلاسام قۋانامىن»، - دەيدى ول كوزىنە جاس الىپ.
مسق الماتى قالالىق فيليالى ديرەكتورى تىلەۋحان ابىلدايەۆتىڭ سوزىنە سۇيەنسەك، ەندى بۇل قىزمەت ورتالىق قالالىق كلينيكالىق اۋرۋحانادا ءمامس ەسەبىنەن كورسەتىلە باستاماق.
«بۇل وپەراسيانى مەديسينا سالاسىنداعى سونى جەتىستىكتەردىڭ ءبىرى دەۋگە بولادى. ول ومىرتقاسى اۋىراتىن تالاي پاسيەنتتىڭ اۋىرۋىن جەڭىلدەتەرى انىق. جوعارى تەحنولوگيالاردىڭ كومەگىمەن جاسالاتىن مۇنداي قىزمەتتەردىڭ باعاسى قىمبات بولسا. دەگەنمەن وپەراسيانى ءمامس قاراجاتى ەسەبىنەن جاساتۋعا ابدەن بولادى»، - دەدى تىلەۋحان ابىلدايەۆ.