9 جاستاعى بالانىڭ دەرتى كوزىنىڭ قاراۋىتىپ، باسى اينالىپ قۇلاپ قالعاننان كەيىن باستالعان. اناسىنىڭ ايتۋىنشا، تىركەلگەن ەمحاناداعى ۋچاسكەلىك دارىگەر ونى بىردەن نەيروحيرۋرگكە جىبەرگەن. الايدا كوپ ۇزاماي بالانىڭ جاعدايى كۇرت ناشارلاپ، السىزدىك، جۇرەك اينۋ جانە قۇسۋ سياقتى بەلگىلەر پايدا بولا باستاعان، دەپ حابارلادى №2 قالالىق كلينيكالىق بالالار اۋرۋحاناسىنىڭ (قكبا) باسپا ءسوز قىزمەتى.
اۋرۋحانانىڭ كونسۋلتاتيۆتىك-دياگنوستيكالىق ورتالىعىنىڭ دارىگەرلەرى ناۋقاستىڭ باسىنا كومپيۋتەرلىك توموگرافيا جاساپ، كولەمدى ىسىكتى انىقتادى. نەيروحيرۋرگتەر شۇعىل تۇردە وتا جاساۋ ءۇشىن ونى نەيروحيرۋرگيا بولىمشەسىنە جاتقىزۋ تۋرالى شەشىم قابىلدادى.
شۇعىل شاقىرىلعان كونسيليۋم ناتيجەسىندە بالاعا تومەندەگىدەي كۇردەلى دياگنوزدار قويىلدى: مي دىڭىندە كولەمدى ىسىك، قان قۇيىلۋ، قايتالاما ىشكى گيدروسەفاليا، بۋلبار سيندرومى، اتاكسيا جانە سول جاق گەميپارەزى.
قازاق ۇلتتىق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ماماندارى جاساندى تىنىستاۋ اپپاراتىنا قوسىلعان، ەس-تۇسسىز جاتقان بالانىڭ اۋىر جاعدايىن ەسكەرە وتىرىپ، حيميالىق نەمەسە ساۋلەلى تەراپيا ءتيىمدى ناتيجە بەرە المايتىنىن مالىمدەدى. ونىڭ ۇستىنە، حيميا تەراپيا ءالسىز اعزانى ودان ءارى السىرەتۋى مۇمكىن ەدى.
الايدا №2 قكبا ماماندارى قول قۋسىرىپ قاراپ وتىرماي، وتانى باستاۋعا بەل بۋدى.
«ناۋقاستىڭ اۋىر ءحالىن، ميدىڭ ءدىڭى زاقىمدانعانىن ەسكەرە وتىرىپ، ىسىكتى ينتراوپەراسيالىق نەيرومونيتورينگ پەن نەيروناۆيگاسيانى پايدالانىپ، ميكروحيرۋرگيالىق تاسىلمەن الىپ تاستاۋ تۋرالى كۇردەلى شەشىم قابىلداندى. وتانىڭ ماقساتى – بۋلبار سيندرومىن باسىپ، ميعا ءتۇسىپ تۇرعان قىسىمدى تومەندەتۋ. اسقان دالدىكتى تالاپ ەتەتىن بۇل كۇردەلى وپەراسيا ءمامس ەسەبىنەن جاسالدى»، – دەدى №2 قكبا باس دارىگەرى مارات راباندياروۆ.
نەيروحيرۋرگيا بولىمشەسىنىڭ مەڭگەرۋشىسى دانيار سابدەنالييەۆتىڭ ايتۋىنشا، 4،5 ساعاتقا سوزىلعان وتا ءساتتى اياقتالدى. وپەراسياعا نەيروحيرۋرگ ا.جايلعانوۆ، انەستەزيولوگ ا.سەيتكارىم، اسسيستەنت ر.تانساروۆا جانە مەدبيكە ب.شاگەنوۆا قاتىستى.
«وپەراسيادان كەيىنگى كەزەڭ قالىپتى جاعدايدا ءوتتى. كومادا جاتقان بالا ەسىن جيا باستادى. ەكىنشى كۇنى ول جاساندى تىنىستاۋ اپپاراتىنان اجىراتىلىپ، ءوز بەتىنشە دەم الا باستادى. جاعدايى تۇراقتانىپ، جاقسارعان سوڭ، ناۋقاس اۋرۋحانادان شىعارىلدى. ءارى قاراي ول پەدياتريا جانە بالالار حيرۋرگياسى ۇلتتىق ورتالىعىندا جوسپارلى تۇردە حيميا تەراپيا قابىلدايدى»، – دەپ ءتۇسىندىردى ول.
بالالار نەيروحيرۋرگى مارات راباندياروۆ باستاعان 20-دان استام دارىگەر بالانىڭ ءومىرىن ساقتاپ قالۋ ءۇشىن بارىن سالدى. بىلىكتى ماماندار كۇردەلى وتانى زەرگەرلىك دالدىكپەن ورىنداپ، مي ىسىگىنەن زارداپ شەككەن بالانىڭ دەنساۋلىعىن تۇراقتاندىردى.
ەس-تۇسسىز جاتقان، جۇرەك قاعىسى بۇزىلعان جانە ءوز بەتىنشە تىنىستاي الماعان بالانىڭ جاعدايىن تۇراقتاندىرىپ قانا قويماي، وپەراسيادان كەيىن قالپىنا كەلۋىنە دە زور ۇلەس قوستى.