الماتىلىق دارىگەرلەر موينى سىنعان ادامنىڭ ءومىرىن اراشالاپ قالدى.
№4 قكا دارىگەرلەرى موينى سىنعان ەر ادامدى مۇگەدەكتىكتەن امان الىپ قالدى. دارىگەرلەر جاڭا ادىسكە جۇگىنىپ، اۋرۋحانادا بۇرىن-سوڭدى جاسالماعان وتا جاسادى، دەپ حابارلايدى Almaty-akshamy.kz.
48 جاستاعى ناۋقاس اۋرۋحاناعا مويىن ومىرتقاسى قاتتى اۋىرعانىنا شاعىمدانىپ ءتۇستى. اۋىرعانى سونشا، ول ءتىپتى باسىن بۇرا الماي قالدى. تەكسەرۋدەن كەيىن ناۋقاس شۇعىل تۇردە نەيروحيرۋرگيا بولىمشەسىنە جاتقىزىلدى.
ناۋقاس اۋرۋحاناعا جاتقىزىلعاننان كەيىنگى كۇنى ونىڭ ومىرتقاسىنا تەحنيكالىق كۇردەلى ءارى سيرەك وتا جاسالدى.
جاسالعان حيرۋرگيالىق وتا ءتىس ءتارىزدى ءوسىندىنى بۇراندامەن ترانسدەنتالدى وستەوسينتەزدەۋ دەپ اتالادى. ناۋقاستى مۇگەدەكتىكتەن قۇتقارۋ جانە ونىڭ ءومىر ءسۇرۋ ساپاسىن ساقتاۋ ءۇشىن №4 قكا نەيروحيرۋرگ ماماندارى ەمدەۋدىڭ بۇل ءادىسىن العاش رەت قولدانۋدى ۇيعاردى.
پيلوتتىق وتانى نەيروحيرۋرگ ايتمۇحانوۆ تيمۋر مۇرات ۇلى جاسادى.
«مويىن ومىرتقاسى 7 ومىرتقادان تۇرادى. ءبىرىنشى جانە ەكىنشى ومىرتقا كوتەرەتىن فۋنكسيونالدىق جۇكتەمەگە بايلانىستى تۇبەگەيلى ەرەكشە مانگە يە. ءبىرىنشى ومىرتقا – اتلانت، ەكىنشى ومىرتقا – اكسيس. ولار بىر-بىرىمەن س2 ومىرتقاسىنىڭ ءتىس ءتارىزدى ءوسىندىسى مەن اتلانتتىڭ الدىڭعى دوعاسىنان تۇزىلەتىن كريۋۆەلە بۋىنى ارقىلى بايلانىسادى. ومىرتقانىڭ بۇل سەگمەنتىنىڭ ماڭىزدىلىعى، ءتۇرلى اۆتورلاردىڭ پىكىرىنشە، باس قوزعالىسىنىڭ 50-دەن 70%-نا دەيىن وسى بولىمدە ورىن الاتىنىندا. ءبىراق ءتىس ءتارىزدى ءوسىندىنىڭ سىنۋى كەزىندە بۇل فۋنكسيا زارداپ شەگەدى»، - دەيدى دارىگەر تيمۋر ايتمۇحانوۆ.
وتا ناتيجەسىندە ناۋقاس پالاتاعا اۋىستىرىلدى، مويىن ومىرتقاسىنداعى قوزعالىستار قالپىنا كەلتىرىلدى.
نەيروحيرۋرگتار يمپلانتتىڭ جۇمىسىن ورناتقاننان كەيىن ءبىرىنشى كۇنى، ءبىر ايدان كەيىن، ءۇش ايدان كەيىن جانە التى ايدان كەيىن تەكسەرەدى. بۇل ءادىس اۋرۋحاناعا جاتقىزۋ ۇزاقتىعىن قىسقارتۋمەن قاتار، ناۋقاستىڭ مۇگەدەك بولۋ ءقاۋپىن دە كۇرت تومەندەتەدى.