وپەرا قالىڭ كورەرمەنگە 15 جەلتوقساندا جول تارتادى.
اباي اتىنداعى قازاق ۇلتتىق وپەرا جانە بالەت تەاترىندا دج. ۆەرديدىڭ «ايدا» وپەراسىنىڭ جابىق كورسەتىلىمى ءوتتى، دەپ حابارلايدى Almaty-akshamy.kz
«ايدا» وپەراسى - الەمدىك وپەرادا وزىندىك ويىپ الار ورنى بار، تەاترسۇيەر قاۋىمنىڭ اراسىندا ەڭ تانىمال تۋىندىلاردىڭ ءبىرى. «ايدا» - ماحابباتتىڭ ۇلى كۇشىن باياندايتىن پسيحولوگيالىق مۋزىكالىق دراما. اباي اتىنداعى قازۇوبت-دا بۇل قويىلىمنىڭ قويىلماعانىنا بەس جىل تولىپتى. ءقازىر قويۋشى-رەجيسسەر ءلايلىم يماعازينا مەن قويۋشى-سۋرەتشى ۆياچەسلاۆ وكۋنيەۆ باستاعان شىعارماشىلىق توپ ساحنادا ءبىزدىڭ داۋىرىمىزگە دەيىنگى ەكى مىڭ جىل بۇرىنعى مىسىر پەرعاۋىندارى مەن جاۋىنگەرلەرىنىڭ الەمىن قايتا جانداندىردى.
قويىلىم تۋرالى بۇگىن ءلايلىم يمانعازينا، ۆياچەسلاۆ وكۋنيەۆ، اباي اتىنداعى قازۇپۋ ديرەكتورىنىڭ مىندەتىن اتقارۋشى تايىر قاراتايەۆ، سۋرەتشى-بەينوگراف ۆيكتوريا زلوتنيكوۆا مەن ارنايى شاقىرىلعان سوليست احمەت اگادي ايتىپ بەردى.
«مىسىرلىق ميفولوگيا جىلدان-جىلعا ءتۇرلى تەوريالار مەن بولجامدارمەن تولىقتىرىلا تۇسۋدە. ەجەلگى وركەنيەتتىڭ اسقاق جەتىستىكتەرى سىرتتان كەلگەن كۇشتەرمەن، وزگە عالامشار ىقپالىمەن جاسالدى دەگەن دە ويلار بار. سوندىقتان بىزگە سپەكتاكلمەن جۇمىس جاساۋ كەزىندە ەكى وركەنيەتتىڭ - ەجەلگى مىسىر مەن فانتاستيكالىق الەمنىڭ توعىسۋ ستيليستيكاسىن پايدالانۋ قىزىقتى بولىپ كورىندى. ءبىز ەجەلگى ارتەفاكتىلەردىڭ فراگمەنتتەرى مەن تەحنوگەندىك الەمنىڭ ديزاينىنان وزىنشە پازل ويلاپ تاپتىق... قالاي شىققانىن كورەرمەن باعالار»، - دەدى قويۋشى-سۋرەتشى ۆياچەسلاۆ وكۋنيەۆ.
دجۋزەپپە ۆەرديدىڭ ولمەس تۋىندىسى الەمنىڭ بارلىق جەتەكشى وپەرا تەاترلارىنىڭ رەپەرتۋارىنان تابىلادى. مىسىر اسكەري قولباسشىسى رادامەس، تۇتقىنعا تۇسكەن ەفيوپيالىق حانشايىم ايدا مەن پەرعاۋىن قىزى امنەريس ماحاببات پەن بوستاندىق، ماحاببات پەن كەك، ال سوڭىندا – ماحاببات پەن ءومىر اراسىنان اۋىر تاڭداۋ جاساۋعا ءتيىس ەدى. «ايدا» وپەراسىنىڭ باستى ەرەكشەلىگى دە وسىندا – قابىرلەردىڭ بىرىندەگى قازبا جۇمىستارى بارىسىندا تابىلعان ەجەلگى پاپيرۋستان الىنعان وقيعانىڭ شىنايى سيۋجەتى نەگىزگە الىنعان.
«الەم ۋاقىتتان قورقادى، ال ۋاقىت پيراميدالاردان قورقادى. «ايدا» - عاسىرلار كوشىندە بارلىق ۋاقىت پەن حالىقتار ءۇشىن جازىلعان وپەرا. كەيىپكەرلەرى سەزىم مەن پارىزدىڭ اراسىندا تاڭداۋ جاسايتىن ماحاببات تاريحى ەجەلگى مىسىردىڭ قۇپيالارى مەن سىرلارىنا تولى. ۆەرديدىڭ ۇلى مۋزىكاسى جۇلدىزدارعا، عارىش كەڭىستىگىنىڭ شەكسىزدىگىنە جەتەلەيدى»، - دەدى ءوز كەزەگىندە ءلايلىم يمانعازينا.