الماتىلىق كورەرمەندەرگە «كارمەن سيۋيتاسى» بالەتى ۇسىنىلدى

الماتىدا رەسەيدىڭ حالىق ءارتىسى، ۇلكەن تەاتردىڭ پريما-بالەريناسى، «لا سكالا» تەاترىنىڭ ەتۋالى سۆەتلانا زاحاروۆا ونەر كورسەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ول الماتىعا العاش رەت 2012 جىلى قاراشادا كەلگەن بولاتىن. سول كەزدە ول رۋسلان سكۆورسوۆپەن «جيزەل» سپەكتاكلىندە وينادى.

«ماييا پليسەسكايا – اڭىز ادام. مەن «كارمەن – سيۋيتا» بالەتىنىڭ پرەمەراسىن دايىنداۋ كەزىندە ونىمەن ءبىراز جۇمىس ىستەۋ باقىتىنا يە بولدىم. بۇل ونىڭ مەرەيتويلارىنىڭ ءبىرى جانە ۇلكەن تەاتردا اتاپ ءوتىلدى. سول كەزدە قويىلىمعا البەرتو الونسونىڭ ءوزى كەلگەن بولاتىن. «كارمەن سيۋيتا» - مەنىڭ ومىرىمدەگى ەڭ ماڭىزدى سپەكتاكلدەردىڭ ءبىرى. مەن ونى كوپتەگەن جىلدار بويى الەمنىڭ ءارتۇرلى ساحنالارىندا بيلەپ كەلەمىن. بۇل قويىلىم ءالى دە سۇرانىسقا يە جانە كورەرمەن ونى قۋانا تاماشالايدى»، - دەيدى پريما-بالەرينا.

ايتا كەتەيىك، 2021 جىلدىڭ 30-31 قازانىندا الماتىدا اتى اڭىزعا اينالعان ماييا پليسەسكايانىڭ 95 جىلدىعىنا ارنالعان IV حالىقارالىق Ballet Globe، فەستيۆالى «اققۋ كولى» سپەكتاكلىمەن اشىلدى. Ballet Globe فەستيۆالىنىڭ نەگىزىن قالاۋشى ەرلان انداعۇلوۆتىڭ ايتۋىنشا، فەستيۆالدىڭ باستى ماقساتى – حالىقتى بالەت ونەرىنىڭ سان قىرلى الەمىمەن: جوعارى كلاسسيكادان باستاپ زاماناۋي حورەوگرافيالىق ونەردىڭ بىرەگەي كارتينالارىنا دەيىن تانىستىرۋ.

«جىل سايىنعى فەستيۆال كەڭىنەن تانىمال. بۇل فەستيۆال الەم جۇلدىزدارىنىڭ باسىن قوسادى. IV حالىقارالىق Ballet Globe فەستيۆالى - شىن مانىندە تاريحي وقيعا. سونىمەن قاتار، ءبىزدىڭ اسەم تەاترىمىزدىڭ ساحناسىندا ءبىزدىڭ زامانىمىزدىڭ ەڭ جارقىن الەمدىك جۇلدىزدارىنىڭ ءبىرى سۆەتلانا زاحاروۆانىڭ الماتىعا كەلۋىن بالەتسۇيەر قاۋىم كوپ جىل كۇتتى»، - دەدى ول.